យោងតាមអនុក្រឹត្យថ្មីមួយចំនួន រដ្ឋាភិបាលបានសម្រេចធ្វើឯកជនភាវូបនីយកម្មបឹងសាធារណៈ និងផ្លូវទឹក សរុបចំនួនប្រាំពីរក្នុងខេត្តកណ្ដាល ដែលក្នុងនោះរួមទាំងផ្ទៃបឹងតាមោកក្នុងរាជធានីភ្នំពេញផងដែរ។
ទាក់ទិននឹងករណីនេះ មេឃុំមួយរូបបានលើកឡើងពីគោលបំណងក្នុងការលាលែងចេញពីតំណែង ដោយសារតែលោកមិនអាចទ្រាំមើលរូបភាពនៃផ្ទៃបឹងដែលអាស្រ័យផលដោយពលរដ្ឋ ត្រូវបាត់ទៅបន្តិចម្ដងៗក្រោមការធ្វើឯកជនភាវូបនីយកម្ម។
មេឃុំឫស្សីជ្រោយ ស្រុកមុខកំពូល ខេត្តកណ្តាល លោក អ៊ុំ ឈុនស្រេង បានលើកឡើងថា៖ «វាគឺជាបឹងរបស់រដ្ឋ។ ហេតុអ្វីបានជាវាទៅជាយ៉ាងនេះទៅវិញ? យើងនៅថ្នាក់ក្រោម យើងមិនអាចដឹងអ្វីច្រើននោះទេ។ ហេតុអ្វីបានជាពួកគេដាក់វា [បឹង] ជារបស់ឯកជនទៅវិញ? តើពួកគេពិតជាអត់មានកន្លែងផ្សេងដើម្បីអភិវឌ្ឍឬយ៉ាងណា បានជាគេមកអភិវឌ្ឍលើផ្ទៃបឹងទៅវិញ?»
គួរបញ្ជាក់ថា ផ្ទៃដីមេទឹកបឹងជន្លេន ក្នុងឃុំឫស្សីជ្រោយ គឺជាដីរដ្ឋមួយក្នុងចំណោមដីរដ្ឋសរុបចំនួនប្រាំពីរផ្សេងទៀតនៅក្នុងខេត្តកណ្តាល ដែលត្រូវបានធ្វើឯកជនភាវូបនីយកម្មតាមរយៈអនុក្រឹត្យចុងក្រោយរបស់រដ្ឋាភិបាល។
ជាមួយគ្នានេះ លោក អ៊ុំ ឈុនស្រេង បន្ថែមថា៖ «ប្រសិនបើប្អូនមានលិខិតឬឯកសារកាត់ដីណាមួយ សូមជួយផ្ញើមកខ្ញុំផង ខ្ញុំនឹងបញ្ជូនវាបន្តទៅកាន់ប្រជាពលរដ្ឋរបស់ខ្ញុំ។ វាគឺជាបឹងរបស់ពលរដ្ឋ។ តើពួកគេអាចយកដីរបស់ពលរដ្ឋដែលពួកគេបានប្រើប្រាស់អាស្រ័យតាំងពីដូនតាមកដោយរបៀបណា? តើពួកគេមិនចង់ឱ្យមានផ្លូវទឹកហូរទេ ឬយ៉ាងណា? តើអ្នកណាសម្រេចចិត្តធ្វើការអភិវឌ្ឍលើបឹងនេះ?»
