អនុប្រធានគណបក្សភ្លើងទៀន លោក សុន ឆ័យ នៅព្រឹកថ្ងៃសុក្រនេះ បានចូលទៅបំភ្លឺនៅសាលាដំបូងរាជធានីភ្នំពេញ ពាក់ព័ន្ធនឹងបណ្ដឹងរបស់គណបក្សប្រជាជនកម្ពុជា ដែលប្ដឹងរូបលោកពីបទ «បរិហារកេរ្តិ៍ជាសាធារណៈ» ក្រោយពីលោក សុន ឆ័យ រិះគន់រឿងភាពមិនប្រក្រតីនៃការបោះឆ្នោត។
កាលពីថ្ងៃទី១៤ ខែមិថុនា ឆ្នាំ២០២២ គណបក្សប្រជាជនកម្ពុជា តាមរយៈមេធាវី លោក គី តិច បានដាក់ពាក្យបណ្ដឹងទៅកាន់តុលាការ ប្រឆាំងនឹងលោក សុន ឆ័យ ក្នុងបណ្ដឹងនោះ លោក សាយ ឈុំ អនុប្រធានគណបក្សប្រជាជនកម្ពុជា និងជាប្រធានព្រឹទ្ធសភាផងនោះ បានទាមទារសំណងជំងឺចិត្តពីលោក សុន ឆ័យ ចំនួន១លានដុល្លារអាមេរិក។
កាលពីថ្ងៃទី១៧ ខែមិថុនា ឆ្នាំ២០២២ គ.ជ.ប បានប្តឹងលោក សុន ឆ័យ ទៅតុលាការពីបទ «បរិហារកេរ្តិ៍ជាសាធារណៈ» និងទាមទារឱ្យអ្នកនយោបាយរូបនេះត្រូវធ្វើលិខិតសុំទោសជាសាធារណៈថែមទៀត។ ជុំវិញបណ្តឹងនេះ លោក សុន ឆ័យ បានចូលទៅបំភ្លឺនៅតុលាការរួចហើយកាលពីថ្ងៃទី១២ ខែកក្កដា ឆ្នាំ២០២២។
អនុប្រធានគណបក្សភ្លើងទៀន លោក សុន ឆ័យ ធ្លាប់បានប្រាប់វីអូឌីនាពេលថ្មីៗនេះថា រូបលោកបានត្រៀមខ្លួនរួចរាល់ហើយ ក្នុងការចូលឆ្លើយទៅតាមដីកាកោះរបស់តុលាការ ខណៈលោកមិនបានធ្វើអ្វីខុសដូចការចោទប្រកាន់របស់ដើមបណ្ដឹងទាំងពីរនេះ។
ម្យ៉ាងវិញទៀត លោក សុន ឆ័យ មិនយល់ឃើញថា អ្វីដែលលោកបានរិះគន់អំពីដំណើរការបោះឆ្នោតឃុំសង្កាត់នោះ គឺនឹងត្រូវចាប់ខ្លួនលោកឡើយ ព្រោះសារនយោបាយដូចដែលលោកបានទិតៀននោះ មិនមែនមានតែលោកម្នាក់ទេដែលរកឃើញអំពីភាពមិនប្រក្រតីនេះ សូម្បីសង្គមស៊ីវិលនិងអ្នកនយោបាយផ្សេងទៀតក៏មើលឃើញដូចរូបលោកយ៉ាងដូច្នេះដែរ។
ចំណែក អ្នកនាំពាក្យគណបក្សប្រជាជនកម្ពុជា លោក សុខ ឥសាន ធ្លាប់បញ្ជាក់ជំហរដែរថា គណបក្សកាន់អំណាចនឹងមិនចរចាខាងនយោបាយទេ ព្រោះរឿងក្តីនេះ មេធាវីតំណាងដោយអាណត្តិ គឺលោក គី តិច បានបញ្ជូនសំណុំរឿងទៅដល់ដៃតុលាការរួចហើយ៕