តុលាការខេត្តប៉ៃលិន បានចេញដីកាកោះហៅប្រធានក្រុមការងារគណបក្សភ្លើងទៀន ១រូប ប្រចាំខេត្តនេះ ជាលើកទី៣ ដើម្បីចូលឆ្លើយបំភ្លឺពាក់ព័ន្ធសំណុំរឿង «ញុះញង់» ប៉ុន្តែមន្ត្រីបក្សក្រៅរដ្ឋាភិបាលមួយនេះបន្តចាត់ទុកការកោះហៅនោះ ថាជារឿងនយោបាយច្រើនជាងការអនុវត្តច្បាប់។
ក្នុងដីកាកោះហៅជាលើកទី៣ ចុះថ្ងៃទី១១ ខែឧសភា របស់ព្រះរាជអាជ្ញារងអយ្យការអមសាលាដំបូងខេត្តប៉ៃលិន លោក ជា សា បានតម្រូវឱ្យលោក ខឹម មុនីកុសល ចូលបំភ្លឺនៅតុលាការនាព្រឹកថ្ងៃទី២៦ ខែឧសភា ឆ្នាំ២០២២ ដើម្បីសាកសួររឿង «ញុះញង់ឱ្យមានការរើសអើង» ដែលប្រព្រឹត្តទៅនៅមន្ទីរ ឬស្នាក់ការបក្សខេត្តប៉ៃលិន។
អតីតមន្ត្រីសុខាភិបាលជាន់ខ្ពស់នៃមន្ទីរសុខាភិបាលខេត្តប៉ៃលិន និងបច្ចុប្បន្នជាប្រធានក្រុមការងារគណបក្សភ្លើងទៀនខេត្តប៉ៃលិន លោក ខឹម មុនីកុសល បានអះអាងនៅថ្ងៃចន្ទនេះថា លោកទើបបានទទួលដីកាកោះហៅជាលើកទី៣ នៅព្រឹកថ្ងៃទី២៣ ខែឧសភានេះ។
លោកបញ្ជាក់ថា នឹងពិភាក្សាជាមួយមេធាវីថាតើនឹងត្រូវចូលខ្លួនបំភ្លឺតាមដីកា ឬធ្វើយ៉ាងណាបន្តទៀត។
បែបនេះក្តី លោកបង្ហាញការខកចិត្តដែលតុលាការចេញដីកាឱ្យចូលខ្លួនក្នុងចន្លោះពេលវេលាដ៏មមាញឹកនិងប្រថុចញុច ដែលមិនអាចត្រៀមខ្លួនទាន់ពេលវេលា។
ប្រធានគណបក្សភ្លើងទៀនខេត្តជាប់ព្រំដែនថៃរូបនេះ បន្តចាត់ទុកដីកាកោះជាលើកទី៣នេះ ថាមានចេតនារារាំងមិនឱ្យលោកធ្វើសកម្មភាពនយោបាយច្រើនជាងការអនុវត្តច្បាប់ ដោយសារឃើញសន្ទុះនៃការគាំទ្ររបស់ពលរដ្ឋកាន់តែច្រើនលើបក្សប្រឆាំងមួយនេះ ស្របពេលយុទ្ធនាការឃោសនាបោះឆ្នោតឃុំ-សង្កាត់កំពុងដំណើរការ។
លោក ខឹម មុនីកុសល មានប្រសាសន៍ថា៖ «[ដីកាកោះនេះ] មិនមានអីទេ គ្រាន់តែថា [គេធ្វើ] ក្នុងបំណងមួយរារាំងកុំឱ្យខ្ញុំធ្វើសកម្មភាពនយោបាយតែប៉ុណ្ណឹង ហើយនិងចោទប្រកាន់ដើម្បីទម្លាក់កំហុសដែលមិនសមហេតុផលមកលើខ្ញុំហ្នឹង។ គឺសំខាន់តែនៅលើសកម្មភាពនយោបាយរបស់ខ្ញុំតែម្ដង! គេចង់បន្ទុចបង្អាក់ ឬក៏រារាំងតែម្តង»។
លោក ខឹម មុនីកុសល ត្រូវបានអភិបាលខេត្តប៉ៃលិន លោកស្រី បាន ស្រីមុំ បណ្ដេញចេញពីក្របខណ្ឌជាមន្ត្រីសុខាភិបាលនៃមន្ទីរសុខាភិបាលខេត្តនេះ កាលពីថ្ងៃទី១៩ ខែមីនា ឆ្នាំ២០២១ បន្ទាប់ពីលោកបានបង្ហោះសារនៅលើហ្វេសប៊ុករិះគន់មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កក្នុងស្នាក់ការគណបក្សប្រជាជនកម្ពុជាខេត្តប៉ៃលិន។
អតីតមន្ត្រីសុខាភិបាលរូបនេះត្រូវបានតុលាការខេត្តប៉ៃលិនកោះហៅឱ្យចូលខ្លួនទៅឆ្លើយបំភ្លឺលើកទី១ ក្នុងសំណុំរឿង២ផ្សេងគ្នា។ សំណុំរឿងទី១ តុលាការតម្រូវឱ្យលោកចូលឆ្លើយបំភ្លឺនៅថ្ងៃទី៨ ខែមេសា ដោយចោទពីបទ «បរិហារកេរ្តិ៍ជាសាធារណៈ» និងបទចោទមួយករណីទៀត ត្រូវចូលខ្លួនឆ្លើយបំភ្លឺនៅថ្ងៃទី២០ ខែមេសា ពីបទ «ញុះញង់ឱ្យមានការរើសអើង» ប៉ុន្តែត្រូវបានលោកស្នើសុំពន្យារពេល ក្រោមហេតុផលថាគ្មានពេលវេលាគ្រប់គ្រាន់ និងគ្មានមេធាវី។
ក្រោយមក កាលពីថ្ងៃទី២៦ ខែមេសា ព្រះរាជអាជ្ញារងអយ្យការអមសាលាដំបូងខេត្តប៉ៃលិន លោក ជា សា បានចេញដីកាកោះហៅជាលើកទី២ ដោយតម្រូវឱ្យលោក ខឹម មុនីកុសល ចូលបំភ្លឺនៅតុលាការនាព្រឹកថ្ងៃទី១១ ខែឧសភា ឆ្នាំ២០២២ ដើម្បីសាកសួររឿង «ញុះញង់ឱ្យមានការរើសអើង» ប៉ុន្តែលោកមិនបានចូលបំភ្លឺឡើយ ដោយសារមេធាវីការពារក្តីរបស់ខ្លួនជាប់រវល់ ហើយមេធាវីក៏ស្នើសុំតុលាការពន្យារពេលដោយឯងផងដែរ៕
