គណៈកម្មាធិការជាតិរៀបចំការបោះឆ្នោត (គ.ជ.ប) បានណែនាំដល់គណបក្សនយោបាយ បេក្ខជន និងប្រជាពលរដ្ឋ ចូលរួមរក្សាសន្តិសុខ សុវត្ថិភាព និងសណ្ដាប់ធ្នាប់ សម្រាប់យុទ្ធនាការឃោសនា និងការបោះឆ្នោតជ្រើសរើសក្រុមប្រឹក្សាឃុំសង្កាត់ ដោយមិនត្រូវកៀរគរនិងប្រមូលកម្លាំងចល័តដែលបង្កចលាចលណាមួយឡើយ។
ក្នុងសេចក្ដីណែនាំរបស់គណៈកម្មាធិការជាតិរៀបចំការបោះឆ្នោត ចុះថ្ងៃទី១ ខែមិថុនា ឆ្នាំ២០២២ បានលើកឡើងថា ដើម្បីធានាឱ្យដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់ ប្រព្រឹត្តទៅដោយរលូន គ្មានអំពើហិង្សា និងគ្មានការគំរាមកំហែងនោះ គ.ជ.ប ណែនាំដល់គណបក្សនយោបាយ ឬ/និងបេក្ខជន មិនត្រូវធ្វើសកម្មភាពកៀរគរ ប្រមូលកម្លាំងពីរាជធានីខេត្តណាមួយទៅធ្វើសកម្មភាពនៅរាជធានីឬខេត្តផ្សេង ក្នុងចេតនាបង្កចលាចល អសន្ដិសុខសង្គម ដើម្បីបំផ្លាញយុទ្ធនាការឃោសនាបោះឆ្នោតនិងការបោះឆ្នោតនោះឡើយ។
គ.ជ.ប បន្ដថា៖ «គណបក្សនយោបាយ ឬ/និងបេក្ខជន និងប្រជាពលរដ្ឋ ត្រូវចូលរួមក្នុងកិច្ចការពារ ថែរក្សាបរិយាកាសសន្ដិសុខ សម្រាប់យុទ្ធនាការឃោសនា និងការបោះឆ្នោតឱ្យបានល្អប្រសើរ ដោយមិនត្រូវធ្វើសកម្មភាពណាមួយដែលផ្ទុយពីគោលការណ៍នៃច្បាប់បោះឆ្នោត បទបញ្ជា និងនីតិវិធីនៃការបោះឆ្នោត ក្រមសីលធម៌សម្រាប់គណបក្សនយោបាយ និងបេក្ខជនក្នុងដំណើរការបោះឆ្នោត និងលិខិតបទដ្ឋានគតិយុត្តពាក់ព័ន្ធផ្សេងៗជាធរមាន»។
បើតាមសេចក្ដីណែនាំនេះ គ.ជ.ប សង្ឃឹមថា គណបក្សនយោបាយ បេក្ខជន ប្រជាពលរដ្ឋ អាជ្ញាធរមានសមត្ថកិច្ច និងគណៈកម្មការរៀបចំការបោះឆ្នោតគ្រប់លំដាប់ថ្នាក់ នឹងមានការចូលរួមសហការល្អ ដើម្បីបង្កបរិយាកាសស្ងប់ស្ងាត់ គ្មានអំពើហិង្សា គ្មានការគំរាមកំហែង និងមានសុវត្ថិភាព សម្រាប់ការបោះឆ្នោតក្រុមប្រឹក្សាឃុំសង្កាត់នេះ។
គួរម្លឹកផងដែរថា ការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ ប្រព្រឹត្តទៅចាប់ពីថ្ងៃទី២១ ខែឧសភា ដល់ថ្ងៃទី០៣ ខែឧសភា ឆ្នាំ២០២២ ខណៈការបោះឆ្នោតនឹងប្រព្រឹត្តទៅនៅថ្ងៃទី៥ ខែមិថុនា ចុងសប្តាហ៍នេះ៕
