ព្រះមហាក្សត្រអំពាវនាវដល់ប្រជាពលរដ្ឋទៅចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់ នៅថ្ងៃទី៥ ខែមិថុនា ឆ្នាំ២០២២ ខាងមុខនេះ ដោយប្រើសិទ្ធិសេរីភាពរបស់ខ្លួនបោះឆ្នោតឱ្យបេក្ខជនឬគណបក្សនយោបាយណាមួយដែលខ្លួនទុកចិត្ត ដោយកុំព្រួយបារម្ភពីការគំរាមកំហែង។
ព្រះរាជសារព្រះមហាក្សត្រ ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ចុះថ្ងៃទី៣០ ខែមីនា ឆ្នាំ២០២២ ដែលត្រូវបានផ្សព្វផ្សាយនៅថ្ងៃអង្គារនេះ បានអំពាវនាវដល់ជនរួមជាតិ និងអ្នកបោះឆ្នោតទាំងអស់ ទៅបោះឆ្នោតជ្រើសរើសក្រុមប្រឹក្សាឃុំសង្កាត់ ឱ្យបានគ្រប់ៗគ្នា។
ព្រះរាជសារដដែលបន្តថា៖ «ការបោះឆ្នោតនៅថ្ងៃអាទិត្យ ទី៥ ខែមិថុនា ឆ្នាំ២០២២ គឺជាការបោះឆ្នោតជាទូទៅ ជាសកលដោយសម្ងាត់ តាមលទ្ធិប្រជាធិបតេយ្យ សេរី ពហុបក្ស ដូច្នេះសុំកុំឱ្យមានការព្រួយបារម្ភពីការគាបសង្កត់ ការគំរាមកំហែង ឬសម្លុតពីជនណាម្នាក់ ឬគណបក្សនយោបាយណាមួយឱ្យសោះ»។
ព្រះរាជសារព្រះមហាក្សត្រ ក៏បានលើកទឹកចិត្តដល់អ្នកបោះឆ្នោត ប្រើសិទ្ធិសេរីភាពរបស់ខ្លួនបោះឆ្នោតទៅតាមសតិសម្បជញ្ញៈរបស់ខ្លួនម្នាក់ៗ ដែលមានទំនុកចិត្តទៅលើបេក្ខជន ឬគណបក្សនយោបាយណាមួយផងដែរ៕