រដ្ឋមន្ត្រីក្រសួងមហាផ្ទៃ ជំរុញទៅបេក្ខភាពដែលជាប់ឆ្នោតជាមេឃុំ ជំទប់ទី១ ជំទប់ទី២ និងសមាជិកក្រុមប្រឹក្សាឃុំ-សង្កាត់ ត្រូវសហការគ្នាជួយដោះស្រាយបញ្ហាប្រឈមជូនប្រជាពលរដ្ឋ ដោយកុំប្រកាន់និន្នាការនយោបាយ ខណៈលោកថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិនេះ មានភាពសេរី ត្រឹមត្រូវ យុត្តិធម៌ និងគ្មានការលួចបន្លំសន្លឹកឆ្នោត ដូចការលើកឡើងរបស់គណបក្សក្រៅរដ្ឋាភិបាលមួយចំនួននោះទេ។
ក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យជាតិបាត់ដំបង នៅថ្ងៃទី២១ ខែមិថុនា ម្សិលមិញ រដ្ឋមន្ត្រីក្រសួងមហាផ្ទៃ លោក ស ខេង បានថ្លែងថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះ មានគណបក្សនយោបាយចំនួន១៧ ដាក់បេក្ខជនឈរឈ្មោះបោះឆ្នោតនៅតាមបណ្តារាជធានី-ខេត្ត នៅទូទាំងប្រទេស និងមានអ្នកសង្កេតការណ៍ជាតិ-អន្តរជាតិ ចូលរួមសង្កេតការណ៍ ស្របតាមគោលការណ៍ប្រជាធិបតេយ្យ។
លោកបន្តថា ចំពោះដំណើរការបោះឆ្នោតបានប្រព្រឹត្តទៅដោយរលូន មានភាពសេរី ត្រឹមត្រូវ និងយុត្តិធម៌ មិនមានឃាតកម្មនយោបាយ គ្មានហិង្សានិងការគំរាមកំហែង ដូចការលើកឡើងរបស់មន្ត្រីគណបក្សនយោបាយក្រៅរដ្ឋាភិបាលមួយចំនួននោះទេ។ ករណីនេះ លោកលើកទឹកចិត្តនិងជំរុញទៅបេក្ខភាពដែលជាប់ជាមេឃុំ ជំទប់ទី១ ជំទប់ទី២ និងក្រុមប្រឹក្សាឃុំ-សង្កាត់ ទូទាំងប្រទេស ត្រូវសហការគ្នាជួយដោះស្រាយបញ្ហាប្រឈមជូនប្រជាពលរដ្ឋ ដោយមិនត្រូវប្រកាន់និន្នាការនយោបាយឡើយ។
លោក ស ខេង ថ្លែងថា៖ «ទោះបីជាមកពី [គណបក្ស] ណាក៏ដោយ នៅពេលយើងចូលក្នុងប្រអប់តែមួយហើយ យើងធ្វើការងារជាមួយគ្នាទៅ ដើម្បីផលប្រយោជន៍ប្រជាពលរដ្ឋ។ ប៉ុន្តែគាត់មានសិទ្ធិតតាំងជាមួយគេថា “ទេ! នេះរឿងអញ្ចេះ នេះរឿងអញ្ចោះ គួរតែធ្វើចេះ” គាត់មានសិទ្ធិតវ៉ា ប៉ុន្តែនៅពេលសម្រេចចុងក្រោយ មតិភាគច្រើនឈ្នះ គាត់ត្រូវគោរពតាមហ្នឹង! មិនមែនជាការវាយដំច្រំទាត់ធាក់គ្នាទេ ការជជែកគ្នាតាមគោលការណ៍ច្បាប់និងប្រជាធិបតេយ្យ»។
