កម្មករម្នាក់ទៀត បម្រើការងារនៅរោងចក្រកាត់ដេរសម្លៀកបំពាក់ «អេសវ៉ាយអេចជេ ហ្គាមិន» ស្ថិតនៅឃុំបែកចាន ស្រុកអង្គស្នួល ខេត្តកណ្ដាល ត្រូវបានថៅកែបញ្ឈប់ពីការងារ ក្រោយចូលជាមាជិកសហជីពនៅក្នុងរោងចក្រ។
កាលពីសប្ដាហ៍មុននេះ កម្មករ-កម្មការិនីចំនួន៣នាក់ធ្វើការនៅរោងចក្រ អេសវ៉ាយអេចជេ រួមមាន អ្នកស្រី ហ៊ុល សុឃីម, អ្នកស្រី ប្រាក់ តុលា និងលោក នី តុលា ត្រូវបានថៅកែបញ្ឈប់ពីការងារ ក្រោយពួកគេឈរឈ្មោះជាបេក្ខជនសហព័ន្ធសហជីពឯករាជ្យប្រចាំរោងចក្រនេះ។
លោក ម៉ាន់ សុខមុំ ជាកម្មករធ្វើការនៅរោងចក្រ អេសវ៉ាយអេចជេ ប្រាប់វីអូឌីនៅថ្ងៃសុក្រនេះថា រូបលោកត្រូវបានថៅកែបញ្ឈប់ពីការងារកាលពីថ្ងៃម្សិលមិញនេះ ក្រោមហេតុផលថា លោកធ្វើការងារមិនល្អ ខណៈលោកបានខិតខំធ្វើការងារ និងថែមម៉ោងដល់ម៉ោង៨យប់ជារៀងរាល់ថ្ងៃ។
កម្មករផ្នែកវេចខ្ចប់រូបនេះបន្តថា ថៅកែបញ្ឈប់រូបលោកពីការងារ ក្រោយដឹងថាលោកជាសមាជិកសហជីពដែលគ្រោងបង្កើតថ្មីនៅក្នុងរោងចក្រនោះ។
លោកបន្ថែមថា៖ «មេខ្ញុំគាត់ចូលជាតំណាងសហជីពឯករាជ្យ ហើយដល់ពេលគេបញ្ឈប់គាត់ទៅ ហើយខ្ញុំដែលគាត់ជាអ្នកនាំចូលហ្នឹង គេមកបញ្ឈប់ខ្ញុំដែរ។ គេថាខ្ញុំធ្វើការអត់ល្អ ប៉ុន្តែខ្ញុំធ្វើការថែមម៉ោង៨រហូត មិនដែលឈប់ផង។ ដល់ហៅខ្ញុំទៅបើកលុយ គេថាខ្ញុំធ្វើអត់ល្អ»។
កម្មការិនីជាប្រធានផ្នែកវេចខ្ចប់ អ្នកស្រី ហ៊ុល សុឃីម មានប្រសាសន៍ថា ជុំវិញវិវាទការងារនេះ អ្នកស្រី និងកម្មករផ្សេងទៀត បានដាក់បណ្ដឹងទៅនាយកដ្ឋានវិវាទការងារនៃក្រសួងការងារ ដោយប្ដឹងថៅកែរោងចក្រ អេសវ៉ាយអេចជេ កាលពីថ្ងៃទី២៦ ខែមេសានេះ ដោយថា ថៅកែបញ្ឈប់ពួកគេពីការងារដោយខុសច្បាប់ និងទាមទារឱ្យថៅកែទទួលយកពួកគេចូលធ្វើការងារវិញផងដែរ។
អ្នកស្រីបន្ថែមថា៖ «ខ្ញុំចង់ឱ្យក្រសួងការងារមានចំណាត់ការលើរឿងពួកខ្ញុំនេះឱ្យបានឆាប់ ព្រោះអីវាអយុត្តិធម៌ណាស់ គ្រាន់តែយើងបង្កើតសហជីពដើម្បីការពារផលប្រយោជន៍កម្មករសោះ គេរើសអើង គេបញ្ឈប់យើងពីការងារវិញ»។
វីអូឌី មិនអាចសុំការឆ្លើយតបពីលោក ពិសិដ្ឋ ដែលកម្មករប្រាប់ថាជាប្រធានរដ្ឋបាលរោងចក្រ អេសវ៉ាយអេចជេ និងអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ រួមនឹងប្រធាននាយកដ្ឋានវិវាទការងារ លោក អាំង សេងលី បានទេ ពាក់ព័ន្ធករណីនេះ។
ប៉ុន្តែនាយកដ្ឋានវិវាទការងារនៃក្រសួងការងារ នៅទី២៩ ខែមេសា ឆ្នាំ២០២២នេះ បានចេញលិខិតមួយឱ្យអ្នកស្រី ហ៊ុល សុឃីម ចូលខ្លួនទៅផ្តល់ព័ត៌មាននៅថ្ងៃទី៣ ខែឧសភា ឆ្នាំ២០២២នេះ ពាក់ព័ន្ធបណ្ដឹងដែលអ្នកស្រីប្ដឹងរោងចក្ររឿងបញ្ឈប់អ្នកស្រីនិងកម្មករផ្សេងទៀតពីការងារ។
ប្រធានសហព័ន្ធសហជីពឯករាជ្យ លោក រី សិទ្ធីណែត ចាត់ទុកករណីថៅកែបញ្ឈប់កម្មករពីការងារនេះថា ជាការរើសអើងសហជីព និងរំលោភលើសិទ្ធិកម្មករធ្ងន់ធ្ងរ។ លោកថា ថ្នាក់ដឹកនាំរោងចក្រ អេសវ៉ាយអេចជេ បានមើលងាយកម្មករ បញ្ឈប់កម្មករដោយអត់មានមូលហេតុច្បាស់លាស់។
ប្រធានសហព័ន្ធសហជីពរូបនេះ ឱ្យដឹងថា សហជីពរបស់លោកបានទទួលលិខិតអញ្ជើញមួយពីនាយកដ្ឋានវិវាទការងារ ឱ្យទៅឆ្លើយបំភ្លឺ ឬផ្ដល់ព័ត៌មាន ជុំវិញករណីថៅកែបញ្ឈប់កម្មករពីការងារនេះ នៅថ្ងៃទី៣ ខែឧសភា ខាងមុខនេះ។
លោកបន្ថែមថា៖ «យើងកំពុងរង់ចាំសេចក្ដីសម្រេចពីខាងក្រសួងការងារសិន ថាគាត់សម្រេចឱ្យថៅកែយកកម្មករចូលធ្វើការងារវិញ ឬយ៉ាងណា។ បើខាង[ក្រសួង]សម្រេចឱ្យចូលធ្វើការងារវិញ យើងនឹងតេទៅខាងរោងចក្រឱ្យយកកម្មករចូលធ្វើការងារវិញ។ ហើយករណីបន្ត ប្រសិនបើរោងចក្រអត់ព្រមទទួលយកពួកគាត់ចូលធ្វើការងារវិញទេ គឺមួយខែក្រោយនៃការចេញសេចក្ដីបង្គាប់របស់អធិការការងារ គឺយើងនឹងប្ដឹងទៅអ្នកបញ្ជាទិញតែម្ដង»។
បើតាមកម្មកររោងចក្រ «អេសវ៉ាយអេចជេ ហ្គាមិន» ជារោងចក្រផលិតសម្លៀកបំពាក់មានកម្មករជិត១ ០០០នាក់ និងមានថៅកែជាជនជាតិចិន៕