ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ជំរុញទៅប្រជាពលរដ្ឋមិនទាន់ចុះឈ្មោះ ឬដល់អាយុចុះឈ្មោះ ត្រូវទៅចុះឈ្មោះបោះឆ្នោតឱ្យបានគ្រប់ៗគ្នា ហើយអាជ្ញាធរពាក់ព័ន្ធត្រូវផ្តល់សេវាជូនពលរដ្ឋឱ្យបានល្អ។
ក្នុងកិច្ចប្រជុំផ្សព្វផ្សាយសេចក្ដីសម្រេចសន្និបាតគណៈកម្មាធិការកណ្ដាលវិសាមញ្ញរបស់គណបក្សប្រជាជនកម្ពុជា នៅខេត្តបាត់ដំបង កាលពីថ្ងៃទី៦ ខែសីហា អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋាន ខេត្តបាត់ដំបង និងព្រៃវែង លោក ស ខេង បានជំរុញប្រជាពលរដ្ឋ ពិសេសសមាជិកបក្សមិនទាន់ចុះឈ្មោះ ឬដល់អាយុត្រូវចុះឈ្មោះ ត្រៀមទៅចុះឈ្មោះបោះឆ្នោតឱ្យបានគ្រប់ៗគ្នា។
ករណីនេះ លោក ស ខេង ក៏ស្នើទៅថ្នាក់ដឹកនាំ និងសមាជិកគណបក្សក្នុងខេត្តបាត់ដំបងទាំងអស់ ត្រូវបន្តការបំពេញភារកិច្ចបម្រើជាតិ បម្រើប្រជាជនឱ្យបានល្អ ដើម្បីបន្តទទួលបានការគាំទ្រពីប្រជាពលរដ្ឋ និងពង្រឹងកម្លាំងគាំទ្រប្រកបដោយគុណភាព។
បើតាមប្រតិទិនរបស់គណៈកម្មាធិការជាតិរៀបចំការបោះឆ្នោត គ.ជ.ប ឱ្យដឹងថា ការត្រៀមរៀបចំបម្រើការពិនិត្យឈ្មោះ និងចុះបញ្ជីឈ្មោះបោះឆ្នោតឆ្នាំ២០២២ នឹងប្រព្រឹត្តទៅពីថ្ងៃទី១០ សីហា ដល់ថ្ងៃទី៣ ខែតុលា។
កម្ពុជា នឹងរៀបចំការបោះឆ្នោតជាតិ ឬបោះឆ្នោតជ្រើសរើសតំណាងរាស្ត្រ នីតិកាលទី៧ នៅឆ្នាំ២០២៣ខាងមុខ ខណៈរដ្ឋាភិបាលអាណត្តិទី៦នេះ ត្រូវបានដឹកនាំដោយឯកបក្ស ឬដឹកនាំដោយគណបក្សប្រជាជនកម្ពុជាមួយប៉ុណ្ណោះ។
ក្នុងដំណើរទេស្សនៈកិច្ចមកកាន់កម្ពុជា រដ្ឋមន្ត្រីក្រសួងការបរទេសសហរដ្ឋអាមេរិក លោក អែនតូនី ប្លីងខិន (Antony J. Blinken) បានសម្តែងការព្រួយបារម្ភអំពីការវិវត្តស្ថានភាពសិទ្ធិមនុស្ស និងលំហនយោបាយនៅកម្ពុជាដែលកាន់តែរួមតូច។
រដ្ឋមន្រ្តីការបរទេសរូបនេះបានជំរុញឱ្យលោក ហ៊ុន សែន បើកចំហជាថ្មីនូវលំហនយោបាយនិងសិទ្ធិពលរដ្ឋ នៅមុនការបោះឆ្នោតជ្រើសតាំងតំណាងរាស្ត្រ ឆ្នាំ២០២៣ ខាងមុខ ដោយធានាថា ពលរដ្ឋខ្មែរគ្រប់រូប ពិសេស លោក កឹម សុខា ប្រធានគណបក្សសង្រ្គោះជាតិដែលត្រូវបានតុលាការរំលាយ អាចចូលរួមដោយសេរីនៅក្នុងជីវភាព និងដំណើរការនយោបាយនៅកម្ពុជា។
ទំព័រហ្វេសប៊ុករបស់លោក កឹម សុខា នៅថ្ងៃទី៧ ខែសីហានេះ ឱ្យដឹងថា កាលពីល្ងាចថ្ងៃទី៦ ខែសីហា លោកបានជំនួបពិភាក្សាជាមួយអគ្គនាយកទទួលបន្ទុកកិច្ចការអាស៊ាននិងអាស៊ីបូព៌ា និងជាឧបការីរដ្ឋមន្រ្តីការបរទេសជប៉ុន លោក KANO Takehiro នៅក្នុងស្ថានទូតជប៉ុន រាជធានីភ្នំពេញ។
មេបក្សប្រឆាំងរូបនេះអះអាងថា ក្នុងជំនួបនោះ ភាគីជប៉ុន ចង់ឃើញកម្ពុជាមានការបោះឆ្នោតដោយសេរី ត្រឹមត្រូវ និងយុត្តិធម៌ ដែលបើកទូលាយឱ្យប្រជាពលរដ្ឋខ្មែរគ្រប់រូបមានជម្រើសគណបក្សនយោបាយ ឬ អ្នកដឹកនាំដែលខ្លួនចង់ជ្រើសរើស និងស្របតាមឆន្ទ:៕
