គណៈកម្មាធិការជាតិរៀបចំការបោះឆ្នោត (គ.ជ.ប) ណែនាំគណបក្សនយោបាយ និងបេក្ខជនដែលកំពុងធ្វើយុទ្ធនាការឃោសនាបោះឆ្នោត មិនត្រូវធ្វើសកម្មភាពទិញទឹកចិត្តអ្នកបោះឆ្នោត តាមរយៈការផ្ដល់ជាថវិកា សម្ភារ ឬមធ្យោបាយផ្សេងៗ រួមនឹងការចៀសវាងនូវសកម្មភាពមួយចំនួនទៀតដែលផ្ទុយនឹងបទប្បញ្ញតិ្តនៃច្បាប់។
សេចក្ដីណែនាំរបស់ គ.ជ.ប ស្ដីពី «ការធ្វើសកម្មភាពឃោសនារបស់គណបក្សនយោបាយ ឬ/និងបេក្ខជនឈរឈ្មោះសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់» នៅថ្ងៃពុធនេះ បានលើកឡើងថា ក្នុងរយៈពេលប៉ុន្មានថ្ងៃដំបូងនៃការចាប់ផ្ដើមយុទ្ធនាការបោះឆ្នោត គណបក្សនយោបាយដែលបានចុះបញ្ជីបេក្ខជនឈរឈ្មោះបោះឆ្នោតទាំងអស់បានធ្វើសកម្មភាពឃោសនាតាមមណ្ឌលបោះឆ្នោតរៀងៗខ្លួនតាមលទ្ធភាព ស្របតាមកម្មវិធីដែលបានកំណត់ និងក្នុងបរិយាកាសមានសន្តិសុខ សុវត្ថិភាព និងសណ្ដាប់ធ្នាប់សាធារណៈ គ្មានអំពើហិង្សា និងគ្មានការគំរាមកំហែង។
តែយ៉ាងណា គ.ជ.ប បានកត់សម្គាល់ឃើញនូវសកម្មភាពមិនត្រឹមត្រូវមួយចំនួនរបស់គណបក្សនយោបាយ ដែលអាចនាំឱ្យបំពានលើបទប្បញ្ញត្តិនៃច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់ និងបទបញ្ជានិងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២។
ករណីនេះ គ.ជ.ប បានណែនាំដល់គណបក្សនយោបាយ និងបេក្ខជនទាំងអស់ មិនត្រូវធ្វើការឃោសនា ឬផ្សព្វផ្សាយរូបភាព ឬវីដេអូ ឬសំឡេង ឬសារនយោបាយដែលមានលក្ខណៈជេរប្រមាថជាសាធារណៈចំពោះគណបក្សនយោបាយណាមួយ ឬបេក្ខជនឈរឈ្មោះ ឬញុះញង់ឱ្យមានការរើសអើង ឬបញ្ឆេះកំហឹង ឬធ្វើឱ្យមានការភ័ន្តច្រឡំនាំឱ្យបាត់ទំនុកចិត្តលើការបោះឆ្នោតគ្រប់មធ្យោបាយ។ ជនណា ឬគណបក្សណាដែលបានបំពានបទប្បញ្ញត្តិទាំងនេះ នឹងត្រូវទទួលពិន័យតាមច្បាប់។
គ.ជ.ប បានណែនាំទៀតថា៖ «មិនត្រូវធ្វើសកម្មភាពទិញទឹកចិត្តអ្នកបោះឆ្នោត តាមរយៈការផ្ដល់មធ្យោបាយជាថវិកា សម្ភារ បរិក្ខារ ឬមធ្យោបាយផ្សេងៗ»។
ក្រៅពីនេះ គ.ជ.ប ក៏ណែនាំមិនឱ្យលើកស្លាកឬបដាកាត់ទទឹងថ្នល់ ឬប្រើប្រាស់សម្ភារឯកសារដែលផ្ទុយនឹងស្មារតីច្បាប់ ដែលត្រូវបានហាមឃាត់ដោយគ.ជ.ប និងត្រូវជូនដំណឹងយ៉ាងតិច៣ថ្ងៃទៅគណៈកម្មការឃុំសង្កាត់រៀបចំការបោះឆ្នោតមុនថ្ងៃធ្វើការហែក្បួនឃោសនា និងត្រូវគោរពតាមការណែនាំរបស់អាជ្ញាធរមានសមត្ថកិច្ច ព្រមទាំងត្រូវគោរពឱ្យបានខ្ជាប់ខ្ជួននូវច្បាប់ បទបញ្ជា និងនីតិវិធីនៃការបោះឆ្នោត។
ការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់មានរយៈពេល១៤ថ្ងៃ គិតចាប់ពីថ្ងៃទី២១ ខែឧសភា ដល់ថ្ងៃទី០៣ ខែមិថុនា ឆ្នាំ២០២២ ហើយគ្រប់សកម្មភាពឃោសនាត្រូវបញ្ឈប់ត្រឹម២៤ម៉ោង មុនថ្ងៃបោះឆ្នោត។ ចំណែកការបោះឆ្នោតនឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២៕
