មន្រ្តីជាន់ខ្ពស់គណៈកម្មាធិការជាតិរៀបចំការបោះឆ្នោត លើកឡើងថា ចំពោះ «ទម្រង់១១០២» គឺស្ថាប័នជាតិមួយនេះនឹងនៅតែរក្សាជំហរដូចដែលបានអនុវត្តរួចហើយនៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០២២ គឺមិនបានចែកជូនដល់ភ្នាក់ងារគណបក្សនយោបាយដែលស្ថិតនៅក្នុងការិយាល័យបោះឆ្នោតទេ បើទោះបីជាទម្រង់នៃរបាយការណ៍រាប់សន្លឹកឆ្នោតនេះត្រូវបានគណបក្សនយោបាយចាត់ទុកថា វាជាភាពចាំបាច់ដែលមិនអាចខ្វះបាននៅក្នុងដំណើរការបោះឆ្នោតយ៉ាងណាក្តី។
លោក ហង្ស ពុទ្ធា អ្នកនាំពាក្យ គ.ជ.ប. បញ្ជាក់នៅថ្ងៃសុក្រនេះថា ស្ថាប័នជាតិរៀបចំការបោះឆ្នោត បានសម្រេចរួចហើយ គឺមិនអាចផ្តល់ទៅតាមការស្នើសុំពីភាគីពាក់ព័ន្ធបានឡើយ ក្នុងការចែកចាយទម្រង់១១០២នេះ ដល់ភ្នាក់ងារគណបក្សនយោបាយនៅនឹងមណ្ឌលបោះឆ្នោតដូចមុនទៀតនោះឡើយ។
លោកបន្តថា មូលហេតុដែលមិនអាចអនុវត្តបានដូចមុន ព្រោះការសរសេរដោយដៃ ហើយចែកជូនភ្នាក់ងារគណបក្សនយោបាយនេះ វាមានកំហុសកើតឡើងច្រើន និងធ្វើឱ្យប៉ះពាល់ដល់ដំណើរការបោះឆ្នោតផងដែរ។
លោកបន្តថា៖ «ទម្រង់១១០២ រក្សាទុកដដែល ដោយច្បាប់តម្រូវធ្វើ ៣ច្បាប់ មួយច្បាប់បិទនៅមាត់ទ្វារនៅនឹងការិយាល័យរាប់សន្លឹកឆ្នោត ហើយគណបក្សនយោបាយដែលចង់ទទួលយកបាន អាចថតតាមទូរសព្ទដៃ ឬទៅយកទទួលនៅគណៈកម្មការឃុំសង្កាត់រៀបចំការបោះឆ្នោត។ ការចម្លងដោយដៃច្រើនសន្លឹកដើម្បីចែកគ្នាហ្នឹង វាមានបញ្ហាច្រើន ដូចជា ការសរសេរទៅហ្នឹង វាវង្វេង និងមិនត្រឹមត្រូវតួលេខ ជាដើម»។
ចំណែកលោក ហុង សុខហួរ មន្រ្តីជាន់ខ្ពស់គណបក្សភ្លើងទៀន ដែលទទួលបន្ទុកកិច្ចការបោះឆ្នោត យល់ឃើញថា មានតែការរៀបចំដូចការបោះឆ្នោតកាលពី៥ឆ្នាំមុនទេ ដែលអាចនិយាយបានថាជាការបោះឆ្នោតមួយមានភាពជឿជាក់និងទុកចិត្តបាន។
លោកបន្តថា៖ «វាមិនយុត្តិធម៌ ដែលគេហៅថាដូចយើងចង់បានទេ។ បើយើងយកជាគោលថា ការបោះឆ្នោតឆ្នាំ២០១៧ គឺជាការបោះឆ្នោតមួយដែលយើងយល់ថាអាចទទួលយកបាន ទាំងសមាសភាព គ.ជ.ប. និងការរៀបចំទាំងអស់ហ្នឹង យើងគិតថាអាចទទួលយកបានឆ្នាំ២០១៧។ ប៉ុន្តែឆ្នាំក្រោយ ដូចឆ្នាំ២០២២អីហ្នឹង យើងពិបាកទទួលយកតែមែនទែន»។
