មន្ត្រីនគរបាលខេត្តកំពង់ចាមបានឱ្យដឹងថា ក្រុមការងារជំនាញកំពុងកសាងសំណុំរឿងបញ្ជូនទៅសាលាដំបូងខេត្តនេះ នៅថ្ងៃទី១៥ ខែមិថុនា ពាក់ព័ន្ធករណីក្រុមក្មេងទំនើងលួចទៅបំផ្លិចបំផ្លាញស្លាកសញ្ញាគណបក្សភ្លើងទៀនចំនួន២កន្លែងផ្សេងគ្នាក្នុងខេត្តនេះ ក្រោយការបោះឆ្នោតរួច។
អធិការនគរបាលស្រុកចំការលើ លោក ប៉ែន ទៀងចំរើន មានប្រសាសន៍ថា កាលពីថ្ងៃទី៦ និងថ្ងៃទី៧ ខែមិថុនា ក្រោយបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់មួយថ្ងៃ មានក្រុមក្មេងៗដែលជាអនីតិជនបានជិះម៉ូតូវាយផ្លាកសញ្ញាគណបក្សភ្លើងទៀនចំនួន២កន្លែងផ្សេងៗគ្នា រួមមាន ស្ថិតនៅភូមិបន្ទាយជ័យ និងភូមិពព្រេង ឃុំស្ពឺ ស្រុកចំការលើ ខេត្តកំពង់ចាម។
លោកបន្តថា ក្រោយពីប្រព្រឹត្តបទល្មើសរួច សមត្ថកិច្ចស្រាវជ្រាវរកឃើញមុខសញ្ញាចំនួនពីរនាក់ដែលមានអាយុ១២ និងអាយុ១៣ឆ្នាំ បានជិះម៉ូតូវាយផ្លាកសញ្ញាគណបក្សភ្លើងទៀនបណ្ដាលឱ្យខូចខាត។ ករណីនេះ លោកថា សមត្ថកិច្ចជំនាញកំពុងកសាងសំណុំរឿង ដើម្បីបញ្ជូនទៅតុលាការនាពេលឆាប់ៗនេះ ដើម្បីចាត់វិធានការច្បាប់បន្ត។
លោកមានប្រសាសន៍ថា៖ «សំណុំរឿងកំពុងបូកបញ្ជូនទៅតុលាការជិតរួចហើយ។ ចាំខ្ញុំបញ្ជូនហើយ ចាំបងសួរទៅខាងតុលាការល្អជាង។ ហើយស្អែក ឬខានស្អែក ខ្ញុំបញ្ជូនទៅហើយ»។
លោក ប៉ែន ទៀងចំរើន បន្ថែមថា សមត្ថកិច្ចជំនាញកំពុងតែស្រាវជ្រាវរកអ្នកពាក់ព័ន្ធផ្សេងទៀត ដើម្បីកសាងសំណុំរឿងបញ្ជូនទៅតុលាការចាត់វិធានការបន្ត ដូចករណីអនីតិជនទាំងនេះដែរ។
ប្រធានគណបក្សភ្លើងទៀនប្រចាំខេត្តកំពង់ចាម លោក ស៊យ ស៊ីថាត មានប្រសាសន៍ថា តាមលទ្ធផលបណ្តោះអាសន្ន គណបក្សក្រៅរដ្ឋាភិបាលមួយនេះប្រហែលជាប់ជាជំទប់ទី២ នៃគណបក្សភ្លើងទៀន ប្រចាំឃុំស្ពឺ ស្រុកចំការលើ ខេត្តកំពង់ចាម។
លោកថា ក្រោយថ្ងៃបោះឆ្នោតមួយថ្ងៃ គឺថ្ងៃទី៦ និងថ្ងៃទី៧ ខែមិថុនា ឆ្នាំ២០២២នេះ គាត់ទទួលបានព័ត៌មានថា មានក្រុមក្មេងទំនើងមួយក្រុមបាននាំគ្នាជិះម៉ូតូ ដៃកាន់ដាវ ដំបង និងដុំថ្ម វាយបំផ្លាញស្លាកសញ្ញាគណបក្សភ្លើងទៀន នៅភូមិបន្ទាយជ័យ និងភូមិពព្រេង ឃុំស្ពឺ ស្រុកចំការលើ ខេត្តកំពង់ចាម បណ្តាលឱ្យខូចខាតយ៉ាងខ្លាំង។