បេក្ខភាពជាប់ឆ្នោតមេឃុំក្រយា ស្រុកប្រាសាទបល្ល័ង្គ ខេត្តកំពង់ធំ មកពីគណបក្សភ្លើងទៀន លោក យ៉ាប់ យ៉ូត បានគាំទ្រចំពោះសារនយោបាយរបស់រដ្ឋមន្ត្រីក្រសួងមហាផ្ទៃ ដោយថា នៅពេល គ.ជ.ប ប្រកាសលទ្ធផលជាផ្លូវការថាលោកជាប់ជាមេឃុំ ហើយបានចូលកាន់តួនាទីស្របតាមច្បាប់ នោះលោកប្តេជ្ញាសហការធ្វើការជាមួយជំទប់ទី១ ជំទប់ទី២ និងក្រុមប្រឹក្សាឃុំដែលមកពីគណបក្សផ្សេងៗទៀត ក្នុងការជួយផ្តល់សេវាជូនប្រជាពលរដ្ឋដែលជាម្ចាស់ឆ្នោតឱ្យបានស្មើភាពគ្នា ដើម្បីធ្វើឱ្យភូមិឃុំមានសុខសុវត្ថិភាព។
លោកមានប្រសាសន៍ថា៖ «ជាមេឃុំនេះ ខ្ញុំនឹងព្យាយាមពន្យល់ពួកគាត់ ពីព្រោះអំណាចនិងតួនាទីរបស់ប្រជាពលរដ្ឋដែលគាត់ផ្តល់ឱ្យ។ អ៊ីចឹងសំឡេងគាត់ដែលជាប់ជាជំទប់ ក៏ជាសំឡេងរបស់គាត់ដែលគាំទ្រខ្លួន អ៊ីចឹងខ្ញុំនឹងព្យាយាមពន្យល់ពួកគាត់ ដើម្បីកុំឱ្យពួកគាត់ប្រកាន់និន្នាការនយោបាយនៅពេលមកធ្វើការនៅក្នុងក្របខណ្ឌ»។
នាយកប្រតិបត្តិអង្គការនិចហ្វិក លោក សំ គន្ធាមី ជំរុញទៅថ្នាក់ដឹកនាំឃុំសង្កាត់នៅទូទាំងប្រទេស ត្រូវអនុវត្តតួនាទីនិងការងារស្របតាមប្រសាសន៍របស់រដ្ឋមន្ត្រីក្រសួងមហាផ្ទៃ និងពង្រឹងការអនុវត្តច្បាប់ស្តីពីការគ្រប់គ្រងឃុំសង្កាត់ ដោយមិនប្រកាន់បក្ខពួកឬនិន្នការនយោបាយណាមួយ នោះទើបធ្វើឱ្យភូមិឃុំមានសុវត្ថិភាព។
ប៉ុន្តែលោកថា បើសិនជាមេឃុំ ឬជំទប់ទី១ ជំទប់ទី២ និងក្រុមប្រឹក្សាឃុំ មិនសហការធ្វើការងារជាមួយគ្នាឱ្យមានតម្លាភាពទេ អ្នកដែលជួបបញ្ហាប្រឈមខ្លាំងជាងគេ គឺប្រជាពលរដ្ឋម្ចាស់ឆ្នោត។
លោកថា៖ «កាលណាមកធ្វើមេឃុំ ឬចៅសង្កាត់ ត្រូវគោរពតាមច្បាប់ អនុវត្តតាមច្បាប់! […] ការដឹកនាំឃុំសង្កាត់ វាមានបញ្ហា»។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះ មានគណបក្សនយោបាយចំនួន១៧បានចូលរួមប្រកួតប្រជែង ដោយបានដាក់បេក្ខជនក្រុមប្រឹក្សាឃុំ-សង្កាត់សរុប៨៦ ០៩២នាក់ (ស្ត្រី ២៧ ៨១៣នាក់) ខណៈក្រុមប្រឹក្សាឃុំ-សង្កាត់ដែលនឹងត្រូវជ្រើសរើសមកបម្រើការងារក្នុងឃុំ-សង្កាត់ទាំង១ ៦៥២ គឺមានចំនួន១១ ៦២២រូប។
បើតាមប្រធាន គ.ជ.ប លោក ប្រាជ្ញ ចន្ទ ស្ថាប័នមួយនេះគ្រោងនឹងប្រកាសលទ្ធផលបោះឆ្នោតផ្លូវការ នៅថ្ងៃទី២៦ ខែមិថុនា ឆ្នាំ២០២២នេះ៕