ប្រជាជនបានតម្រង់ជួរ នៅថ្ងៃចន្ទនេះ នៅខាងក្រៅគ្លីនិកគ្រុនក្ដៅ នៃមន្ទីរពេទ្យមួយកន្លែង ក្នុងប្រទេសចិន ដើម្បីពិនិត្យរកជំងឺកូវីដ-១៩ ដែលជាសញ្ញាបង្ហាញពីការរីករាលដាលយ៉ាងឆាប់រហ័សនៃជំងឺកូវីដ-១៩ បន្ទាប់ពីអាជ្ញាធរបានបន្ធូរបន្ថយវិធានការទប់ស្កាត់ជំងឺនេះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters។
អស់រយៈពេល៣ឆ្នាំនៃការរាតត្បាតជំងឺកូវីដ-១៩ ប្រទេសចិនកំពុងរៀនរស់នៅជាមួយជំងឺកូវីដ-១៩ ដោយបានផ្លាស់ប្ដូរគោលនយោបាយដ៏សំខាន់របស់ខ្លួន កាលពីថ្ងៃពុធសប្ដាហ៍មុន បន្ទាប់ពីការតវ៉ាដែលមិនធ្លាប់មានពីមុនមក ប្រឆាំងនឹងវិធានការទប់ស្កាត់ជំងឺកូវីដ-១៩ «សូន្យកូវីដ»។
ប្រទេសចិនបានបញ្ឈប់ការធ្វើតេស្តរកជំងឺកូវីដ-១៩ នៅក្នុងសកម្មភាពជាច្រើន រួមទាំងការកាត់បន្ថយការធ្វើចត្តាឡីស័ក ហើយនៅថ្ងៃចន្ទនេះ ប្រទេសនេះកំពុងរៀបចំបិទដំណើរការកម្មវិធីទូរសព្ទដែលប្រើដើម្បីតាមដានប្រវត្តិនៃការធ្វើដំណើររបស់ប្រជាជនចំនួន ១,៤ពាន់លាននាក់។
អ្នកវិភាគ បាននិយាយថា ប្រទេសចិនត្រូវត្រៀមខ្លួនសម្រាប់រលកថ្មីនៃជំងឺកូវីដ-១៩ ដែលអាចធ្វើឱ្យប្រព័ន្ធសុខាភិបាលមានភាពផុយស្រួយ ហើយអាជីវកម្មប្រឈមនឹងការបិទទ្វារ។
យុវសិស្សម្នាក់ឈ្មោះ តាន (Tan) អាយុ១៨ឆ្នាំ បានប្រាប់ Reuters ថា៖ «ខ្ញុំពិតជាខ្លាចឆ្លងជំងឺកូវីដ-១៩ ព្រោះចំនួនអ្នកឆ្លងកំពុងកើនឡើងនៅក្នុងទីក្រុងប៉េកាំង»។
Reuters ក៏បានឃើញមនុស្សតម្រង់ជួរនៅខាងក្រៅគ្លីនិក នៅកណ្ដាលទីក្រុងវូហាន (Wuhan) ជាកន្លែងដែលជំងឺកូវីដ-១៩ បានផ្ទុះឡើងជាលើកដំបូងកាលពី៣ឆ្នាំមុន។
វេជ្ជបណ្ឌិតម្នាក់ដែលធ្វើការនៅផ្នែកផ្លូវដង្ហើមនៅមន្ទីរពេទ្យទីក្រុងប៉េកាំង ត្រូវបានស្រង់សម្តីដោយកាសែត Global Times ដែលគាំទ្រដោយរដ្ឋ កាលពីថ្ងៃអាទិត្យថា ចំនួនអ្នកជំងឺដែលរង់ចាំចូលសម្រាកព្យាបាលនៅគ្លីនិកសង្គ្រោះបន្ទាន់ និងគ្រុនក្តៅកំពុងកើនឡើង។
ការអត្ថាធិប្បាយនៅក្នុងកាសែត Shanghai Securities News ដែលគាំទ្រដោយរដ្ឋ លោក ហ្ស៉ាង វ៉េនហុង (Zhang Wenhong) ប្រធានក្រុមអ្នកជំនាញនៅក្នុងមជ្ឈមណ្ឌលពាណិជ្ជកម្ម បាននិយាយថា ការផ្ទុះឡើងនៃជំងឺកូវីដ-១៩ អាចឈានដល់កម្រិតខ្ពស់បំផុតក្នុងរយៈពេល១ខែ បើទោះបីជាការបញ្ចប់នៃការរាតត្បាតអាចចំណាយពេលពី៣ ទៅ៦ខែក៏ដោយ។
គួរបញ្ជាក់ថា បាតុកម្មទ្រង់ទ្រាយធំមិនធ្លាប់មានពីមុនមកនៅក្នុងប្រទេសចិន ចាប់តាំងពីប្រធានាធិបតីចិន លោក ស៊ី ជីនពីង (Xi Jinping) ឡើងកាន់អំណាចអស់រយៈពេលមួយទសវត្សរ៍ ប្រឆាំងនឹងវិធានការ «សូន្យកូវីដ» ដែលត្រូវបានដាក់ចេញជិត ៣ឆ្នាំ ចាប់តាំងពីការរីករាលដាលនៃជំងឺកូវីដ-១៩។
អ្វីដែលធ្វើឱ្យក្រុមបាតុករផ្ទុះកំហឹងកាន់តែខ្លាំងនោះ គឺអគ្គិភ័យកាលពីថ្ងៃទី២៤ ខែវិច្ឆិកា ឆ្នាំ២០២២ នៅឯអគារលំនៅឋានដ៏ខ្ពស់មួយកន្លែង នៅរដ្ឋធានីទីហ័រ (Urumqi) នៃតំបន់ស៊ីជាំង (Xinjiang) ដែលបានសម្លាប់មនុស្ស១០នាក់ ហើយដែលក្រុមបាតុករចោទថាបណ្ដាលមកពីវិធានការបិទខ្ទប់។
ជាការឆ្លើយតបនឹងក្រុមបាតុករ រដ្ឋាភិបាលក្រុងប៉េកាំង បានបន្ធូរបន្ថយវិធានការទប់ស្កាត់ជំងឺកូវីដ-១៩៕
