គណបក្សខ្មែរស្រឡាញ់ជាតិ នឹងរៀបចំបំពេញរចនាសម្ព័ន្ធថ្នាក់ដឹកនាំឡើងវិញ ក្រោយពីលោក ជីវ កក្តា ជាអតីតប្រធានបានប្រកាសរំលាយគណបក្សនេះ ហើយទៅចូលរួមជាមួយគណបក្សប្រជាជនកម្ពុជា កាលពីចុងខែកក្កដា។
លោក សៀវ សុត ប្រធានស្ដីទីគណបក្សខ្មែរស្រឡាញ់ជាតិ ប្រាប់វីអូឌីនៅថ្ងៃសុក្រនេះថា បន្ទាប់ពីលោក ជីវ កក្កា ប្រកាសរំលាយគណបក្ស ហើយទៅចូលរួមជាមួយបក្សកាន់អំណាចមក គណបក្សខ្មែរស្រឡាញ់ជាតិជួបបញ្ហាជាច្រើន ដែលធ្វើឱ្យសមាជិក-សមាជិកា សកម្មជន និងអ្នកគាំទ្រទាំងអស់ បារម្ភពីនិរន្ដរភាពនៃគណបក្សនេះ។
តែយ៉ាងណា លោកថា រូបលោកនិងសមាជិកក្នុងគណបក្សផ្សេងទៀតប្រកាសបដិសេធចំពោះការរំលាយនេះ ហើយនឹងរៀបចំក្បាលម៉ាស៊ីនអចិន្ត្រៃយ៍សម្រាប់បំពេញបន្ថែមថ្នាក់ដឹកនាំគណបក្ស ដើម្បីដឹកនាំគណបក្សនេះបន្តទៅមុខទៀត។
លោកថា៖ «ក្នុងនាមយើងជាសមាជិកអចិន្ត្រៃយ៍ មិនបានលាឈប់ពីគណបក្ស តម្រូវឱ្យយើងមានបើកកិច្ចប្រជុំមួយបន្ទាន់ ដែលនឹងកោះអញ្ជើញសមាជិក-សមាជិកា គណៈកម្មការនាយក ដែលនៅចង់មានដំណោះស្រាយចង់ឃើញពីជំហរគណបក្សបន្ដដំណើរទៅមុខរបៀបណា ទម្រង់យ៉ាងម៉េច»។
បន្ថែមពីនេះ លោក សៀវ សុត ក៏អំពាវនាវដល់ថ្នាក់ដឹកនាំនិងអ្នកគាំទ្រនៅតាមបណ្ដារាជធានីខេត្ត ឱ្យពង្រឹងស្មារតី រក្សាជំហរ ព្រមទាំងរក្សារចនាសម្ព័ន្ធដឹកនាំដែលមានស្រាប់ឱ្យនៅដំណើរការជាប្រក្រតីផងដែរ។
បើតាមសេចក្ដីប្រកាសព័ត៌មានរបស់គណបក្សខ្មែរស្រឡាញ់ជាតិ ចុះថ្ងៃទី០៥ ខែសីហា ឆ្នាំ២០២២នេះ ឱ្យដឹងថា គណបក្សនេះនឹងរៀបចំកិច្ចប្រជុំគណៈកម្មាធិការនាយកគណបក្ស និងសន្និសីទសារព័ត៌មានមួយ នៅថ្ងៃស្អែក។
កាលពីថ្ងៃទី២ ខែសីហា ឆ្នាំ២០២២ លោក សៀវ សុត និងលោក ពុធ ចេង ជាគណៈកម្មាធិការអចិន្ត្រៃយ៍នៃគណបក្សខ្មែរស្រឡាញ់ជាតិ បានប្រកាសបដិសេធចោលនូវសេចក្ដីប្រកាសព័ត៌មានពីការរំលាយគណបក្សនេះ កាលពីថ្ងៃទី២៩ ខែកក្កដា ឆ្នាំ២០២២ ដែលធ្វើឡើងដោយអតីតប្រធានបក្សលោក ជីវ កក្តា។ ក្រៅពីនេះ ថ្នាក់ដឹកនាំជាន់ខ្ពស់នៃគណបក្សទាំងពីររូបនេះអះអាងថា ពួកគេមិនបានចូលរួមរំលាយគណបក្សនេះទេ ហើយការរំលាយនេះផ្ទុយទៅនឹងលក្ខន្ដិកៈគណបក្សខ្មែរស្រឡាញ់ជាតិ ដែលមានតម្កល់នៅក្រសួងមហាផ្ទៃ។
គណបក្សខ្មែរស្រឡាញ់ជាតិ គឺជាគណបក្សនយោបាយដំបូងគេដែលត្រូវបានបង្កើតឡើងដោយមានក្បាលម៉ាស៊ីនដឹកនាំមានប្រភពចេញមកពីគណបក្សសង្រ្គោះជាតិដែលត្រូវបានតុលាការរំលាយ ហើយដែលបានប្រកាសរំលាយខ្លួនឯងចាប់តាំងពីមានគណបក្សតូចៗបំបែកចេញពីគណបក្សសង្រ្គោះជាតិត្រូវបានបង្កើតឡើង ដើម្បីចូលរួមប្រកួតប្រជែងនយោបាយជាមួយគណបក្សប្រជាជនកម្ពុជា៕