មន្ត្រីជាន់ខ្ពស់គណបក្សភ្លើងទៀន ប្រតិកម្មប្រឆាំងសារនយោបាយរបស់គណបក្សប្រជាជនកម្ពុជាដែលលើកឡើងថា គណបក្សក្រៅរដ្ឋាភិបាលមួយនេះនឹងរលត់ពន្លឺទៅវិញនៅមុនការបោះឆ្នោតជ្រើសរើសក្រុមប្រឹក្សាឃុំ-សង្កាត់មកដល់ទៅទៀត។
ការឆ្លើយតបរបស់អនុប្រធានគណបក្សភ្លើងទៀន នៅបន្ទាប់ពីអ្នកនាំពាក្យគណបក្សគ្រប់គ្រងអំណាចចំអកឱ្យនៅក្នុងបណ្ដាញតេឡេក្រាមរបស់ខ្លួន ហើយត្រូវបានកាសែតចុះផ្សាយកាលពីថ្ងៃទី២ ខែឧសភា ថាគណបក្សចាស់វស្សាមួយនេះ នឹងលែងមានពន្លឺតទៅមុខទៀត យ៉ាងយូរណាស់នៅមុនការបោះឆ្នោតឃុំ-សង្កាត់ចូលមកដល់។
លោក ថាច់ សេដ្ឋា អនុប្រធានគណបក្សភ្លើងទៀន ប្រតិកម្មក្រោយ១ថ្ងៃ គឺនៅថ្ងៃនេះ ដោយចាត់ទុកសារនយោបាយរបស់អ្នកនាំពាក្យគណបក្សប្រជាជនកម្ពុជា ថាវាមិនបានឆ្លុះបញ្ចាំងនូវការពិតឡើយ។ អនុប្រធានរូបនេះបានចំអកឱ្យលោក សុខ ឥសាន វិញថា ពន្លឺភ្លើងទៀនដែលកើតចេញពីការគាំទ្រនៅតាមមូលដ្ឋាននេះ វានឹងឆេះឋានទេវតាទៅវិញច្រើនជាងការទស្សន៍ទាយទុកមុនរបស់គណបក្សប្រជាជនកម្ពុជា។
លោកបន្តថា៖ «ដូចគេថា វាអត់ស៊ីសង្វាក់គ្នា។ បើជិតដល់បោះឆ្នោតហើយហ្នឹង! ១ខែប្លាយហើយហ្នឹង! ហើយរលត់ម៉េច? បើវាកាន់តែឆេះខ្លាំងហើយហ្នឹង! តិចទៀតឆេះដល់សារុងទេវតាឥលូវហើយ ជិតឆេះដល់សារុងទេវតាបានភ័យខ្លាំងហ្នឹង»។
សារនយោបាយរបស់អ្នកនាំពាក្យគណបក្សប្រជាជនកម្ពុជា ត្រូវបានអ្នកកាសែតយកមកចុះផ្សាយជាសាធារណៈ ក្រោយពេលលោកបានបង្ហោះនៅលើបណ្ដាញតេឡេក្រាម កាលពីថ្ងៃទី២ ខែឧសភា។
តាមរយៈសារនយោបាយនេះ លោក សុខ ឥសាន លើកឡើងថា៖ «គណបក្សភ្លើងទៀននឹងរលត់នៅមុនការបោះឆ្នោត»។
ក្នុងន័យនេះ លោក សុខ ឥសាន មើលឃើញថា គណបក្សនយោបាយដែលទើបតែចាប់កំណើតបានប៉ុន្មានខែ ក្រោយពីអ្នកនយោបាយជើងចាស់មួយចំនួន ដូចជាលោក សុន ឆ័យ ជាដើម ចេញពីគណបក្សសង្គ្រោះជាតិដែលត្រូវបានតុលាការរំលាយ មកជ្រកក្រោមទ្រនំ «គណបក្សភ្លើងទៀន» ហើយក៏មានសកម្មជនរាប់ពាន់នាក់នៅមូលដ្ឋានបានចុះចូលជាបន្តបន្ទាប់ជាមួយគណបក្សកាន់អំណាច។ ក្រៅពីនេះ នៅមានបញ្ជីបេក្ខជនផ្សេងទៀតរបស់គណបក្សក្រៅរដ្ឋាភិបាលមួយនេះ ត្រូវបានរំលាយចេញពីបញ្ជីបោះឆ្នោតក្រុមប្រឹក្សាឃុំ-សង្កាត់សម្រាប់អាណត្តិទី៥នេះ។
បើតាមលោក សុខ ឥសាន ឈរលើហេតុផលទាំងនេះហើយ ដែលលោកមើលឃើញថា គណបក្សភ្លើងទៀន នឹងរលត់នៅមុនការបោះឆ្នោតមកដល់។ លោកបន្តថា អ្វីដែលរឹតតែធ្វើឱ្យគណបក្សមួយនេះមិនអាចមានលទ្ធផលល្អ ដើម្បីចូលរួមប្រកួតប្រជែងការបោះឆ្នោតនៅពេលខាងមុខនេះបាន គឺកម្លាំងអ្នកគាំទ្រ ជើងក្រោមក្នុងមូលដ្ឋាន របស់គណបក្សភ្លើងទៀន បានសម្រេចចូលរួមក្នុងសកម្មភាពនយោបាយជាមួយគណបក្សកាន់អំណាចជាហូរហែ។
