ក្រុមអង្គការសង្គមស៊ីវិល ជំរុញរដ្ឋាភិបាលអនុវត្តគោលនយោបាយដែលមានស្រាប់ឱ្យបានពេញលេញ ដើម្បីលើកកម្ពស់ការចូលរួមរបស់ប្រជាពលរដ្ឋប្រកបដោយបរិយាបន្ន ក្នុងកិច្ចការពារបរិស្ថាន ធនធានធម្មជាតិ និងបញ្ហាបម្រែបម្រួលអាកាសធាតុ។
ការជំរុញនេះធ្វើឡើងក្នុងយុទ្ធនាការជិះកង់រយៈពេល១១ថ្ងៃ ចាប់ពីថ្ងៃទី១០ ខែឧសភានេះ ដើម្បីប្រារព្ធទិវាបរិស្ថានពិភពលោក នៅឆ្នាំ២០២២នេះ។
ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង ប្រាប់ វីអូឌី នៅថ្ងៃនេះថា ការធ្វើយុទ្ធនាការជិះកង់របស់ក្រុមអង្គការសង្គមស៊ីវិលនេះ បែងចែកជាពីរក្រុម ដោយក្នុងមួយក្រុមមានគ្នាចំនួន២៥នាក់ ក្នុងនោះ ក្រុមទី១ ជិះកង់នៅរាជធានីភ្នំពេញ ជុំវិញបឹងតាមោក ដោយមានរយៈពេលតែ១ថ្ងៃប៉ុណ្ណោះ។
ចំណែកក្រុមទី២ លោកថា ជិះកង់រយៈពេល១១ថ្ងៃ ចាប់ផ្ដើមចេញដំណើរពីទីរួមខេត្តកំពង់ធំ ឆ្ពោះទៅកាន់ខេត្តព្រះវិហារ ស្ទឹងត្រែង ក្រចេះ និងបញ្ចប់នៅខេត្តកំពង់ធំវិញ ដែលចម្ងាយប្រមាណ៦០០គីឡូម៉ែត្រ។
លោក ហេង គឹមហុង បន្តថា យុទ្ធនាការជិះកង់នេះធ្វើឡើងក្នុងគោលបំណងលើកកម្ពស់ការយល់ដឹង និងការចូលរួមរបស់យុវជន ក្នុងកិច្ចថែរក្សាបរិស្ថាន ធនធានធម្មជាតិ និងបញ្ហាបម្រែបម្រួលអាកាសធាតុ តាមរយៈសកម្មភាពជំរុញឱ្យមានការឈ្វេងយល់អំពីផលប៉ះពាល់នៃការបំផ្លាញព្រៃឈើ ការលុបបឹងធម្មជាតិ ការប្រើប្រាស់ប្លាស្ទិក និងប្រេងឥន្ធនៈ ជាដើម។
ចំណែកគោលបំណងមួយទៀត លោកថា ជំរុញឱ្យរដ្ឋាភិបាល និងមន្ត្រីសាធារណៈអនុវត្តគោលនយោបាយដែលមានស្រាប់ឱ្យបានពេញលេញ ដើម្បីលើកកម្ពស់ការចូលរួមរបស់ប្រជាពលរដ្ឋប្រកបដោយបរិយាបន្ន ក្នុងកិច្ចការពារបរិស្ថាន ធនធានធម្មជាតិ និងបញ្ហាបម្រែបម្រួលអាកាសធាតុ។ ក្រៅពីនោះ ក៏ជំរុញឱ្យប្រជាពលរដ្ឋអនុវត្តសិទ្ធិសេរីភាពរបស់ខ្លួន និងចូលរួមលើកឡើងពីបញ្ហាទាក់ទិននឹងកិច្ចការពារបរិស្ថាន ធនធានធម្មជាតិ និងបម្រែបម្រួលអាកាសធាតុ ទៅកាន់អ្នកធ្វើសេចក្ដីសម្រេចចិត្ត ដើម្បីស្វែងរកដំណោះស្រាយ។
