ក្រុមគ្រួសាររបស់លោក គង់ អួន បានអះអាងថា លោក គង់អួន ដែលជាសមាជិកគណបក្សភ្លើងទៀន ត្រូវបានអាជ្ញាធរចាប់ខ្លួនកាលពីថ្ងៃទី៧ ខែធ្នូ ឆ្នាំ២០២២ ដោយពុំមានដីកា ក្រោយពីមានជម្លោះជាមួយអ្នកជិតខាងដែលជាសាច់ញាតិរបស់អធិការរងនគរបាលស្រុក។
ក្មួយប្រុសរបស់លោក គង់ អួន គឺលោក ឡុក ឈាន ឱ្យដឹងថា មុនពេលចាប់ខ្លួន គ្រួសាររបស់លោកមានជម្លោះដីធ្លីនៅភូមិក្រោម ឃុំកោះចូរ៉ាម ស្រុកខ្សាច់កណ្ដាល ខេត្តកណ្ដាល ជាមួយនឹងគ្រួសារម្ខាងទៀតដែលជាសាច់ញាតិរបស់អធិការរងនគរបាលស្រុកខ្សាច់កណ្ដាល។
លោកថា នៅថ្ងៃកើតហេតុ គឺនៅព្រឹកថ្ងៃទី៧ ខែធ្នូ ម្ដាយរបស់លោកដែលជាបងថ្លៃរបស់លោក គង់ អួន បានបោសសំរាមនៅមុខផ្ទះ ស្រាប់តែពេលនោះ ភាគីម្ខាងទៀតដែលជាអ្នកជិតខាងបានយកសំរាមពីផ្ទះរបស់ខ្លួន មកចាក់លើកន្លែងដាក់សំរាមនៅផ្ទះរបស់លោក ឡុក ឈាន។ ក្នុងពេលនោះដែរ លោក គង់ អួន បានមកមើល រួចក៏ឆ្លើយឆ្លងសម្តីគ្នារហូតឈានដល់ការប្រកែក ប៉ុន្តែមិនបានប្រព្រឹត្តអំពើហិង្សាលើគ្នាទៅវិញទៅមកនោះទេ។ លុះមួយសន្ទុះក្រោយមក លោក គង់ អួន បានយកកាំបិតទៅកាប់ដើមឈើមួយដើមដែលស្ថិតនៅក្នុងបរិវេណដីផ្ទះបងថ្លៃរបស់លោក ដែលជាកន្លែងទើបកើតហេតុឈ្លោះទាស់ទែងគ្នា ហើយក៏មិនបានបង្កហិង្សា ឬធ្វើឱ្យមានគ្រោះថ្នាក់ដល់ភាគីម្ខាងទៀតនោះដែរ។ ប៉ុន្តែក្រោយមក លោកត្រូវបានសមត្ថកិច្ចទៅចាប់ខ្លួនដល់ផ្ទះរបស់លោកតែម្តង។
លោក ឡុក ឈាន យល់ថា ករណីចាប់ខ្លួននេះ គឺជារឿងអយុត្តិធម៌ ដែលលោកថា អ្នកមានអំណាចបានប្ដឹងនគរបាលឱ្យមកចាប់ខ្លួនពូរបស់លោក ដោយគ្រាន់តែកាប់ដើមឈើខ្លួនឯង តែបែរជាចោទប្រកាន់ពីបទ«បំផ្លិចបំផ្លាញទ្រព្យសម្បត្តិរបស់អ្នកដទៃ»ទៅវិញ។
លោកថា៖ «កាប់ដើមឈើលើដីខ្លួនឯង ខ្ញុំថាអយុត្តិធម៌ គេអត់ឱ្យយើងដើរ។ ហើយខុស គេយកទៅដាក់គុកដាក់អីទៀត គាត់មានអំណាច»។
ទាក់ទងនឹងរឿងនេះ លេខាគណបក្សភ្លើងទៀន ស្រុកខ្សាច់កណ្ដាល លោក ហាក់ ឈុនលី បានឱ្យដឹងថា លោក គង់ អួន ដែលជាសមាជិកគណបក្សភ្លើងទៀន នៅឃុំកោះចូរ៉ាម ដែលត្រូវបានអាជ្ញាធរចាប់ខ្លួននោះ គឺក្រោយពីមានជម្លោះជាមួយអ្នកជិតខាងដែលត្រូវជាសាច់ញាតិរបស់អធិការរងនគរបាលស្រុកខ្សាច់កណ្ដាល ។
លោក ហាក់ ឈុនលី បន្ថែមថា នៅពេលអាជ្ញាធរចាប់ខ្លួនលោក គង់ អួន នោះ អាជ្ញាធរមិនបានបង្ហាញដីកាចាប់ខ្លួន និងមិនបានបញ្ជាក់ពីមូលហេតុនៃការចាប់ខ្លួននោះឡើយ។ លោកបន្តថា ករណីនេះ វាអាចទាក់ទងនឹងរឿងនយោបាយ និងចាត់ទុកថាជារឿងអយុត្តិធម៌ប្រសិនបើសមាជិករបស់លោកគ្មានកំហុសនោះ។
លោកថា៖ «បើសិនជារឿងនេះពាក់ពន្ធនឹងរឿងម្ខាងទៀត ដែលគាត់ដាក់ពាក្យបណ្ដឹង ហើយហៅប៉ូលិសមកចាប់ខ្លួន មានន័យថា អធិការគាត់ធ្វើតាមប្រជាពលរដ្ឋសូកប៉ាន់ទៅ មកចាប់ខ្លួនដោយគ្មានដីកា ហើយមិនមែនជាបទល្មើសជាក់ស្ដែងទៀត»។
ថ្លែងប្រាប់វីអូឌីនៅថ្ងៃព្រហស្បតិ៍នេះ អធិការនគរបាលស្រុកខ្សាច់កណ្ដាល លោក ម៉ែន សុឃឿន ឱ្យដឹងយ៉ាងខ្លីថា លោក គង់ អូន ត្រូវបានសមត្ថកិច្ចចាប់ខ្លួនពាក់ព័ន្ធនឹងករណីបំផ្លិចបំផ្លាញទ្រព្យសម្បត្តិរបស់អ្នកដទៃ និងឱ្យសួរបន្តទៅកាន់ស្នងការនគរបាលខេត្តកណ្តាល។
លោកថា៖ «ប្អូនចាំសួរទៅស្នងការទៅ ពាក់ព័ន្ធនឹងគាត់! គាត់បំផ្លិចបំផ្លាញទ្រព្យសម្បត្តិអ្នកដទៃ»។
ទោះជាយ៉ាងណា វីអូឌី មិនទាន់សុំការឆ្លើយតបពីស្នងការនគរបាលខេត្តកណ្ដាល លោក ឈឿន សុចិត្ត បាននៅឡើយទេ នៅថ្ងៃដដែលនេះ៕