ករណីនេះ លោក ស៊ីថាត សម្រេចដាក់ពាក្យបណ្តឹងទៅសមត្ថកិច្ចមូលដ្ឋាន នៅថ្ងៃទី៧ ខែមិថុនានេះ ដើម្បីស្នើសុំឱ្យតុលាការស្រាវជ្រាវនិងចាត់វិធានការច្បាប់លើជនល្មើស រួមទាំងអ្នកពាក់ព័ន្ធផ្សេងទៀត ដោយលោកចាត់ទុកទង្វើបំផ្លិចបំផ្លាញស្លាកសញ្ញាគណបក្សនោះថា ជាសារគំរាមកំហែង និងការរើសអើងផ្នែកនយោបាយ។
លោកបញ្ជាក់ថា ទោះជាមានការបំផ្លិចបំផ្លាញស្លាកសញ្ញាគណបក្សភ្លើងទៀន និងគំរាមកំហែងយ៉ាងណា ប៉ុន្តែសម្រាប់លោកមិនមានអ្វីព្រួយបារម្ភទេ ព្រោះគណបក្សនេះបង្កើតឡើងស្របតាមច្បាប់ ហើយលោកមិនដែលចាត់ទុកបុគ្គលណាម្នាក់ជាសត្រូវនោះទេ។
លោកមានប្រសាសន៍ថា៖ «ខ្ញុំធ្វើនយោបាយ ខ្ញុំអត់មានត្រូវការហិង្សាទេ គឺខ្ញុំត្រូវការធ្វើម៉េចឱ្យយើងជាខ្មែរដូចគ្នា យើងចេះស្តាប់គ្នា ស្រឡាញ់គ្នា យើងធ្វើម៉េចធ្វើការដឹកនាំទាំងអស់គ្នា។ អ្នកណាចាញ់ធ្វើអ្នកប្រឆាំងទៅ អ្នកណាឈ្នះដឹកនាំទៅ អាហ្នឹងគោលការណ៍ប្រជាធិបតេយ្យ វាអ៊ីចឹង! ខ្ញុំអត់មានការព្រួយបារម្ភពីសុវត្ថិភាពទេ ពីព្រោះអត់មានអ្នកណាមកគំរាមកំហែងខ្ញុំទេ»។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា អាជ្ញាធរត្រូវធ្វើការស្រាវជ្រាវនិងកំណត់អត្តសញ្ញាណលើជនប្រព្រឹត្តឱ្យបានច្បាស់លាស់ បើជនដែលប្រព្រឹត្តនោះជាអនីតិជនក្រោមអាយុ១៤ឆ្នាំ តាមច្បាប់ មិនត្រូវទទួលខុសត្រូវផ្នែកព្រហ្មទណ្ឌ និងមិនអាចឃុំខ្លួនបាននោះទេ។ ប៉ុន្តែអាណាព្យាបាលរបស់ជនដែលប្រព្រឹត្តនោះ ត្រូវសងការខូចខាតផ្នែករដ្ឋប្បវេណីទៅដល់ជនរងគ្រោះ។
លោក អំ សំអាត ជំរុញទៅអាជ្ញាធរត្រូវពង្រឹងការអនុវត្តច្បាប់លើអ្នកដែលបំផ្លិចបំផ្លាញស្លាកសញ្ញារបស់គណបក្សនយោបាយទាំងអស់ឱ្យមានតម្លាភាពនិងស្មើភាពគ្នា ដោយមិនប្រកាន់និន្នាការនយោបាយ ទើបអាចទប់ស្កាត់បទល្មើសទាំងនោះមានប្រសិទ្ធភាព។
លោកស្នើដូច្នេះថា៖ «បើមិនអនុវត្តទេ បើសិនជានៅតែបន្តការបំផ្លិចបំផ្លាញតទៅទៀត វានាំឱ្យមានការរិះគន់ទាក់ទងនឹងការគំរាមកំហែង ឬបំភិតបំភ័យផ្សេងតទៅទៀត។ អាហ្នឹងហើយយើងចង់ឃើញអាជ្ញាធរអនុវត្តតាមផ្លូវច្បាប់ដោយតម្លាភាពនិងយុត្តិធម៌ មិនរើសអើងនិន្នាការគណបក្សនយោបាយណាមួយទេ ឱ្យតែបំផ្លិចបំផ្លាញ ទោះបីជាគណបក្សណាក៏ដោយ ត្រូវអនុវត្តតាមផ្លូវច្បាប់ឱ្យស្មើភាពគ្នា»៕