តាមរយៈឯកសារដែលទទួលបានដោយអ្នកសារព័ត៌មាន អនុក្រឹត្យទាំងអស់ត្រូវបានចុះហត្ថលេខាដោយលោកនាយករដ្ឋមន្ត្រី ហ៊ុន សែន ដែលបង្ហាញឱ្យឃើញពីការបន្តធ្វើឯកជនភាវូបនីយកម្មដីធ្លីទ្រង់ទ្រាយធំ ដែលរួមមានផ្ទៃបឹង និងដែនជម្រកសត្វព្រៃនៅទូទាំងប្រទេស។
ទោះជាយ៉ាងណា អនុក្រឹត្យនៃការធ្វើឯកជនភាវូបនីយកម្មដីធ្លីសម្រាប់ទីតាំងក្នុងខេត្តកណ្តាល មិនបានដាក់ឈ្មោះអ្នកដែលទទួលបានឡើយ។
មេឃុំឫស្សីជ្រោយ បានបន្ថែមថា៖ «តើនរណាជាម្ចាស់ដីនេះពិតប្រាកដ? ប្រជាពលរដ្ឋបច្ចុប្បន្នកំពុងតែរស់នៅលើបឹងនោះ ខណៈអ្នកនៅជុំវិញបឹងក៏កំពុងតែអាស្រ័យផលពីផ្ទៃបឹងនេះផងដែរ។ បច្ចុប្បន្ននេះ យើងរស់នៅដោយពឹងផ្អែកលើបឹងនេះខ្លាំង។ បើគ្មានបឹងនេះទេ យើងនឹងស្លាប់ជាក់ជាមិនខាន ខណៈប្រជានជនភាគច្រើនប្រកបរបរនេសាទ និងដាំដំណាំនៅលើបឹងនោះ»។
ទាក់ទិននឹងការធ្វើឯកជនភាវូបនីយកម្មដីធ្លីនេះ មន្ត្រីថ្នាក់មូលដ្ឋានជាច្រើននៅទូទាំងប្រទេសកម្ពុជាក៏បានសម្ដែងនូវការភ្ញាក់ផ្អើល ដោយលើកឡើងថា ពួកគេគ្មានសិទ្ធិអំណាចក្នុងការផ្ទេរដីសាធារណៈឬដីការពារឱ្យទៅបុគ្គលឯកជនណាមួយឡើយ។
មន្ត្រីរៀបចំដែនដីក្នុងខេត្តព្រះសីហនុមួយរូប ក៏ហាក់សម្ដែងជាការមិនពេញចិត្តទាក់ទិននឹងការផ្ទេរដីឱ្យទៅអ្នកជំនួញមួយរូបដែលត្រូវបានគេស្គាល់ថាមានទំនាក់ទំនងជាមួយនឹងកូនស្រីលោក ហ៊ុន សែន ផងដែរ។
ប្រធានការិយាល័យរៀបចំដែនដី នគរូបនីយកម្ម សំណង់ និងសុរិយោដី ស្រុកព្រៃនប់ លោក ឃួន គឹមស៊ីន ធ្លាប់បានឱ្យដឹងថា៖ «អនុក្រឹត្យចេញច្រើនណាស់ពាក់ព័ន្ធនឹងថ្នាក់ដឹកនាំ ខ្ញុំអត់សូវដឹងដែរ»។
ករណីស្រដៀងគ្នានេះក៏កើតឡើងនៅតំបន់ព្រៃការពារភ្នំតាម៉ៅផងដែរ ខណៈទាំងមេឃុំ និងមន្ត្រីរដ្ឋបាលព្រៃឈើ បានលើកឡើងដូចគ្នាថា ពួកគេគ្មានសិទ្ធិលើការសម្រេចនេះទេ។
ត្រលប់មកកាន់លោក អ៊ុំ ឈុនស្រេង វិញ បានបន្ថែមឱ្យដឹងកាលពីថ្ងៃព្រហស្បតិ៍ថា៖ «ប្រសិនបើរដ្ឋាភិបាលធ្វើបែបនេះមែន វានឹងបង្កឱ្យមានជាការភ្ញាក់ផ្អើលទូទាំងប្រទេស។ ខ្ញុំមិនដឹងថានឹងត្រូវធ្វើអ្វីបន្តទៀតសម្រាប់ប្រជាពលរដ្ឋនៅក្នុងតំបន់ដែលមានប្រមាណពី ៥ ០០០ ទៅ ៦ ០០០ គ្រួសារ»។
លោកថា៖ «ខ្ញុំក៏នឹងសម្រេចដាក់ពាក្យលាលែងចេញពីតំណែងនេះផងដែរ ដោយខ្ញុំគ្រោងនឹងធ្វើសន្និសីទមួយនៅកណ្តាលបឹង ដើម្បីប្រកាសពីការលាលែងរបស់ខ្ញុំ»។