លោកបន្តថា៖ «សមាជិក វាចេះតែកើនឡើង ហើយការគាំទ្ររបស់ប្រជាពលរដ្ឋ វាចេះតែកើនឡើង អាហ្នឹងវាមានការគាំទ្រ។ ហើយចុះបើគេចេះតែចេញចោល អាហ្នឹងវាមិនមែនឆ្លុះបញ្ចាំងអំពីការគាំទ្រទេ វាបាត់បង់ការគាំទ្រ។ ហើយបើបាត់បង់ការគាំទ្រ តែភ្លើងទៀនដុតពីមុនវាឆេះធ្លោមក ប៉ុន្តែក្រោយមកបាត់ការគាំទ្រភ្លើងទៀន វាចេះតែអ៊ីវទៅៗ [ពន្លឺព្រឹមៗ]»។
របាយការណ៍ស្ដីពីការប្រមើលមើលចំពោះការបោះឆ្នោតជ្រើសតាំងតំណាងរាស្រ្ត ឆ្នាំ២០១៣ ដែលចេញដោយអង្គការខុមហ្វ្រែល កាលពីខែវិច្ឆិកា ឆ្នាំ២០១២ បង្ហាញថា «គណបក្ស សម រង្ស៊ី» ដែលបច្ចុប្បន្នជា «គណបក្សភ្លើងទៀន» ធ្លាប់ទទួលបានអាសនៈជាមេឃុំចៅ-សង្កាត់ ចំនួន២៦អាសនៈ ក្នុងឆ្នាំ២០០៨ មុននឹងបូកបញ្ចូលគ្នាជាមួយគណបក្សសិទ្ធិមនុស្ស ដែលបង្កើតបានជា «គណបក្សសង្គ្រោះជាតិ »។
នាយកប្រតិបត្តិនៃអង្គការអភិវឌ្ឍន៍ផ្នត់គំនិត លោក សេក សុជាតិ យល់ឃើញថា នេះជារបៀប ឬជាសង្គ្រាមចិត្តសាស្រ្តនៃការលេងវោហារសាស្ត្ររបស់អ្នកនយោបាយ នៅមុនការបោះឆ្នោតមកដល់។ បើតាមលោក សេក សុជាតិ អ្នកដែលចំណេញពីការប្រើយុទ្ធសាស្រ្តនយោបាយ ដែលលោកហៅថា ការធ្វើនយោបាយបែបប្រជាភិថុតិនេះ គឺជាអ្នកនយោបាយផ្ទាល់។
បើទោះជាអ្នកវិភាគរូបនេះមើលឃើញថា ពលរដ្ឋម្ចាស់ឆ្នោតនឹងមិនបានទទួលផលចំណេញក្ដី លោកនៅតែចាត់ទុកថា សម្រាប់បរិបទចុងក្រោយនេះ អង្គបោះឆ្នោតហាក់ទទួលបានព័ត៌មានច្រើនពីអ្នកនយោបាយឬគណបក្សនយោបាយណាមួយ ដែលមិនងាយនឹងធ្វើឱ្យពួកគេឆាប់ជឿទុកចិត្តដូចមុនទៀតឡើយ។
លោកបន្តថា៖ «ខ្ញុំយល់ថា ប្រជាពលរដ្ឋលោកមានភាពឆ្លាតវៃច្រើនជាងការបោះឆ្នោតលើកមុនៗ។ យើងឃើញប្រជាពលរដ្ឋមិនចាប់អារម្មណ៍ជាមួយនឹងសារនយោបាយបែបប្រជាភិថុតិរបស់គណបក្សនយោបាយមុនការបោះឆ្នោតដូចរាល់អាណត្តិទេ»។
សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅក្នុងអាណត្តិទី៥ ឆ្នាំ២០២២នេះ គណបក្សភ្លើងទៀន បានដាក់បញ្ជីបេក្ខជនឈរឈ្មោះក្នុងលំដាប់លេខរៀងទី២ បន្ទាប់ពីគណបក្សប្រជាជនកម្ពុជា។ ប៉ុន្តែដោយសារបញ្ជីបេក្ខជនត្រូវបានគេរកឃើញថាមានកំហុសលើនីតិវិធីមួយចំនួន ដែលគណបក្សនេះចាត់ទុកថា កំហុសដែលត្រូវគេរកឃើញនោះ វាជារឿងនយោបាយ ហើយនៅនាទីចុងក្រោយ ត្រូវបានស្ថាប័នជាតិរៀបចំការបោះឆ្នោត (គ.ជ.ប) សម្រេចលុបចេញពីបញ្ជីបោះឆ្នោតចំនួន២៩ឃុំសង្កាត់។
គិតមកដល់ពេលនេះ គណបក្សភ្លើងទៀន នៅសល់បញ្ជីបេក្ខជនដែលឈរជាមេឃុំ-ចៅសង្កាត់ចំនួន១៦ ២៣ឃុំ-សង្កាត់ប៉ុណ្ណោះ ក្នុងចំណោមឃុំ-សង្កាត់សរុប១ ៦៥២ នៅទូទាំងប្រទេស៕
