គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានឱ្យដឹងថា មុនបោះឆ្នោតមួយថ្ងៃ រហូតមកដល់ថ្ងៃចន្ទនេះ ស្ថាប័នជាតិមួយនេះ ទទួលបានជិត២០០បណ្ដឹងពីគណបក្សនយោបាយមួយចំនួន ពាក់ព័ន្ធនឹងភាពមិនប្រក្រតី ជុំវិញការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ អាណត្តិទី៥នេះ។
អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ថា ចាប់ពីថ្ងៃទី៤ ខែមិថុនា មុនបោះឆ្នោតមួយថ្ងៃ រហូតមកដល់ថ្ងៃទី១៣ ខែមិថុនានេះ គណៈកម្មាធិការជាតិរៀបចំការបោះឆ្នោត ទទួលបានបណ្ដឹងពាក់ព័ន្ធនឹងភាពមិនប្រក្រតីមុន អំឡុងពេល និងក្រោយពេលបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ ចំនួនជិត២០០បណ្ដឹង (១៩២)។
លោក ហង្ស ពុទ្ធា បញ្ជាក់ថា គណបក្សនយោបាយដែលដាក់បណ្តឹងមកនោះ រួមមាន គណបក្សប្រជាជនកម្ពុជា, គណបក្សភ្លើងទៀន និងគណបក្សប្រជាធិបតេយ្យមូលដ្ឋាន។
លោក ហង្ស ពុទ្ធា អះអាងថា ស្ថាប័ន គ.ជ.ប រួមទាំងថ្នាក់ជាតិ និងថ្នាក់ក្រោមជាតិ កំពុងយកចិត្តទុកដាក់ដោះស្រាយបណ្តឹងរបស់គណបក្សនយោបាយទាំងនោះឱ្យបានចប់អស់ត្រឹមថ្ងៃទី២៥ ខែមិថុនា ខណៈការប្រកាសលទ្ធផលបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ផ្លូវការ នៅថ្ងៃទី២៦ ខែមិថុនានេះ។
លោកមានប្រសាសន៍ថា៖ «ឥលូវនៅដោះស្រាយត្រឹមថ្នាក់ខេត្តនៅឡើយ ដោយច្បាប់ចែងថា ការដោះស្រាយបណ្តឹងនៅក្រោយថ្ងៃបោះឆ្នោត គឺក្នុងពេលវេលាសមស្រប។ អ៊ីចឹងយ៉ាងហោចមុនថ្ងៃប្រកាសលទ្ធផលផ្លូវការ គឺដោះស្រាយអស់ហើយ»។
អ្នកនាំពាក្យគណបក្សភ្លើងទៀន លោក ថាច់ សេដ្ឋា មានប្រសាសន៍ថា គណបក្សរបស់លោកបានដាក់ពាក្យបណ្ដឹងទៅគណៈកម្មការធិការរៀបចំការបោះឆ្នោតនៅថ្នាក់ក្រោមជាតិ ចំនួន១០១ពាក្យបណ្តឹង ពាក់ព័ន្ធភាពមិនប្រក្រតី មុនថ្ងៃបោះឆ្នោត ថ្ងៃបោះឆ្នោត និងពេលរាប់សន្លឹកឆ្នោត នៅតាមមណ្ឌលក្នុងបណ្តារាជធានី-ខេត្តមួយចំនួន។
លោកថា ភាពមិនប្រក្រតីទាំងនោះ ដូចជា មានអាជ្ញាធរឈរឃ្លាំមើល និងកត់ឈ្មោះពលរដ្ឋនៅមុខការិយាល័យបោះឆ្នោត មានការគំរាមកំហែង ការសម្លុត និងការធ្វើទុក្ខបុកម្នេញលើបេក្ខជនឈរឈ្មោះរបស់គណបក្សភ្លើងទៀន ជាដើម។
បើទោះបីជាបក្សក្រៅរដ្ឋាភិបាលមួយនេះដាក់ពាក្យបណ្តឹងទៅស្ថាប័នរៀបចំការបោះឆ្នោតក្តី ប៉ុន្តែសម្រាប់លោក ថាច់ សេដ្ឋា ហាក់មិនមានជំនឿលើចំណាត់ការរបស់មន្ត្រី គ.ជ.ប ក្នុងការដោះស្រាយជូនគណបក្សភ្លើងទៀនឱ្យទទួលបានតម្លាភាពនិងយុត្តិធម៌នោះទេ។
លោកមានប្រសាសន៍ថា៖ «រឿងចាក់សោ បិទទ្វាររាប់សន្លឹកឆ្នោត គេធ្វើជាប្រព័ន្ធតែម្តង! អ៊ីចឹងគ្រាន់តែយើងចង់បង្ហាញថា ភាពមិនប្រក្រតី វាកើតឡើងពិតប្រាកដមែនទែន។ បើសង្ឃឹមថាឱ្យដោះស្រាយបានពេញចិត្តពេញថ្លើមទៅតាមអ្វីដែលជាក់ស្តែង វាមិនអាចទេ។ មែនទែនទៅ ការដោះស្រាយវិវាទទាំងអស់ហ្នឹង ខ្ញុំមិនសូវជាសង្ឃឹមប៉ុន្មានទេ»។
