បេក្ខភាពចៅសង្កាត់គណបក្សភ្លើងទៀនខេត្តកោះកុងមួយរូប បានដាក់លិខិតទៅតុលាការដើម្បីស្នើសុំពន្យារពេលចូលរួមសវនាការ ជុំវិញបណ្ដឹងរបស់តំណាងគណបក្សប្រជាជនកម្ពុជា ដោយថា ពេលវេលាខ្លីពេក និងមិនទាន់មានមេធាវីការពារក្ដីនោះទេ។
ការដាក់លិខិតពន្យារនេះធ្វើឡើងនៅថ្ងៃទី៩ ខែឧសភា បន្ទាប់ពីតំណាងអយ្យការអមសាលាដំបូងខេត្តកោះកុង តាមរយៈដីកាកោះចុះថ្ងៃទី៦ ខែឧសភា ដែលលោកទទួលបាននៅថ្ងៃទី៧ ខែដដែល បានហៅគាត់ឱ្យចូលទៅបំភ្លឺនៅថ្ងៃពុធនេះ។
ការចេញដីកាកោះហៅនេះ ក្រោយមេធាវីចំនួន៦រូប តំណាងឱ្យគណបក្សប្រជាជនកម្ពុជាខេត្តកោះកុង បានប្ដឹងលោក ប៉ាល់ កែប ជាលេខាធិការគណបក្សភ្លើងទៀនប្រចាំខេត្តកោះកុង និងជាបេក្ខភាពចៅសង្កាត់ស្ទឹងវែង ក្រុងខេមរភូមិន្ទ និងគូកន ក្រោមបទចោទរួមមាន ក្លែងឯកសារសាធារណៈ បង្កភាពវឹកវរធ្ងន់ធ្ងរដល់សន្តិសុខជាតិ បទបរិហារកេរ្តិ៍ជាសាធារណៈ និងការឃោសនាបោះឆ្នោតផ្ទុយនឹងច្បាប់។
បេក្ខភាពចៅសង្កាត់ស្ទឹងវែង មកពីគណបក្សភ្លើងទៀន ខេត្តកោះកុង លោក ប៉ាល់ កែប អះអាងបន្ថែមថា ការដាក់ស្នើសុំតុលាការពន្យារនេះ ដោយសារលោកមានពេលតិចពេក ម្យ៉ាងមិនទាន់មានមេធាវីការពារក្ដីនៅឡើយ។
លោក ប៉ាល់ កែប ថា៖ «ខ្ញុំបានដាក់លិខិតពន្យារពេល ព្រោះតុលាការ ខាងអយ្យការ បានកោះហៅឱ្យចូលទៅឆ្លើយបំភ្លឺនៅថ្ងៃទី១១ ខែឧសភា ត្រូវថ្ងៃហ្នឹង! តែដោយខ្ញុំទទួលបានដីកានៅថ្ងៃទី៧ ហើយគេកោះហៅឱ្យចូលថ្ងៃទី១១ ពេលវេលាវាខ្លី ហើយខ្ញុំអត់ទាន់រកមេធាវីបាន។ អ៊ីចឹងកាលពីថ្ងៃទី៩នោះ ខ្ញុំបានដាក់សំបុត្រចូលទៅអយ្យការហើយ សុំពន្យារពេល ដើម្បីមានពេលរកមេធាវី ក្នុងការចូលឆ្លើយបំភ្លឺនូវពាក្យបណ្ដឹងរបស់គណបក្សប្រជាជនកម្ពុជាខេត្តកោះកុងហ្នឹង»។
បើតាមលោក ប៉ាល់ កែប មន្ត្រីតុលាការបានទទួលលិខិតរបស់លោក ដោយបានចុះលេខនិងបោះត្រារួចហើយ ខណៈលោកថា ការស្នើពន្យារពេលចូលរួមសវនាការនេះ គឺរហូតទាល់តែលោករកពឹងពាក់មេធាវីការពារក្តីតាមច្បាប់បាន។
សកម្មជនបក្សភ្លើងទៀននៅខេត្តកោះកុង វ័យ៣០ឆ្នាំរូបនេះ នៅតែចាត់ទុកការចោទប្រកាន់របស់តំណាងបក្សកាន់អំណាច ថាជាចេតនានយោបាយ ដោយបារម្ភពីប្រជាប្រិយភាពរបស់លោក ទើបធ្វើទុក្ខបុកម្នេញ មិនឱ្យលោកប្រកួតប្រជែងជាមួយពួកគេបាន។ លោកនៅតែអះអាងថាមិនបានធ្វើខុសដូចការចោទប្រកាន់ឡើយ ខណៈលោកគ្រាន់តែចុះជួបសួរសុខទុក្ខពលរដ្ឋនៅមូលដ្ឋាន ដើម្បីដឹងពីទុក្ខលំបាកប៉ុណ្ណោះ។
យ៉ាងណា លោកបង្ហាញសុទិដ្ឋិនិយមថា នឹងបន្តការងារជាធម្មតា មិនរត់គេច និងមិនភិតភ័យឡើយ៕