ចាប់តាំងពីបង្កើតគណនីប្រព័ន្ធផ្សព្វផ្សាយសង្គមថ្មីមួយចំនួននៅពាក់កណ្ដាលខែសីហា ឆ្នាំ២០២២មក អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក លោក ហ៊ុន ម៉ាណែត បានបង្ហោះវីដេអូជាសាធារណៈចំនួន៩៥ នៅលើបណ្ដាញ YouTube, TikTok, Twitter និង Instagram គិតត្រឹមព្រឹកថ្ងៃទី២៧ ខែកញ្ញា ឆ្នាំ២០២២។
លោក ហ៊ុន ម៉ាណែត បានថ្លែងសុន្ទរកថានៅក្នុងព្រឹត្តិការណ៍សាធារណៈរៀងរាល់២ទៅ៣ថ្ងៃម្ដង មិនថាក្នុងពិធីយោធា វេទិកាបក្សកាន់អំណាច ឬពិធីទទួលសញ្ញាបត្រនៅសាកលវិទ្យាល័យក្នុងខណ្ឌទួលគោក រាជធានីភ្នំពេញ។
កាលពីថ្ងៃទី៥ ខែកញ្ញា ឆ្នាំ២០២២ នៅចំពោះមុខនិស្សិតបញ្ចប់ការសិក្សាប្រមាណ១ ០០០នាក់ លោក ហ៊ុន ម៉ាណែត បាននិយាយអំពីប្រធានបទក្ដៅគគុក គឺការទស្សន៍ទាយអំពីថ្ងៃអវសាននៃពិភពលោករបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ និងការកៀរគរអ្នកដើរតាមឱ្យមកចម្ការរបស់លោក ខឹម វាសនា ក្នុងខេត្តសៀមរាប ដើម្បីគេចពីទឹកជំនន់។
លោក ហ៊ុន ម៉ាណែត បាននិយាយថា៖ «ជំនឿគឺជាសិទ្ធិរបស់ពួកគេ ប៉ុន្តែកុំជឿជ្រុលហួសហេតុពេក រហូតដល់កាត់ផ្ដាច់ទំនាក់ទំនងគ្រួសារ ឬធ្វើអ្វីមួយផ្ទុយនឹងច្បាប់»។
ដោយភ្ជាប់នឹងឧប្បត្តិហេតុស្រដៀងគ្នានេះនៅសហរដ្ឋអាមេរិក ដែលឈានទៅរកការសម្លាប់មនុស្សរង្គាល លោក ហ៊ុន ម៉ាណែត បន្ថែមថា៖ «អាចមានការបែកបាក់គ្រួសារ ឪពុកម្ដាយ ប្ដីប្រពន្ធ ដោយសារតែជំនឿនេះ»។
នេះគឺជាសុន្ទរកថាមួយក្នុងចំណោមសុន្ទរកថា និងព្រឹត្តិការណ៍សាធារណៈយ៉ាងតិចចំនួន២០ ដែលត្រូវបានចែករំលែកតាមប្រព័ន្ធអ៊ីនធឺណិតរបស់លោក ចាប់តាំងពីដើមខែសីហា ឆ្នាំ២០២២មក។
ទោះយ៉ាងណា លោក ហ៊ុន ម៉ាណែត មិនមែនគ្រាន់តែជាអគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោកប៉ុណ្ណោះទេ លោកគឺជាកូនប្រុសច្បងរបស់លោកនាយករដ្ឋមន្ត្រី ហ៊ុន សែន និងត្រូវបានជ្រើសរើសជាបេក្ខភាពនាយករដ្ឋមន្រ្តីបន្តពីឪពុករបស់លោក មកពីគណបក្សប្រជាជនកម្ពុជា ដែលកំពុងកាន់អំណាច។ លោកបង្ហាញខ្លួនជាសាធារណៈ និងបង្កើនប្រជាប្រិយភាពជាបន្តបន្ទាប់ រួមទាំងការឆ្លើយតបទៅនឹងការរិះគន់មកលើរូបលោក។
