មេធាវីការពារក្ដីឱ្យលោក សុន ឆ័យ គ្រោងដាក់ពាក្យបណ្ដឹងសាទុក្ខនៅតុលាការកំពូលនាពេលឆាប់ៗនេះ ដើម្បីច្រានចោលសេចក្ដីសម្រេចរបស់សាលាឧទ្ធរណ៍ ដែលបានសម្រេចឱ្យអនុប្រធានគណបក្សភ្លើងទៀនរូបនេះមានទោស ព្រមទាំងបង្កើនប្រាក់សំណងជំងឺចិត្តដែលតុលាការបង្គាប់ឱ្យផ្ដល់ជូនទៅបក្សកាន់អំណាចដល់ចំនួន ១លានដុល្លារអាមេរិក។
កាលពីថ្ងៃទី១៤ ខែធ្នូ ឆ្នាំ២០២២ សាលាឧទ្ធរណ៍រាជធានីភ្នំពេញ បានតម្កល់សេចក្ដីសម្រេចរបស់សាលាដំបូងរាជធានីភ្នំពេញ ទុកជាបានការ ក្នុងសំណុំរឿងចំនួន២ របស់លោក សុន ឆ័យ និងបានបង្កើនប្រាក់ពិន័យក្នុងសំណុំរឿងនីមួយៗ រហូតដល់ ១០លានរៀល និងសំណងជំងឺចិត្តដល់បក្សកាន់អំណាចចំនួន ៤ពាន់លានរៀល ឬស្មើប្រមាណ ១លានដុល្លារអាមេរិក។
លោក កែត ឃី មេធាវីការពារក្តីឱ្យលោក សុន ឆ័យ ចាត់ទុកការសម្រេចរបស់សាលាទ្ធរណ៍ ថាជារឿងអយុត្តិធម៌ ខណៈកូនក្តីរបស់លោកមិនបានធ្វើខុសដូចការចោទប្រកាន់នោះ។ ករណីនេះ លោកថា លោកបានត្រៀមរៀបចំពាក្យបណ្តឹងសាទុក្ខដាក់ទៅតុលាការកំពូលក្នុងពេលឆាប់ៗនេះ ដើម្បីស្នើសុំឱ្យតុលាការជាន់ខ្ពស់មួយនេះទម្លាក់ចោលការចោទប្រកាន់លើកូនក្តីរបស់លោក។
លោកមានប្រសាសន៍ថា៖ «ចាំមើលយើងសួរនាំមន្ត្រីសាលាឧទ្ធរណ៍ ថាតើថ្ងៃណាបានចេញសាលដីកាផ្លូវការមកឱ្យយើង ដើម្បីយើងដាក់ពាក្យបណ្តឹងសាទុក្ខទៅតុលាការកំពូល។ តែទោះបីជាយ៉ាងណា យើងមិនឱ្យហួសពី១ខែ ព្រោះហួស១ខែយើងប្តឹងអត់បានទេ។ តែទោះបីជាមិនទាន់បានសាលដីកា ក៏យើងដាក់ពាក្យប្តឹងមុនដែរ ដើម្បីទាមទារយុត្តិធម៌ឱ្យកូនក្តីយើង»។
គួរបញ្ជាក់ថា ទាក់ទិននឹងករណីនេះ សាលាដំបូងរាជធានីភ្នំពេញ កាលពីខែតុលាកន្លងទៅ បានប្រកាសសាលក្រមឱ្យលោក សុន ឆ័យ ចាញ់ក្ដីក្នុងសំណុំរឿងបរិហារកេរ្តិ៍ ដែលប្ដឹងដោយ គ.ជ.ប. និង គណបក្សប្រជាជនកម្ពុជា ដោយបានសម្រេចឱ្យរូបលោកផ្ដល់សំណងជំងឺចិត្តដល់គណបក្សកាន់អំណាចមួយនេះចំនួន «៣ពាន់លានរៀល» ឬស្មើប្រមាណ «៧៥ម៉ឺនដុល្លារ»។
ក្រៅពីការសម្រេចនេះ ចៅក្រមជំនុំជម្រះ ក៏បានបង្គាប់ឱ្យលោក សុន ឆ័យ បង់ប្រាក់ពិន័យចំនួន៨លានរៀលចូលថវិការដ្ឋ។ បន្ថែមពីលើនេះ លោកក៏ត្រូវបានតុលាការតម្រូវឱ្យបង់ប្រាក់ពិន័យចំនួន៩លានរៀលបន្ថែមទៀតចូលថវិការដ្ឋ ក្នុងបណ្ដឹងបរិហារកេរិ៍្តរបស់គ.ជ.ប. ផងដែរ។
សាលាដំបូងរាជធានីភ្នំពេញ កាលពីខែមុន ក៏បានចេញដីកាសម្រេចរឹបអូសជាបណ្តោះអាសន្ននូវផ្ទះ២កន្លែងរបស់លោក សុន ឆ័យ នៅរាជធានីភ្នំពេញ និងខេត្តសៀមរាប ថែមទៀតផង។
ក្រុមសិទ្ធិមនុស្ស និងអ្នកសង្កេតការណ៍បោះឆ្នោតមួយចំនួន ក៏ធ្លាប់បានកត់សម្គាល់ពីភាពមិនប្រក្រតីនានាក្នុងអំឡុងការបោះឆ្នោតកាលពីខែមិថុនា ឆ្នាំ២០២២ ជាពិសេសការបំភិតបំភ័យលើបេក្ខជនគណបក្សប្រឆាំងអំឡុងពេលឃោសនាបោះឆ្នោត និងវត្តមានមន្ត្រីរដ្ឋដែលមិនពាក់ព័ន្ធនឹងកិច្ចការងារបោះឆ្នោតនៅជុំវិញការិយាល័យបោះឆ្នោត ក្នុងអំឡុងពេលបោះឆ្នោត ៕