បេក្ខភាពមេឃុំគណបក្សភ្លើងទៀនមួយរូបនៅខេត្តកំពង់ចាម បានប្ដឹងទៅកាន់គណៈកម្មាធិការជាតិរៀបចំការបោះឆ្នោត (គ.ជ.ប) ក្រោយគណៈកម្មការរៀបចំការបោះឆ្នោតខេត្តកំពង់ចាមសម្រេចពិន័យរូបលោកចំនួន៥លានរៀល ពាក់ព័ន្ធនឹងបណ្ដឹងរបស់តំណាងគណបក្សប្រជាជនកម្ពុជា។
តាមរយៈពាក្យបណ្ដឹងរបស់បេក្ខភាពបក្សប្រឆាំង លោក គង់ រ៉ៃយ៉ា ចុះថ្ងៃទី៣០ ខែឧសភា ឆ្នាំ២០២២ ឱ្យដឹងថា ការប្ដឹងទាស់នេះ ក្រោមហេតុផលថាលោកមិនសុខចិត្តនឹងសេចក្ដីសម្រេចរបស់គណៈកម្មការរៀបចំការបោះឆ្នោតខេត្តកំពង់ចាម។
បេក្ខភាពគណបក្សភ្លើងទៀនឃុំស្ដៅ ស្រុកកងមាស ខេត្តកំពង់ចាម និងជាអតីតអ្នកជាប់ឃុំមនសិការ លោក គង់ រ៉ៃយ៉ា ប្រាប់វីអូឌីថា វាជារឿងអយុត្តិធម៌ ដែលលោកគ្រាន់តែចែកថវិកា សម្ភារ អាវ មួក ជាដើម ដល់បេក្ខជនបក្សភ្លើងទៀនតំណាងឃុំក្នុងស្រុករបស់លោក ដើម្បីឱ្យពួកគាត់យកទៅប្រើប្រាស់ក្នុងការឃោសនារកសំឡេងឆ្នោតសោះ បែរជារងការផាកពិន័យដល់ទៅ៥លានរៀលទៅវិញ។
លោកថា បណ្តឹងរបស់តំណាងបក្សកាន់អំណាចបានរំខានដល់លោកនិងបេក្ខជនរបស់បក្សភ្លើងទៀនទាំង១១ឃុំ ខកខានការឃោសនាជាច្រើនថ្ងៃ។
លោកថា៖ «ការដាក់បណ្ដឹងនេះ ខ្ញុំមិនត្រូវការចាញ់-ឈ្នះអីទេ! ប៉ុន្តែខ្ញុំគ្រាន់តែចង់ឱ្យគណៈកម្មាធិការជាតិរៀបចំការបោះឆ្នោតលុបនូវការផាកពិន័យលើរូបខ្ញុំចំនួន៥លានរៀលហ្នឹង»។
គណៈកម្មការរៀបចំការបោះឆ្នោតខេត្តកំពង់ចាម បានសម្រេចផាកពិន័យលោក គង់ រ៉ៃយ៉ា ប្រធានគណបក្សភ្លើងទៀនឃុំស្ដៅ ចំនួន៥លានរៀល ស្របតាមមាត្រា១៧១ និងមាត្រា១៨១ ស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់។
សេចក្តីសម្រេចនេះបានធ្វើឡើងនៅថ្ងៃទី២៨ ខែឧសភា តាមបណ្តឹងរបស់លោក នៅ រក្សា មេធាវីតំណាងដោយអាណត្តិរបស់គណបក្សប្រជាជនកម្ពុជា ដែលប្តឹងជំទាស់សកម្មភាពចែកថវិកានិងអំណោយរបស់លោក គង់ រ៉ៃយ៉ា ទៅដល់បេក្ខជនទាំង១១ឃុំ ក្នុងស្រុកកងមាស ខេត្តកំពង់ចាម។
ពាក្យបណ្តឹងនេះក៏ប្តឹងទាមទារឱ្យដកបេក្ខភាពពីគណបក្សភ្លើងទៀនទាំង១១ឃុំ ក្នុងស្រុកកងមាស ចេញបញ្ជីបោះឆ្នោតផងដែរ។ ក៏ប៉ុន្តែសេចក្តីសម្រេចរបស់គណៈកម្មការរៀបចំការបោះឆ្នោតខេត្តកំពង់ចាម មិនបានសម្រេចតាមការទាមទារនេះទេ ដោយរក្សាសិទ្ធិបោះឆ្នោត និងរក្សាឈ្មោះក្នុងបញ្ជីរបស់បេក្ខជនគណបក្សភ្លើងទៀន ចំនួន១៥នាក់ ឱ្យនៅដដែល។ សេចក្តីសម្រេចនេះបានបើកផ្លូវឱ្យលោក គង់ រ៉ៃយ៉ា ប្តឹងជំទាស់ទៅកាន់គណៈកម្មាធិការជាតិរៀបចំការបោះឆ្នោត (គ.ជ.ប) តាមកំណត់នៃច្បាប់។
លោក គង់ រ៉ៃយ៉ា ដែលជាប្រធានក្រុមទ្រទ្រង់ស្រុកកងមាស និងជាប្រធានគណបក្សភ្លើងទៀនឃុំស្ដៅ ត្រូវបានតំណាងគណបក្សប្រជាជនកម្ពុជា អ្នកស្រី ជឹន ដាវី ប្ដឹងពាក់ព័ន្ធនឹងការបង្ហោះវីដេអូចែកថវិកាទៅឱ្យបេក្ខភាពជាមេឃុំ ក្នុងស្រុកកងមាស ទាំង១១ឃុំ ដោយក្នុងមួយឃុំចំនួន១០០ដុល្លារ។
លោក គង់ រ៉ៃយ៉ា អះអាងថា ការចែកថវិកាកាលពីថ្ងៃទី២១ ខែឧសភា ទៅបេក្ខភាពគណបក្សភ្លើងទៀន ក្នុងឃុំនីមួយៗ ចំនួន១០០ដុល្លារ មិនមែនជាការទិញទឹកចិត្តអ្នកគាំទ្រនោះទេ ប៉ុន្តែថវិកានេះសម្រាប់ការចំណាយអំឡុងពេលឃោសនាបោះឆ្នោតរបស់គណបក្សតាមឃុំនីមួយៗតែប៉ុណ្ណោះ៕