គួរបញ្ជាក់ថា ផ្ទៃដីមេទឹកបឹងជន្លេន ក្នុងខេត្តកណ្តាល ដែលកំពុងតែត្រូវបានធ្វើឯកជនភាវូបនីយកម្មនេះមានទំហំ៨៩ហិកតា។ យោងតាមឯកសារមួយចំនួនដែលបានចេញផ្សាយកាលពីថ្ងៃពុធ គេសង្កេតឃើញថា ផ្ទៃដីចំនួន១១ទីតាំងផ្សេងទៀតក៏ត្រូវបានធ្វើឯកជនភាវូបនីយកម្ម ដោយរាប់ចាប់ពីទំហំតូចៗក្នុងរាជធានីភ្នំពេញ រហូតដល់ទំហំ២១៥ហិកតាក្នុងខេត្តក្រចេះ។
ផ្ទៃដីចំនួន ៦ ផ្សេងទៀតនៅខេត្តកណ្តាលដែលសុទ្ធសឹងតែជាបឹងឬផ្លូវទឹកដ៏សំខាន់នោះរួមមាន៖
- ផ្ទៃដីមេទឹកប្រមូលខ្លា ទំហំ៥៩ហិកតា ជាអាងស្តុកទឹកស្រោចស្រពដ៏សំខាន់មួយក្នុងឃុំពុកឫស្សី ស្រុកខ្សាច់កណ្តាល។
- ផ្ទៃដីមេទឹកផ្លូវទូក ទំហំ៤៣ហិកតា នៅឃុំពុកឫស្សី។
- ផ្ទៃដីបឹងដើមពោធិ៍ ទំហំ៤០ហិកតា ក្នុងឃុំទួលពេជ្រ ស្រុកអង្គស្នួល។
- បឹងមេទឹក បែកក្អម ទំហំ៤៣ហិកតា ស្ថិតក្នុងឃុំព្រែកអញ្ចាញ ស្រុកមុខកំពូល។
- បឹងមេទឹកអំពៅឌៀប គ្របដណ្ដប់ផ្ទៃដីទំហំ១២៨ហិកតា ក្នុងឃុំសំបួរមាស ស្រុកមុខកំពូល។
- បឹងខ្វែង ទំហំ៧ហិកតា ក្នុងឃុំកំពង់អូស ស្រុកពញាឮ ដែលករណីនេះត្រូវបានគេរាយការណ៍ដោយប្រជាពលរដ្ឋ២៣៨គ្រួសារ។
នៅក្នុងរាជធានីភ្នំពេញវិញ ផ្ទៃដីទំហំ៦១ម៉ែត្រការ៉េក្នុងខណ្ឌព្រែកព្នៅ ត្រូវបានកាត់ប្រគល់ទៅឱ្យលោក សេង យូអ៊ាន់ អគ្គនាយកនៃអគ្គនាយកដ្ឋានភស្តុភារនិងហិរញ្ញវត្ថុ ក្រសួងមហាផ្ទៃ។
ទោះជាយ៉ាងណា មន្រ្តីជាន់ខ្ពស់ក្រសួងមហាផ្ទៃខាងលើនេះបានបដិសេធមិនធ្វើការអត្ថាធិប្បាយឡើយកាលពីថ្ងៃព្រហស្បតិ៍ម្សិលមិញ។
ក្រៅពីនេះ គេក៏សង្កេតឃើញមានផ្ទៃដីប្រមាណ១៨៥ម៉ែត្រការ៉េ ក្នុងសង្កាត់មិត្តភាព ខណ្ឌ៧មករា ក៏ត្រូវបានផ្ទេរទៅឱ្យលោក ហួរ ហាប់ មេបញ្ជាការរងកងទ័ពជើងទឹក និងភរិយារបស់ខ្លួនគឺលោកស្រី ង៉ោ ងួនធារី ផងដែរ ខណៈរដ្ឋបាលរាជធានីភ្នំពេញក៏ស្ថិតក្នុងបញ្ជីទទួលបានផ្ទៃដីទំហំ២៨២ម៉ែត្រការ៉េ និងចុងក្រោយបុគ្គលមួយរូបឈ្មោះ ឈុន គឹមហេង ទទួលបាន២៦,៥ម៉ែត្រការ៉េ នៅព្រែកព្នៅ។
ជាមួយគ្នានេះ ដីព្រៃចំនួន២១៥ហិកតា នៅស្រុកស្នួល ខេត្តក្រចេះ ក៏ត្រូវបានផ្ទេរទៅកាន់បុគ្គលចំនួន២រូបផងដែរ ដែលក្នុងនោះរួមមាន លោក មឿង អ៊ុយហោ និងលោក មឿង អ៊ុយអាង ដែលត្រូវបានគេស្គាល់ថាជាម្ចាស់អាជីវកម្មថ្មកែវ។
ទាក់ទិននឹងករណីនេះ មេឃុំស្វាយជ្រះ លោក វ៉ាន់ ឌឿន បានថ្លែងថា៖ «ខ្ញុំសុំពេលពិនិត្យមើលករណីនេះជាមុនសិន ហើយខ្ញុំមិនអាចឆ្លើយអ្វីបាននៅឡើយទេនៅពេលនេះ ដោយខ្ញុំត្រូវធ្វើការទាក់ទងទៅកាន់ពួកគេដើម្បីសុំព័ត៌មានជាមុនសិន»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Kandal Commune Chief Outraged by Privatization of Lake
