អ្នកនយោបាយជើងចាស់វ័យ៨១ឆ្នាំ លោក គង់ គាំ ដែលបច្ចុប្បន្នជាឧត្ដមទីប្រឹក្សាគណបក្សភ្លើងទៀន បានផ្ញើសារបែបឌឺដងទៅកាន់លោកនាយករដ្ឋមន្ត្រី ហ៊ុន សែន ថាជា«មេដឹកនាំសម្លុត» ដែលការណ៍នេះ លោកអំពាវនាវដល់ក្រុមប្រឹក្សាជាប់ឆ្នោតរបស់ខ្លួន កុំឱ្យមានការភ័យខ្លាចក្នុងដំណើរឆ្ពោះទៅកាន់ការបោះឆ្នោតជាតិ ឆ្នាំ២០២៣។
ការថ្លែងរបស់លោក គង់ គាំ នេះធ្វើឡើងក្នុងពិធីប្រកាសសុពលភាពក្រុមការងារគណបក្សភ្លើងទៀន នៅស្រុកព្រៃឈរ ខេត្តកំពង់ចាម កាលពីថ្ងៃព្រហស្បតិ៍ ម្សិលមិញ។
លោកថា៖ «លោក ហ៊ុន សែន មេដឹកនាំសម្លុត! យើងគណបក្សភ្លើងទៀន មេដឹកនាំបរិសុទ្ធ និយមការសន្ទនា អត់ខ្លាចដាច់ខាត»។
លោកគូសបញ្ជាក់ថា បច្ចុប្បន្ន សារគំរាមបានក្លាយជាការរួមរស់សម្រាប់ដៃគូប្រជែង ដែលការណ៍នេះ លោកអំពាវនាវទៅក្រុមប្រឹក្សាជាប់ឆ្នោត កុំឱ្យមានការភ័យខ្លាចលើទីលានប្រកួតសន្លឹកឆ្នោត ឆ្នាំ២០២៣ ខាងមុខ។
លោក គង់ គាំ ថ្លែងថា៖ «ដូច្នេះ សេចក្តីថ្លែងការណ៍របស់គណបក្សភ្លើងទៀន តបទៅនឹងការគំរាមរំលាយ[គណបក្សភ្លើងទៀន]របស់លោក ហ៊ុន សែន បានធ្វើឱ្យឥរិយាបថលោកនាយករដ្ឋមន្ត្រី ហ៊ុន សែន ដូរពីគំរាម មកថាអាចរួមរស់ប្រជែងជាមួយគ្នាបាន»។
បើគ្មានអ្វីប្រែប្រួលទេ ការបោះឆ្នោតជ្រើសតាំងតំណាងរាស្ត្រី នីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ដែលនៅសល់ប្រមាណជា៨ខែទៀតប៉ុណ្ណោះ។
លោក គង់ គាំ ជាអតីតមន្រីជាន់ខ្ពស់គណបក្សសង្គ្រោះជាតិដែលតុលាការរំលាយ និងក៏ជាអតីតមន្ត្រីជាន់ខ្ពស់គណបក្សប្រជាជនកម្ពុជា នៅក្រសួងការបរទេសអំឡុងទសវត្សរ៍៨០។
ក៏ប៉ុន្តែក្រោយពីមានបញ្ហាក្នុងជួរបក្ស លោក គង់ គាំ បានប្រឡូកចូលក្នុងជីវភាពនយោបាយជាមួយគណបក្សសម រង្ស៊ី របស់លោក សម រង្ស៊ី ចាប់ពីឆ្នាំ១៩៩៥មក។
ក្នុងពិធីចែកស្រូវពូជដល់ប្រជាពលរដ្ឋរងគ្រោះដោយទឹកជំនន់នៅខេត្តកំពង់ឆ្នាំង កាលពីថ្ងៃទី២៦ ខែតុលា ឆ្នាំ២០២២ លោកនាយករដ្ឋមន្ត្រី ហ៊ុន សែន បានថ្លែងបែបគំរាមពីវិធានការរំលាយគណបក្សភ្លើងទៀន បើមេដឹកនាំបក្សនេះមិនបញ្ជាក់ជំហរពីការមិនជាប់ពាក់ព័ន្ធនឹងការទទួលថវិកាពីមេដឹកនាំនៅក្រៅប្រទេសមួយចំនួន ដែលលោកថាជាទណ្ឌិត រួមទាំងការថ្លែងរបស់លោក សម រង្ស៊ី ជាស្ថាបនិកគណបក្សភ្លើងទៀន ជុំវិញការប្រមាថព្រះមហាក្សត្រ។
