អ្នកគាំទ្រគណបក្សភ្លើងទៀនមួយរូបនៅខេត្តត្បូងឃ្មុំ ត្រូវបានគេបាញ់ជាច្រើនគ្រាប់បណ្ដាលឱ្យស្លាប់ភ្លាមៗ ខណៈសមត្ថកិច្ចនៅមិនទាន់អាចឆ្លើយបាន ថាតើអំពើឃាតកម្មនេះបណ្ដាលមកពីមូលហេតុអ្វីឱ្យពិតប្រាកដនៅឡើយ។
អ្នកគាំទ្រគណបក្សភ្លើងទៀន លោក ប៉ូ ហ៊ីនលាន រស់នៅភូមិព្រីង ឃុំចក ស្រុកអូររាំងឪ ខេត្តត្បួងឃ្មុំ ត្រូវបានជនមិនស្គាល់មុខបាញ់សម្លាប់ ក្នុងពេលកំពុងរកត្រី កាលពីទាបភ្លឺថ្ងៃអាទិត្យ ទី១៦ ខែតុលា ឆ្នាំ២០២២។
ភរិយាលោក ប៉ូ ហ៊ីនលាន គឺអ្នកស្រី វេន គឹមយី ប្រាប់នៅថ្ងៃទី១៨ ខែតុលានេះថា ស្វាមីគាត់ត្រូវបានគេបាញ់ពីក្រោយខ្នងចំនួន៣គ្រាប់ បណ្ដាលឱ្យស្លាប់ អំឡុងពេលប្តីរបស់គាត់កំពុងរកត្រីនៅតាមវាលស្រែ ដែលមានចម្ងាយប្រមាណ២គីឡូម៉ែត្រពីផ្ទះ។ ក្រោយពីបានឮស្នូរគ្រាប់កាំភ្លើងហើយ អ្នកស្រីក៏បានចុះទៅដល់កន្លែងកើតហេតុ នៅម៉ោងប្រមាណ៣កន្លះទាបភ្លឺ ថ្ងៃអាទិត្យ ទី១៦ ខែតុលា។
អ្នកស្រីថា៖ «ខ្ញុំសួរប៉ូលិសថា តើអ្នកណាបាញ់ និងសម្លាប់ប្ដីខ្ញុំ ? ប៉ូលិសគាត់ថាប្រជាការពារ ភូមិ [គឺជា] អ្នកបាញ់។ ខ្ញុំថាប្រជាការពារភូមិ គាត់អត់មានកាំភ្លើងទេ តែបើប៉ូលិសបានគាត់មានកាំភ្លើង។ ខ្ញុំយំផង និងថាផង! ដល់ទៅ ខ្ញុំថាខ្ញុំមិនអស់ចិត្តទេ»។
អ្នកស្រីបន្តថា នៅថ្ងៃអង្គារនេះ គាត់បានទាក់ទងទៅសមត្ថកិច្ច ដើម្បីសួរនាំពីដំណើររឿងក្ដីរបស់ស្វាមីដែរ ប៉ុន្តែសមត្ថកិច្ចប្រាប់ថាកំពុងធ្វើការងារនេះ។
អ្នកស្រីថា៖ «ខ្ញុំកំពុងឱ្យគាត់រកហេតុផល និងយុត្តិធម៌ឱ្យខ្ញុំ។ ព្រឹកមិញ ខ្ញុំតេទៅគាត់ទៀត[សមត្ថកិច្ច] គាត់ថាកុំអាលចែ ព្រោះអីគេកំពុងចរចាគ្នា»។
មេប៉ុស្តិ៍ឃុំចក លោក អន សំអុន បដិសេធធ្វើអត្ថាធិប្បាយ ដោយបង្វែរឱ្យអ្នកសារព័ត៌មានសួរទៅស្នងការនគរបាលខេត្តត្បូងឃ្មុំវិញ ក្រោមហេតុផលថា សំណុំរឿងនេះ លោកបានបញ្ជូនទៅស្នងការនគរបាលខេត្តអស់ហើយ។
វីអូឌី មិនអាចសុំការបំភ្លឺពីអធិការនគរបាលស្រុកអូររាំងឪ លោក វង់ សុភី និងស្នងការនគរបាលខេត្តត្បូងឃ្មុំ លោក ម៉ុន មាគ៌ា បានទេ នៅអង្គារនេះ។
អ្នកឃ្លាំមើលការរំលោភសិទ្ធិមនុស្ស និងដីធ្លី នៃសមាគមការពារសិទ្ធិមនុស្សអាដហុក ប្រចាំខេត្តត្បូងឃ្មុំ និងខេត្តកំពង់ចាម លោក ឡេង សេងហាន មានប្រសាសន៍ថា ប្រសិនបើជាជនរងគ្រោះប្រើប្រាស់ឧបករណ៍ឆក់ត្រីខុសពីច្បាប់ហាមឃាត់នោះ លោកថា សមត្ថកិច្ចគួរចាប់ខ្លួនមកអប់រំ និងណែនាំ មិនមែនប្រើប្រាស់កាំភ្លើងដើម្បីបាញ់សម្លាប់ទេ។
លោកថា៖ «អំពើបាញ់សម្លាប់ហ្នឹងជាអំពើសាហាវណាស់ ហើយសម្លាប់ក្រៅច្បាប់ទៀត។ អ៊ីចឹងច្បាប់ គេហាម មិនឱ្យមានអំពើហ្នឹងកើតឡើងទេ ព្រោះច្បាប់កម្ពុជាយើងមិនមានដាក់ទោសប្រហារជីវិតទេ គឺទោសអស់មួយជីវិត យើងមាន។ អ៊ីចឹងអំពើបែបហ្នឹងជាអំពើផ្ទុយពីគោលការណ៍ច្បាប់។ អ៊ីចឹងយើងជាសង្គមស៊ីវិល ជាមន្ត្រីឃ្លាំមើលការរំលោភសិទ្ធិមនុស្ស ជំរុញឱ្យអាជ្ញាធរពាក់ព័ន្ធ បើអាចបាន គួរតែបង្កើតគណៈកម្មការជំនាញមួយក្នុងការស្រាវជ្រាវរកឱ្យឃើញ ថាតើជនប្រព្រឹត្តជានរណា ដើម្បីចាប់ជនល្មើសមកផ្ដន្ទាទោស និងអាចឱ្យសាច់ញាតិជនរងគ្រោះអស់ចិត្ត និងទទួលបាននូវយុត្តិធម៌»៕