ក្នុងសន្និសីទសារព័ត៌មាននៅទីស្នាក់ការគណបក្សរបស់ខ្លួននៅខណ្ឌដង្កោ រាជធានីភ្នំពេញ កាលពីដើមសប្តាហ៍មុន ប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ បានថ្លែងប្រហាក់ប្រហែលនឹងលោក ថាច់ សេដ្ឋា ដែរ ពាក់ព័ន្ធនឹងភាពមិនប្រក្រតីជុំវិញការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥នេះ ។
លោកបញ្ជាក់ថា បច្ចុប្បន្ន គណបក្សនេះបានដាក់ពាក្យបណ្តឹងជិត១០បណ្តឹង ទៅគណៈកម្មាធិការជាតិរៀបចំការបោះឆ្នោត (គ.ជ.ប) ឱ្យជួយដោះស្រាយជាបណ្តើរៗហើយ ខណៈគណបក្សនេះកំពុងបន្តប្រមូលភស្តុតាង ដើម្បីដាក់ពាក្យបណ្តឹងបន្ថែមទៀត។
ជាមួយគ្នានេះដែរ លោក យ៉េង វីរៈ ក៏បានអំពាវនាវទៅគណបក្សនយោបាយផ្សេងៗទៀតដែលរកឃើញភាពមិនប្រក្រតីនៅអំឡុងពេលបោះឆ្នោត អាចសហការជាមួយគណបក្សនេះ ក្នុងការដាក់ពាក្យបណ្តឹងរួមគ្នាទៅស្ថាប័ន គ.ជ.ប ដើម្បីជំរុញឱ្យមានកំណែទម្រង់ ឬធ្វើវិសោធនកម្មច្បាប់បោះឆ្នោតនៅកម្ពុជាផងដែរ។
យ៉ាងណា នាយកប្រតិបត្តិអង្គការនិកហ្វិច លោក សំ គន្ធាមី សង្កេតឃើញថា ការសម្រេចសេចក្តីរបស់ គ.ជ.ប ជុំវិញការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីអាណត្តិមុនៗ គឺគណបក្សនយោបាយខ្លះមិនព្រមទទួលយកនោះទេ ដោយថា ការសម្រេចនោះមិនមានតម្លាភាពនិងយុត្តិធម៌ឡើយ។
ករណីនេះ លោកជំរុញទៅ គ.ជ.ប ធ្វើការកាត់សេចក្តីជាសាធារណៈ និងអនុញ្ញាតឱ្យមានភាគីសង្គមស៊ីវិល អ្នកឯករាជ្យ និងគូភាគី បានចូលរួមបំភ្លឺ និងឃ្លាំមើលក្នុងដំណើរកាត់សេចក្ដី ដើម្បីឱ្យការសម្រេចនោះមានតម្លាភាពនិងយុត្តិធម៌។
លោកមានប្រសាសន៍ថា៖ «សុំឱ្យគាត់ធ្វើឱ្យបានត្រឹមត្រូវតាមច្បាប់ យកល្អធ្វើជាសាធារណៈ មានអ្នកសង្កេតការណ៍ចូលមើលផង បើមិនអ៊ីចឹងសវនាការបិទទ្វារ វាពិបាក វាអត់មានអ្នកសង្កេតការណ៍ក្នុងដំណើរការដោះស្រាយ។ យើងចង់ឱ្យសង្គមស៊ីវិល អ្នកសង្កេតការណ៍យើង ជាតិ-អន្តរជាតិក៏ដោយ បើសិនជាធ្វើទៅបាន ខ្ញុំចង់ឱ្យបើកអង្គជំនុំជម្រះជាសាធារណៈ ដើម្បីបានមើលនិងស្តាប់ទាំងអស់គ្នា ហើយភាគីពាក់ព័ន្ធផង ដើម្បីយើងវាយតម្លៃលើការសម្រេចថា វាមានយុត្តិធម៌ ឬមិនមានយុត្តិធម៌»។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះ មានគណបក្សនយោបាយចំនួន១៧បានចូលរួមប្រកួតប្រជែង ដោយបានដាក់បេក្ខជនក្រុមប្រឹក្សាឃុំ-សង្កាត់សរុប ៨៦ ០៩២នាក់ (ស្ត្រី ២៧ ៨១៣នាក់) ខណៈសមាជិកក្រុមប្រឹក្សាឃុំ-សង្កាត់ដែលនឹងត្រូវជ្រើសរើសមកបម្រើការងារក្នុងឃុំ-សង្កាត់ទាំង១ ៦៥២ គឺមានចំនួន១១ ៦២២រូប៕