កាលពីថ្ងៃទី១៨ ខែសីហា ឆ្នាំ២០២២ នៅខេត្តស្ទឹងត្រែង លោក ហ៊ុន ម៉ាណែត បានថ្លែងសុន្ទរកថានៅចំពោះមុខកងពលតូចអន្តរាគមន៍លេខ១២៨ ដោយបដិសេធការចោទប្រកាន់ពីសហស្ថាបនិកអង្គការមាតាធម្មជាតិ លោក អាឡិច ហ្គន់សាឡេស ដេវិតសុន (Alejandro Gonzalez-Davidson) ដែលថាលោកជាប់ពាក់ព័ន្ធនឹងការផ្ដល់ដីសម្បទាន និងការកាប់បំផ្លាញព្រៃឈើភ្នំតាម៉ៅ។
លោកបានថ្លែងក្នុងសុន្ទរកថា ដែលក្រោយមកលោកបានបង្ហោះតាមប្រព័ន្ធអ៊ីនធឺណិតថា៖ «អ្នកដែលព្យាយាមកេងចំណេញផ្នែកនយោបាយបានចូលបញ្ចេញមតិ។ គាត់ចាត់ទុកខ្លួនឯងជាសកម្មជនបរិស្ថាន ការពារបរិស្ថាន ដោយស្រឡាញ់ធម្មជាតិនៅកម្ពុជា ប៉ុន្តែអ្វីដែលគាត់ធ្វើក្នុង[វិស័យ]បរិស្ថានជាសកម្មភាពនយោបាយ»។
លោកបន្ថែមថា៖ «មានភាពខុសគ្នាទាំងស្រុងរវាងការរិះគន់ក្នុងន័យស្ថាបនា និងការបង្កើតបញ្ហាដើម្បីបំភ័ន្តអ្នកដទៃ ដើម្បីកេងចំណេញផ្នែកនយោបាយ»។
កាលពីថ្ងៃទី១៤ ខែកញ្ញា ឆ្នាំ២០២២ លោក ហ៊ុន ម៉ាណែត បានបង្ហោះវីដេអូនៃសុន្ទរកថារបស់លោកទៅកាន់វេទិកាគណបក្សប្រជាជនកម្ពុជា ដែលនិយាយអំពីលោក សម រង្ស៊ី អតីតមេបក្សប្រឆាំងដែលកំពុងនិរទេសខ្លួននៅប្រទេសបារាំង។
លោក សម រង្ស៊ី បានលើកឡើងតាមប្រព័ន្ធអ៊ីនធឺណិតថា លោក ហ៊ុន ម៉ាណែត កំពុងឆក់យកឱកាសពីអ្នកនយោបាយវ័យក្មេងផ្សេងទៀត ដោយក្លាយជាអ្នកស្នងតំណែងពីលោក ហ៊ុន សែន បើទោះបីជាខ្លួនលោកមិនមានសមិទ្ធផលអ្វីក៏ដោយ។
លោក ហ៊ុន ម៉ាណែត មានប្រសាសន៍ឆ្លើយតបនឹងការលើកឡើងរបស់លោក សម រង្ស៊ី ថា៖ «ខ្ញុំទទួលស្គាល់ថា នៅកម្ពុជាមានមនុស្សដែលមានសមត្ថភាពច្រើន ហើយនៅក្នុងគណបក្សប្រជាជនកម្ពុជាក៏មានអ្នកមានសមត្ថភាពច្រើនដែរ។ ប៉ុន្តែគណៈកម្មាធិការកណ្ដាល បានបោះឆ្នោតជាឯកច្ឆន្ទជ្រើសរើសមនុស្សម្នាក់ ព្រោះគណៈកម្មាធិការអាចជ្រើសរើសបានតែម្នាក់ប៉ុណ្ណោះ ហើយក៏បានផ្ដល់ឱកាសឱ្យខ្ញុំ។ ឥលូវនេះ តើយើងអាចធ្វើអ្វីបាន? ហើយបើគាត់ចង់ផ្ដល់ឱកាសដល់យុវជនផ្សេងទៀត ហេតុអ្វីមិនអនុញ្ញាតឱ្យ [យុវជន] មកពីគណបក្សគាត់ឈរឈ្មោះជានាយករដ្ឋមន្ត្រីទៅ?»
