គណៈកម្មាធិការជាតិរៀបចំការបោះឆ្នោត (គ.ជ.ប) ចេញសេចក្ដីសម្រេចបញ្ចប់ការចុះបញ្ជីបេក្ខជនគណបក្សនយោបាយដែលឈរឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដោយមានគណបក្សនយោបាយចំនួន១៧ បានចូលរួមប្រកួតប្រជែង។
សេចក្ដីជូនដំណឹងរបស់ គ.ជ.ប កាលពីថ្ងៃសៅរ៍បញ្ជាក់ថា ផ្អែកលើបញ្ជីបេក្ខជនផ្លូវការ គណកម្មការឃុំសង្កាត់រៀបចំការបោះឆ្នោត (ច.ប.ឃ.ស) ដែលមានចំនួន១ ៦៥២ ឃុំ-សង្កាត់ ក្នុង២៥រាជធានី-ខេត្ត បានធ្វើការចាប់ឆ្នោត ដើម្បីកំណត់លំដាប់លេខរៀងបញ្ជីបេក្ខជនដែលត្រូវដាក់លើសន្លឹកឆ្នោតរួចរាល់ជាស្រេច។
គ.ជ.ប បន្តថា គណបក្សនយោបាយចុះឈ្មោះផ្លូវការទាំងអស់អាចធ្វើការឃោសនាបោះឆ្នោតមានរយៈពេល១៤ថ្ងៃ គឺជាប់ផ្ដើមពីថ្ងៃទី២១ ខែឧសភា ឆ្នាំ២០២២ ដល់ថ្ងៃទី៣ ខែមិថុនា ឆ្នាំ២០២២ ហើយរាល់គ្រប់សកម្មភាពឃោសនា ត្រូវបញ្ឈប់១ថ្ងៃ ឬ២៤ម៉ោង មុនថ្ងៃបោះឆ្នោត។
យ៉ាងណាមិញ មានគណបក្សនយោបាយចំនួន ១៧ បានចូលរួមក្នុងការប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នេះ ហើយនឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខ។
គណៈកម្មាធិការជាតិរៀបចំការបោះឆ្នោត បញ្ជាក់ថា បានអនុវត្តចប់សព្វគ្រប់រាល់ការដាក់ ការទទួល និងការដោះស្រាយពាក្យបណ្ដឹងនៅក្នុងដំណើរការនៃការចុះបញ្ជីបេក្ខជននៃគណបក្សនយោបាយអស់ហើយ។
គ.ជ.ប បានកំណត់ថា គណបក្សនយោបាយទាំងអស់មិនត្រូវធ្វើសកម្មភាពនយោបាយដែលនាំឱ្យអាចកំណត់បានថាជាការឃោសនាបោះឆ្នោតមុនពេលកំណត់ ដូចមានចែងក្នុងមាត្រា៦៨ និងមាត្រា៧០ នៃច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ (ច.ប.ឃ.ស) ហើយរាល់ការធ្វើសកម្មភាពឃោសនាបោះឆ្នោតដែលផ្ទុយពីមាត្រា៧០ ត្រូវទទួលទោសតាមមាត្រា១៨៤ នៃ ច.ប.ឃ.ស ផងដែរ៕