លោក ហេង គឹមហុង បន្តថា មូលហេតុដែលក្រុមអង្គការសង្គមស៊ីវិលធ្វើយុទ្ធនាការនេះ ដោយសារតែរដ្ឋាភិបាលមិនបានអនុវត្តទៅតាមនយោបាយដែលមានស្រាប់ ក្នុងនោះ បានរឹតត្បិតមិនឱ្យមានការចុះល្បាតព្រៃ និងបំបិទសិទ្ធិសេរីភាពផ្សេងៗរបស់ប្រជាពលរដ្ឋ ជាដើម។
លោកថា៖ «តាមរយៈគោលនយោបាយនានា យើងឃើញថាមានភាពល្អច្រើន ដែលជាគោលនយោបាយក្នុងការលើកទឹកចិត្ត ជំរុញឱ្យមានការអនុវត្ត ប៉ុន្តែទាក់ទងការអនុវត្តជាក់ស្ដែង យើងឃើញថា នៅមានចន្លោះខ្វះខាត គួរតែមានការកែលម្អ ឬបើកលំហ។ យើងខ្ញុំមិនដឹងថាជាឆន្ទៈនៃការអនុវត្ត ឬក៏មានការបញ្ជាឱ្យមានការអនុវត្តបែបនេះទេ។ យើងខ្ញុំស្នើសុំឱ្យមានការអនុវត្តឱ្យបានពេញលេញស្របតាមបញ្ញត្តិច្បាប់មាត្រា២១ នៃច្បាប់ស្ដីពីតំបន់ការពារធម្មជាតិ ហើយនិងបញ្ញត្តិផ្សេងទៀត ស្ដីពីការលើកទឹកចិត្តឱ្យមានការចូលរួមពីប្រជាពលរដ្ឋទូទៅ»។
អ្នកនាំពាក្យក្រសួងបរិស្ថាន លោក នេត្រ ភក្ត្រា ចាត់ទុកសកម្មភាពនៃយុទ្ធនាការជិះកង់របស់ក្រុមអង្គការសង្គមស៊ីវិល និងយុវជននេះថា ធ្វើឡើងគ្រាន់តែឱ្យល្អមើលតែប៉ុណ្ណោះ ដោយថា កន្លងមក ក្រុមអង្គការសង្គមស៊ីវិលមិនដែលមើលឃើញពីចំណុចវិជ្ជមានរបស់រដ្ឋាភិបាលឡើយ។
លោកថា៖ «ចំពោះអ្វីដែលគាត់ទាមទារ វាគ្រាន់តែជាការទាមទារឱ្យតែល្អមើល ហើយប្រហែលជាគាត់មិនដែលតាមដានឬមិនបានចំណាយពេលវេលាក្នុងការតាមដានទេ ព្រោះគាត់គិតតែរកអ្វីដែលអាក្រក់ ដើម្បីនិយាយ និងធ្វើរបាយការណ៍ ដើម្បីរកជំនួយតែប៉ុណ្ណឹង។ អ្វីដែលខ្ញុំអាចជម្រាបជូន គឺរាជរដ្ឋាភិបាលកម្ពុជា តាមរយៈក្រសួងបរិស្ថាន យើងបានរៀបចំគោលនយោបាយ ហើយអ្វីដែលគាត់បានលើកឡើង គឺក្នុងការអនុវត្តនៅក្នុងគោលនយោបាយទាក់ទងនឹងកិច្ចគាំពារបរិស្ថាន ទាក់ទងជាមួយការគ្រប់គ្រងអភិរក្សធនធានធម្មជាតិ។ ហើយអ្វីដែលសំខាន់ យើងកំពុងជំរុញទៅការអភិវឌ្ឍសេដ្ឋកិច្ចមូលដ្ឋាន»។
បើតាមសេចក្ដីប្រកាសព័ត៌មានរបស់ក្រុមអង្គការសង្គមស៊ីវិល និងយុវជន ចេញផ្សាយនៅថ្ងៃទី១០ ខែឧសភា ឆ្នាំ២០២២ ឱ្យដឹងថា យុទ្ធនាការជិះកង់នេះធ្វើឡើងក្រោមមូលបទស្ដីពី «លើកកម្ពស់កិច្ចការពារបរិស្ថាន ដើម្បីចីរភាពធនធានធម្មជាតិ និងសុខុមាលភាពមនុស្សជាតិ» ដោយមានអង្គការសង្គមស៊ីវិលចូលរួមចំនួន១៥ស្ថាប័ន៕