លោក ហ៊ុន ម៉ាណែត គូសបញ្ជាក់ថា «គណបក្សភ្លើងទៀន» ដែលពីមុនដឹកនាំដោយលោក សម រង្ស៊ី នៅតែមានអ្នកនយោបាយដែលមានវ័យចំណាស់ជាអ្នកដឹកនាំ។
លោកបន្ថែមថា៖ «ប្រសិនបើគាត់ចង់ផ្ដល់ឱកាសឱ្យ [ពួកគេ] កុំចង្អុលទៅអ្នកដទៃ។ កុំចេះតែលើកបញ្ហាដោយមិនមានដំណោះស្រាយ»។
ការបញ្ជាក់ពីការជ្រើសរើសរូបលោកជាអ្នកស្នងតំណែងពីឪពុករបស់លោក គឺជាប្រធានបទទូទៅនៅក្នុងសុន្ទរកថារបស់លោក និងឪពុករបស់លោក។ លោក ហ៊ុន ម៉ាណែត ត្រូវបានជ្រើសរើសឱ្យដឹកនាំចលនាយុវជនរបស់គណបក្សប្រជាជនកម្ពុជា កាលពីខែមិថុនា ឆ្នាំ២០២០ ហើយកាលពីខែធ្នូ ឆ្នាំមុន លោកនាយករដ្ឋមន្ត្រី ហ៊ុន សែន បានប្រកាសថា លោក ហ៊ុន ម៉ាណែត គឺជាបេក្ខភាពនាយករដ្ឋមន្ត្រីនាពេលអនាគត។ សមាជគណបក្សប្រជាជនកម្ពុជា នៅចុងខែធ្នូ ឆ្នាំ២០២១ បានគាំទ្រសេចក្តីសម្រេចនេះ។
លោក ហ៊ុន ម៉ាណែត បង្ហាញខ្លួនជាសាធារណៈកាន់តែច្រើនឡើង ចាប់តាំងពីថ្ងៃទី១៥ ខែសីហា ឆ្នាំ២០២២ រួមទាំងការបង្កើតទំព័រហ្វេសប៊ុកថ្មីមួយឈ្មោះថា «Hun Manet – C.O.Army Office»។ ចាប់តាំងពីខែសីហា រហូតដល់ពាក់កណ្ដាលខែកញ្ញា ឆ្នាំ២០២២ លោក ហ៊ុន ម៉ាណែត បានជួបជាមួយរដ្ឋមន្ត្រីការបរទេសអូស្ត្រាលី លោកស្រី ផេននី វង់ (Penny Wong) រដ្ឋមន្ត្រីការបរទេសចិន លោក វ៉ាង យី (Wang Yi) នាយករដ្ឋមន្ត្រីឡាវ លោក ថងលូន ស៊ីស៊ូលីត (Thongloun Sisoulith) និងបានបំពេញទស្សនកិច្ចទៅកាន់ប្រទេសវៀតណាម និងឡាវ។ លោកក៏បានចូលរួមព្រឹត្តិការណ៍នានារបស់សមាគមគ្រូពេទ្យ សិល្បៈវប្បធម៌ និងមូលនិធិសប្បុរសធម៌សម្រាប់ការដោះមីន ជាដើម។
អ្នកវិភាគនយោបាយ លោក ឯម សុវណ្ណរ៉ា ថ្លែងថា លោក ហ៊ុន ម៉ាណែត កំពុងបង្ហាញថា ខ្លួនលោកជានាយករដ្ឋមន្ត្រីនាពេលអនាគត។
លោកបានមានប្រសាសន៍ថា៖ «គាត់កំពុងព្យាយាមបង្ហាញពីសមត្ថភាពក្នុងការធ្វើសកម្មភាពទាំងក្នុងក្របខណ្ឌសាធារណៈ និងក្របខណ្ឌគណបក្ស»។
លោកបន្តថា៖ «ទី១ គាត់ជាអ្នកស្នងតំណែងក្នុងចំណោមយុវជនវ័យក្មេង ហើយទី២ គាត់ជាបេក្ខភាពនាយករដ្ឋមន្ត្រី។ គាត់មានតួនាទីក្នុងបក្ស ដូច្នេះគាត់ត្រូវប្រឹងប្រែង ដើម្បីបង្ហាញថាគាត់មានសមត្ថភាពជាងអ្នកដទៃ។ ដើម្បីបង្ហាញថាគាត់មានសមត្ថភាពជាងអ្នកដទៃ គាត់ត្រូវតែធ្វើសកម្មភាពជាក់ស្ដែង»។
លោកបន្ថែមថា កន្លងមក លោក ហ៊ុន ម៉ាណែត កំពុងដើរតាមគន្លងរបស់ឪពុក។