លោកថា៖ «ច្បាប់ស្តីពីគណបក្សនយោបាយ គឺចែងមិនឱ្យមានទំនាក់ទំនងទណ្ឌិតនោះទេ ដូច្នេះចំណុចនេះគ្រាន់តែប្រាប់អ្នកឯងឱ្យបានដឹងថាតម្រុយឆ្ពោះទៅរកដំណាក់កាលមួយកំពុងប្រឈមសម្រាប់អ្នកឯង ហើយអាចបក្សខ្លះអាចរលាយក៏អាចថាបាន ប្រសិនបើគេធ្វើសកម្មភាពស្របជាមួយជនក្បត់»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងផ្សេងពីនេះ ដោយសម្អាងថា អ្វីដែលបានកើតឡើងជាការរំឭកអ្នកនយោបាយកុំឱ្យដើរចេញពីគន្លងច្បាប់។
លោកថា៖ «ហើយក្រុមសកម្មជនមួយចំនួនដែលដើរតាមក្រុមឧទ្ទាមក្រៅច្បាប់ហ្នឹង វាមាននរណាសម្លុត? ទង្វើរបស់គាត់មានពិរុទ្ធភាព ដែលច្បាប់ចោទប្រកាន់លើគាត់ ដូច្នេះហើយគាត់ជាប់ពិរុទ្ធភាព។ អារឿងជាប់គុកជាប់ច្រវាក់អីហ្នឹងដោយសារអី? ដោយសារគាត់ធ្វើខុស មិនមាននរណាសម្លុតគាត់ទេ»។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា មើលឃើញថា គណបក្សភ្លើងទៀន នឹងមិនមែនជាគោលដៅរំលាយទេ ព្រោះបក្សនេះមិនមានសក្ដានុពលគំរាមកំហែងអំណាចតាមរយៈសន្លឹកឆ្នោតដល់បក្សកាន់អំណាច ដូចកាលពីឆ្នាំ២០១៣ និងឆ្នាំ២០១៧។
មួយវិញទៀត លោកថា នៅអាណត្តិក្រោយ បក្សកាន់អំណាចក៏ចង់បន្តលេងល្បែងនេះតាមយន្តការមានពហុបក្ស តែមិនគំរាមអំណាច ដើម្បីសម្រេចផែនការបន្តវេនរបស់បក្សកាន់អំណាចផងដែរ។
លោកថា៖ «លុះត្រាតែមានចរន្តរួបរួមគ្នា មានចរន្តនយោបាយអ្នកប្រជាធិបតេយ្យហ្នឹងខ្លាំង។ បើកម្លាំងហ្នឹង តម្លៃនយោបាយបច្ចុប្បន្ននេះ វាមិនទាន់ឈានទៅដល់ធ្វើឱ្យគណបក្សកាន់អំណាចហ្នឹងត្រូវតែជំរុញឱ្យមានការរំលាយគណបក្សភ្លើងទៀនទៀតទេ»។
ប៉ុន្តែយ៉ាងណា លោកគិតថា ពីពេលនេះរហូតទៅដល់ថ្ងៃបោះឆ្នោត គណបក្សនេះនៅតែបន្តជួបព្យុះភ្លៀង បើទោះជាគេរំពឹងថាចប់បម្រាមនយោបាយត្រឹមថ្ងៃទី១៦ ខែវិច្ឆិកានេះ នឹងមានអ្នកនយោបាយស្មោះស្ម័គ្រច្រើនទៀតនឹងមកចូលរួមជាមួយបក្សភ្លើងទៀន ជំរុញឱ្យមានកាកៀរគរអ្នកគាំទ្របានច្រើនជាងមុនក្ដី។
បញ្ហានេះ សហគមន៍អន្តរជាតិ និងប្រទេសលោកសេរី បានទាមទារទៅរដ្ឋាភិបាលម្ពុជាបើកលំហប្រជាធិបតេយ្យនៅមុនការបោះឆ្នោតជាតិឆ្នាំ២០២៣ ដើម្បីឱ្យការបោះឆ្នោតជាតិអាណត្តិថ្មីនេះមានលក្ខណៈសេរី ត្រឹមត្រូវ និងយុត្តិធម៌ តាមគន្លងប្រជាធិបតេយ្យឡើងវិញ៕