គណៈកម្មាធិការជាតិរៀបចំការបោះឆ្នោត (គ.ជ.ប) គិតមកដល់ថ្ងៃអង្គារសប្ដាហ៍នេះ បានអនុញ្ញាតឱ្យសមាគម និងអង្គការមិនមែនរដ្ឋាភិបាលចំនួន៧ ដែលដាក់អ្នកសង្កេតការណ៍ជិត២៨ ០០០នាក់ ចូលរួមសង្កេតមើលដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់។
សេចក្ដីប្រកាសព័ត៌មានរបស់គ.ជ.ប នៅថ្ងៃទី២៨ ខែមេសា ឆ្នាំ២០២២នេះ បានឱ្យដឹងថា គិតត្រឹមថ្ងៃទី២៦ ខែមេសា គ.ជ.ប បានអនុញ្ញាតឱ្យសមាគម និងអង្គការមិនមែនរដ្ឋាភិបាលចំនួន៧ ដែលបានដាក់ពាក្យស្នើសុំ និងមានអ្នកសង្កេតការណ៍ចំនួន២៧ ៩២៦រូប ដើម្បីចូលរួមសង្កេតមើលដំណើរការបោះឆ្នោតជ្រើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២។
គ.ជ.ប បញ្ជាក់ថា សមាគម និងអង្គការមិនមែនរដ្ឋាភិបាលទាំង៧ ដែលបានដាក់អ្នកសង្កេតការណ៍នោះ រួមមាន សមាគមបញ្ញវន្តនិងយុវជនស្ម័គ្រចិត្ត សហភាពសហព័ន្ធយុវជនកម្ពុជា គណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅកម្ពុជា (ខុមហ្វ្រែល) សមាគមនារីកម្ពុជាដើម្បីសន្តិភាពនិងអភិវឌ្ឍន៍ អង្គការសុខភាពផ្លូវចិត្តបែបបុរាណនិងសម័យ សមាគមមិត្តយើង និងសមាគមសហព័ន្ធនិស្សិតបញ្ញាវ័ន្តប្រជាធិបតេយ្យកម្ពុជា។
សេចក្តីប្រកាសព័ត៌មានដដែលបន្តថា បច្ចុប្បន្ន គ.ជ.ប ក៏កំពុងពិនិត្យលើសំណើរបស់សមាគមអង្គការចំនួន៤ទៀតដែលបានស្នើដាក់អ្នកសង្កេតការណ៍ចំនួន៤ ៧០៦រូបផងដែរ។
បើតាម គ.ជ.ប ការដាក់និងការទទួលពាក្យសុំចុះឈ្មោះអ្នកសង្កេតការណ៍ជាតិ ប្រព្រឹត្តទៅពីថ្ងៃទី១៥ ខែកុម្ភៈ ដល់ថ្ងៃទី២៥ ខែឧសភា ឆ្នាំ២០២២៕