លោកបន្ថែមថា៖ «គាត់មិនទាន់បានបង្កើតគំរូនយោបាយ ឬសកម្មភាពថ្មីសម្រាប់ខ្លួនគាត់នៅឡើយទេ។ គាត់ដើរតាមអ្នកនយោបាយមុនៗ ហើយយើងឃើញថា គាត់ដើរតាមឪពុករបស់គាត់កម្រិតណា ទាំងការនិយាយស្ដី និងលើកបញ្ហាផ្ទាល់ខ្លួនមកនិយាយជាសាធារណៈ។ អ្វីដែលបង្កើតដោយខ្លួនគាត់ផ្ទាល់ នឹងមានតម្លៃជាងដើរតាមគន្លងនយោបាយរបស់អ្នកនយោបាយជំនាន់មុន»។
លោក ឯម សុវណ្ណរ៉ា បន្តថា ជាការប្រសើរ គួរកុំលើកយកបញ្ហាផ្ទាល់ខ្លួនមកនិយាយជាសាធារណៈ ដូចជាករណីលោក សម រង្ស៊ី ដូចដែលលោក ហ៊ុន សែន តែងលើកយកមកនិយាយ។
លោកបន្តថា៖ «តាមគំនិតរបស់ខ្ញុំ គាត់គួរតែស្ងប់ស្ងាត់នៅពេលនិយាយអំពីបញ្ហាផ្ទាល់ខ្លួន ប៉ុន្តែនៅពេលនិយាយអំពីផលប្រយោជន៍ប្រទេសជាតិ គាត់ត្រូវតែសកម្ម និងបង្ហាញពីចរិតនយោបាយសកម្ម»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា លោក ហ៊ុន ម៉ាណែត និងអ្នកផ្សេងទៀតក្នុងជំនាន់របស់លោក បាននិងកំពុងឡើងកាន់តំណែងដឹកនាំស្ថាប័នផ្សេងៗ។
លោក សុខ ឥសាន បាននិយាយថា៖ «ប្រសិនបើគណបក្សប្រជាជនកម្ពុជាបន្តឈ្នះឆ្នោត យុវជនទាំងនោះនឹងជ្រៀតចូលគ្រប់រចនាសម្ពន្ធនៃការដឹកនាំនិងការគ្រប់គ្រងរបស់រដ្ឋាភិបាល»។
លោកបានបន្ថែមថា លោក ហ៊ុន ម៉ាណែត បានដឹងច្បាស់ពីការជ្រើសរើសរូបលោកជាបេក្ខភាពនាយករដ្ឋមន្ត្រីនាពេលអនាគត ហើយកំពុងតែត្រៀមខ្លួន។
លោកបន្ថែមថា៖ «គាត់ [លោក ហ៊ុន ម៉ាណែត] ត្រូវតែធ្វើសកម្មភាព ដើម្បីឱ្យមានភាពលេចធ្លោ ដើម្បីធ្វើឱ្យប្រជាពលរដ្ឋទូទាំងប្រទេសមើលឃើញថា បន្ទាប់ពីឈ្នះឆ្នោត គណបក្សប្រជាជនកម្ពុជាមាននាយករដ្ឋមន្ត្រីដែលមានសក្ដានុពល និងលក្ខណៈសម្បត្តិគ្រប់គ្រាន់ ដើម្បីបំពេញក្ដីសង្ឃឹមរបស់ប្រជាពលរដ្ឋទូទាំងប្រទេស»។
នៅពេលសួរថា តើលោក ហ៊ុន ម៉ាណែត យកគំរូតាមឪពុកឬយ៉ាងណានោះ? លោក សុខ ឥសាន បានថ្លែងថា លោក ហ៊ុន ម៉ាណែត គឺគ្រាន់តែយកបទពិសោធជាច្រើនដែលត្រូវការដើម្បីដឹកនាំប្រទេស។
លោកបន្តថា៖ «វាជារឿងធម្មតា ក្នុងនាមជាអ្នកស្នងតំណែង […] ដើម្បីធ្វើជានាយករដ្ឋមន្ត្រី គាត់ត្រូវធ្វើកិច្ចការធំៗ ការងារលំបាកៗក្នុងការគ្រប់គ្រង។ គាត់ត្រូវតែចេញក្រៅ ដើម្បីទទួលបានបទពិសោធកាន់តែច្រើន។ នោះគឺជាបទពិសោធការងារ»។
បកប្រែនិងសម្រួលចេញពីអត្ថបទដើមភាសាអង់គ្លេស៖ As Profile Rises, Hun Manet Adopts Some of Father’s Habits
