គណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសពីការចាប់ផ្ដើមការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ នៅតាមសាលាឃុំ-សង្កាត់ ពីថ្ងៃទី២០ ខែតុលា ដល់ថ្ងៃទី៨ ខែធ្នូ។
សេចក្តីប្រកាសព័ត៌មានរបស់ គ.ជ.ប នៅថ្ងៃព្រហស្បតិ៍នេះ បានលើកឡើងថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំនេះ មានរយៈពេល៥០ថ្ងៃ គិតទាំងថ្ងៃសៅរ៍ និងអាទិត្យ។ ប្រភពដដែលបន្តថា ក្នុងរយៈពេលនៃការពិនិត្យបញ្ជីឈ្មោះ និងចុះឈ្មោះបោះឆ្នោតនេះ ក្រុមប្រឹក្សាឃុំ-សង្កាត់ ត្រូវបិទការិយាល័យចុះឈ្មោះបោះឆ្នោត ចំនួន៣ថ្ងៃ គឺនៅថ្ងៃទី៣ និងថ្ងៃទី១៨ ខែវិច្ឆិកា និងថ្ងៃទី២ ខែធ្នូ ដើម្បីបើកកិច្ចប្រជុំជាមួយក្រុមចុះឈ្មោះបោះឆ្នោត ត្រួតពិនិត្យការអនុវត្តការពិនិត្យបញ្ជីឈ្មោះ និងការចុះឈ្មោះបោះឆ្នោត។
បើតាម គ.ជ.ប មានតែប្រជាពលរដ្ឋខ្មែរដែលមានឈ្មោះក្នុងបញ្ជីបោះឆ្នោតផ្លូវការឆ្នាំ២០២២ប៉ុណ្ណោះ ដែលមានសិទ្ធិបោះឆ្នោតសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នាពេលខាងមុខ។
ករណីនេះ គ.ជ.ប បានអំពាវនាវដល់ប្រជាពលរដ្ឋទាំងអស់ដែលមិនទាន់បានចុះឈ្មោះបោះឆ្នោត ឬទើបគ្រប់អាយុបោះឆ្នោត អញ្ជើញទៅចុះឈ្មោះបោះឆ្នោតឱ្យបានគ្រប់ៗគ្នា។
នៅព្រឹកថ្ងៃព្រហស្បតិ៍នេះដែរ លោកនាយករដ្ឋមន្ត្រី ហ៊ុន សែន បានអំពាវនាវដល់មន្រ្តីអត្រានុកូលដ្ឋាន ជួយសម្រួលឯកសារសម្រាប់ការបោះឆ្នោត ជូនដល់ប្រជាពលរដ្ឋនៅក្នុងមូលដ្ឋានរៀងៗខ្លួនឱ្យបានទាន់ពេលវេលាផងដែរ។
ការអំពាវនាវនេះបានធ្វើឡើងក្នុងឱកាសលោកអញ្ជើញទៅប្តូរព័ត៌មានថ្ងៃខែឆ្នាំកំណើត ក្នុងបញ្ជីឈ្មោះបោះឆ្នោត នៅសង្កាត់តាខ្មៅ ក្រុងតាខ្មៅ ខេត្តកណ្ដាល។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា៖ «បញ្ហាអត្តសញ្ញាណបណ្ណ គឺមិនមែនជាបញ្ហារបស់ គ.ជ.ប ទេ ប៉ុន្តែគឺជាបញ្ហារបស់មន្ត្រីអត្រានុកូលដ្ឋាន ដែលខ្ញុំសូមយកឱកាសនេះអំពាវនាវឱ្យមន្ត្រីអត្រានុកូលដ្ឋានទាំងអស់ នៅគ្រប់ទីកន្លែង ធ្វើការបញ្ជាក់[ឯកសារ]ណាដែលអាចយកធ្វើជាការចុះឈ្មោះបោះឆ្នោតបាន គឺជួយសម្រួលសម្រាប់កិច្ចការទាំងនោះ។ វាមានក្រៅពីអត្តសញ្ញាណបណ្ណ គឺអាចមានលិខិតស្នាមផ្សេងទៀតដែលគណៈកម្មាធិការជាតិរៀបចំការបោះឆ្នោតបានណែនាំហើយ»។
លោកបន្ថែមថា៖ «តែខ្ញុំក៏សូមយកឱកាសនេះអំពាវនាវចំពោះមន្ត្រីដែលមានការពាក់ព័ន្ធ ជួយធ្វើការបញ្ជាក់ ជួយពន្លឿននៃការធ្វើអត្តសញ្ញាណបណ្ណ ដើម្បីឱ្យ[ប្រជាពលរដ្ឋ]បានមកចុះឈ្មោះបោះឆ្នោត ឬផ្ទេរឈ្មោះបោះឆ្នោតពីកន្លែងមួយទៅកាន់កន្លែងមួយ ទាន់ពេលវេលា ក្នុងរយៈពេលដែលកំណត់ដោយគណៈកម្មាធិការជាតិរៀបចំការបោះឆ្នោត»។
លោកនាយករដ្ឋមន្ត្រី ហ៊ុន សែន ក៏បានអំពាវនាវដល់គណបក្សនយោបាយទាំងអស់ដែលចូលរួមការបោះឆ្នោត អំពាវនាវដល់អ្នកគាំទ្ររបស់ខ្លួននិងប្រជាពលរដ្ឋបន្ថែមទៀតឱ្យចូលរួមបោះឆ្នោតជ្រើសរើសគណបក្សនយោបាយដែលខ្លួនពេញចិត្ត ក្នុងការបោះឆ្នោតនាពេលខាងមុខនេះផងដែរ។
គួរបញ្ជាក់ថា រដ្ឋាភិបាលបានកំណត់កាលបរិច្ឆេទរួចហើយថា ការបោះឆ្នោតជ្រើសតាំងតំណាងរាស្ត្រសម្រាប់នីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣៕