គណបក្សភ្លើងទៀន គ្រោងហែក្បួនឃោសនាបោះឆ្នោតក្នុងទ្រង់ទ្រាយធំនៅរាជធានីភ្នំពេញ នៅថ្ងៃសៅរ៍ ទី២១ ខែឧសភា ដែលជាថ្ងៃដំបូងនៃការបើកយុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២នេះ។
យោងតាមលិខិតអំពាវនាវរបស់គណបក្សភ្លើងទៀន ចេញផ្សាយនៅថ្ងៃទី១៨ ខែឧសភា ឆ្នាំ២០២២នេះ បានឱ្យដឹងថា គណបក្សនេះមានគម្រោងជួបជុំអ្នកគាំទ្រហែក្បួនពេញមួយថ្ងៃ នៅទីតាំងចំនួន២ផ្សេងគ្នា ក្នុងនោះ នឹងជួបជុំគ្នានៅម៉ោង៧ព្រឹក នៅចំណុចបណ្ដោយផ្លូវ៣០ម៉ែត្រ ស្ថិតនៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ និងនៅវេលាម៉ោង២រសៀល គណបក្សនេះគ្រោងនឹងបន្តជួបជុំគ្នានៅមហាវិថីអង្គរ ជិតរង្វង់មូលកាំកូស៊ីធី ក្នុងខណ្ឌទួលគោក។
លិខិតអំពាវនាវដដែលបន្តថា៖ «គណបក្សភ្លើងទៀន រាជធានីភ្នំពេញ សូមអំពាវនាវដល់បងប្អូនប្រជាពលរដ្ឋខ្មែររស់នៅក្នុងភូមិសាស្ត្ររាជធានីភ្នំពេញទាំងអស់ ដែលមានគោលជំហរស្រឡាញ់គាំទ្រនូវគោលនយោបាយរបស់គណបក្សភ្លើងទៀន ចង់ឃើញប្រទេសកម្ពុជាមានការគោរពសិទ្ធិមនុស្សពេញលេញ លើកតម្កើងលទ្ធិប្រជាធិបតេយ្យសេរី និងយុត្តិធម៌សង្គមដោយពិតប្រាកដ ចូលរួមហែក្បួនជាមួយនឹងក្បួនដង្ហែរបស់គណបក្សភ្លើងទៀននៅរាជធានីភ្នំពេញឱ្យបានច្រើនកុះករ»។
យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ មានរយៈពេល១៤ថ្ងៃ ដោយចាប់ផ្តើមពីថ្ងៃទី២១ ខែឧសភា ដល់ថ្ងៃទី៣ ខែមិថុនា ឆ្នាំ២០២២។
ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥នេះ មានគណបក្សនយោបាយចំនួន១៧ចូលរួម ហើយក្នុងនោះមានតែគណបក្សប្រជាជនកម្ពុជាមួយប៉ុណ្ណោះ ដែលបានដាក់បេក្ខជនឈរឈ្មោះនៅគ្រប់ឃុំសង្កាត់ទាំង១ ៦៥២ ខណៈគណបក្សភ្លើងទៀនបានដាក់បេក្ខជនឈរឈ្មោះស្ទើរតែគ្រប់ឃុំសង្កាត់គឺ ១ ៦២៣ឃុំសង្កាត់ ដែលសល់ពី គ.ជ.ប លុបឈ្មោះចេញ។
ពាក់ព័ន្ធនឹងយុទ្ធនាការឃោសនាបោះឆ្នោតដែលនឹងចាប់ផ្តើមនៅចុងសប្តាហ៍នេះដែរ គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីអំពាវនាវមួយដល់គណបក្សនយោបាយ បេក្ខជន និងអ្នកគាំទ្រគណបក្សនយោបាយទាំងអស់ ត្រូវគោរពតាមវិធាន បទប្បញ្ញត្តិ និងគោលការណ៍ដែលមានចែងក្នុងច្បាប់ស្តីពីការបោះឆ្នោតក្រុមប្រឹក្សាឃុំសង្កាត់ ដើម្បីឱ្យការឃោសនាបោះឆ្នោតប្រព្រឹត្តទៅដោយសន្តិវិធី សន្តិសុខ សុវត្ថិភាព និងអហិង្សា។
ជាមួយគ្នានោះដែរ គ.ជ.ប ក៏បានអំពាវនាវដល់អាជ្ញាធរដែនដី ត្រូវប្រកាន់ជំហរអព្យាក្រឹត្យ ឥតលម្អៀងក្នុងសកម្មភាពការងាររបស់ខ្លួន និងត្រូវសម្របសម្រួលទីកន្លែង ផ្លូវ ពេលវេលា ដើម្បីឱ្យគណបក្សនយោបាយនីមួយៗអាចអនុវត្តកម្មវិធីឃោសនាបោះឆ្នោត និងការហែក្បួនឃោសនាបោះឆ្នោតរបស់ខ្លួនប្រព្រឹត្តទៅដោយស្មើភាពគ្នា៕