មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត (គ.ជ.ប) ឱ្យដឹងថា បណ្ដឹងចំនួន ២៤៥ ដែលគណបក្សនយោបាយបានប្ដឹង អំឡុងពេលបោះឆ្នោតនោះ គ.ជ.ប ដោះស្រាយជិតអស់ហើយ ដោយបណ្ដឹងដែលនៅសល់ ស្ថាប័នជាតិរៀបចំការបោះឆ្នោតមួយនេះកំពុងដោះសា្រយបញ្ចប់។
អ្នកនាំពាក្យគណៈកម្មាធិការជាតិរៀបចំការបោះឆ្នោតលោក ហង្ស ពុទ្ធា ប្រាប់វីអូឌីកាលពីថ្ងៃសុក្រនេះថា បណ្ដឹងចំនួន ៦ទៀត ដែល គ.ជ.ប កំពុងដោះស្រាយ ពាក់ព័ន្ធនឹងការទាមទារឱ្យដាក់ទោសមន្ត្រី ជុំវិញភាពមិនប្រក្រតីរឿងបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ អាណត្តិទី៥នេះ។ ចំណែកបណ្ដឹងចំនួន ២៣៩ ដែលគណបក្សនយោបាយប្ដឹងនោះ ស្ថាប័រៀបចំការបោះឆ្នោតបានដោះស្រាយរួចហើយ។
លោកថា៖«បណ្ដឹងទាំង ៦ ដោយសារ ដោះមិនទាន់តាមពិតត្រូវដោះតាំងមុនថ្ងៃបោះឆ្នោត ប៉ុន្តែទី១ ទិដ្ឋភាពច្បាប់ចែងថា ដោះស្រាយក្នុងពេលវេលាសមសម្រប គ.ជ.ប ហើយទី២ ថ្ងៃបោះឆ្នោតចូលមកដល់»។
កាលពីថ្ងៃទី៧ ខែមិថុនា ឆ្នាំ២០២២ ក្រុមអង្គការសង្គមស៊ីវិលចំនួន៥ ស្ថាប័ន បានស្នើទៅគណៈកម្មាធិការជាតិរៀបចំការបោះឆ្នោត និងភាគីពាក់ព័ន្ធ ត្រូវពង្រឹងការអនុវត្តឱ្យបានត្រឹមត្រូវតាមច្បាប់ បទបញ្ជា និងនីតិវិធីសម្រាប់ការបោះឆ្នោត ព្រមទាំងពង្រឹងអព្យាក្រឹត្យភាពរបស់មន្ត្រីរាជការ និងកងកម្លាំងប្រដាប់វុធ ។
ការស្នើក្រុមអង្គការសង្គមស៊ីវិលនេះ ក្រោយពីពួកគេរកឃើញនូវភាពមិនប្រក្រតីមួយចំនួន នៅក្នុងដំណើរការនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងការរាប់សន្លឹកឆ្នោត កាលពីថ្ងៃទី៥ ខែមិថុនា ឆ្នាំ២០២២។
ភាពមិនប្រក្រតីទាំងនោះ ក្រុមអង្គការសង្គមស៊ីវិលអះអាងថា មានដូចជា វត្តមានអាជ្ញាធរ ដូចជា សមាជិកភូមិ មេភូមិ មេឃុំ ចៅសង្កាត់ មន្ត្រីនគរបាល និងបេក្ខជនឈរឈ្មោះ បានទៅឈរនៅក្នុងបរិវេណការិយាល័យបោះឆ្នោត ឬតាមភូមិនានានៅក្នុងឃុំសង្កាត់របស់ខ្លួន។
មិនតែប៉ុណ្ណោះក្នុងរបាយការណ៍សង្ខេបបឋមរបស់អង្គការសង្គមស៊ីវិលទាំង៥ លើកឡើងថា អ្នកសង្កេតការណ៍ត្រូវបានរារាំងមិនឱ្យចូលសង្កេត និងមិនឱ្យថតដំណើរការរាប់សន្លឹកឆ្នោតនៅតាមការិយាល័យមួយចំនួន។ លើសពីនេះ ដំណើរការរាប់សន្លឹកឆ្នោតនៅការិយាល័យមួយចំនួន ត្រូវបានគេសង្កេតឃើញថា បានប្រព្រឹត្តទៅក្នុងស្ថានភាពបិទបាំង និងខ្វះតម្លាភាព ដូចជា ការបិទច្រកការិយាល័យ ព្រមទាំងបិទទ្វារបង្អួចការិយាល័យរាប់ស្លឹកឆ្នោត ដោយមិនអនុញ្ញាតនិងមិនឱ្យពលរដ្ឋមើលការរាប់សន្លឹកឆ្នោតជាដើម។
មិនខុសគ្នាទៅនឹងអ្វីដែលអង្គការក្រៅរដ្ឋាភិបាលរកឃើញ គណបក្សនយោបាយមួយចំនួនដែលបានចូលរួមប្រកួតប្រជែងការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ ដូចជាគណបក្សភ្លើងទៀន គណបក្សប្រជាធិបតេយ្យមូលដ្ឋានជាដើមនោះ ក៏រកឃើញភាពមិនប្រក្រតីជាច្រើនទាក់ទងដំណើរការបោះឆ្នោតនេះផងដែរ។ ក្រុមថ្នាក់ដឹកនាំបក្សនយោបាយទាំងនោះ ក៏បានអះអាងថា ការបោះឆ្នោតឃុំ-សង្កាត់អាណត្តិទី៥នេះ គឺមានរូបភាពអាក្រក់ជាងការបោះឆ្នោតអាណត្តិណាៗទាំងអស់។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះ មានគណបក្សនយោបាយចំនួន១៧បានចូលរួមប្រកួតប្រជែង ដោយបានដាក់បេក្ខជនក្រុមប្រឹក្សាឃុំ-សង្កាត់សរុប ៨៦ ០៩២នាក់ (ស្ត្រី ២៧ ៨១៣នាក់) ខណៈក្រុមប្រឹក្សាឃុំ-សង្កាត់ដែលនឹងត្រូវជ្រើសរើសមកបម្រើការងារក្នុងឃុំ-សង្កាត់ទាំង១ ៦៥២ គឺមានចំនួន១១ ៦២២រូប។
បើតាមប្រធាន គ.ជ.ប លោក ប្រាជ្ញ ចន្ទ ស្ថាប័នមួយនេះគ្រោងនឹងប្រកាសលទ្ធផលបោះឆ្នោតផ្លូវការ នៅថ្ងៃទី២៦ ខែមិថុនា ឆ្នាំ២០២២នេះ៕