គណៈកម្មាធិការជាតិរៀបចំការបោះឆ្នោត បានកំណត់យកថ្ងៃទី២២ ខែធ្នូ គឺជាកាលបរិច្ឆេទចុងក្រោយ ដើម្បីបិទបញ្ចប់និងអនុម័ត ស្តីពីបទបញ្ជានិងនីតិវិធីបម្រើឱ្យការបោះឆ្នោតជ្រើសតាំងតំណាងរាស្រ្ត ឆ្នាំ២០២៣។ មន្រ្តី គ.ជ.ប. ឱ្យដឹងថា នៅចំពោះមុខនេះ ស្ថាប័នជាតិរៀបចំការបោះឆ្នោតកំពុងតែរៀបចំក្រោយពីអនុម័តរួច ដែលមានរហូតដល់៣០០ទំព័រ។ នៅបន្ទាប់ពីបោះពុម្ព និងទទួលស្គាល់ជាគោលការណ៍ពីប្រធាន គ.ជ.ប. ហើយនឹងចែកចាយអំពីបទបញ្ជានិងនីតិវិធីនេះដល់ភាគីពាក់ព័ន្ធ។
ចំណែកលោក យ៉ែម បុញ្ញឫទ្ធិ អនុប្រធានគណបក្សខ្មែររួបរួមជាតិ បង្ហាញការខកចិត្តចំពោះការសម្រេចចិត្តបែបនេះរបស់ស្ថាប័នជាតិ គ.ជ.ប.។ ទោះបែបណា សម្រាប់អ្នកនយោបាយរូបនេះនៅតែយល់ឃើញថា វាពិតជាមានភាពចាំបាច់សម្រាប់ភ្នាក់ងារគណបក្សនយោបាយ ចំពោះទម្រង់១១០២នេះ។
លោកបន្តថា៖ «យើងមានការសោកស្ដាយមែនទែន ហើយយើងទទូចសូមឱ្យមានការកែសម្រួលចែកដូចពីមុនៗ ដើម្បីបញ្ជាក់ពីតម្លាភាពចេញពីទីតាំងការិយាល័យបោះឆ្នោតដោយផ្ទាល់ និងជាការផ្តល់ទំនុកចិត្តដល់គណបក្សនយោបាយដែលចូលរួមការបោះឆ្នោតផង។ ចំណុចពិសេសមួយទៀតដែលយើងឱ្យឈ្មោះថា ភ្នាក់ងារសង្កេត ដែលលោកចុះសង្កេតការណ៍ និងចុះហត្ថលេខាលើកំណត់ហេតុ១១០២នោះ គួរតែមានឯកសារមូលដ្ឋានមួយនៅក្នុងដៃ»។
ទម្រង់១១០២ ឬហៅថា «របាយការណ៍រាប់សន្លឹកឆ្នោត» នេះ ត្រូវបានគណៈកម្មាធិការជាតិរៀបចំការបោះឆ្នោត ផ្អាកមិនចែកចាយជាលើកដំបូងរបស់ខ្លួននៅអំឡុងបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០២២។ បញ្ហានេះបានជំរុញឱ្យតួអង្គពាក់ព័ន្ធ មានគណបក្សនយោបាយ និងអង្គការមិនមែនរដ្ឋាភិបាល នៅក្នុងដំណើរការបោះឆ្នោត ប្រតិកម្ម និងតវ៉ាជាបន្តបន្ទាប់។ ក៏ប៉ុន្តែ បើទោះជាពួកគេបង្ហាញការមិនពេញចិត្តចំពោះអ្វីដែល គ.ជ.ប. អនុវត្តនេះក្តី ហើយតស៊ូមតិដើម្បីឱ្យស្ថាប័នជាតិរៀបចំការបោះឆ្នោតមានការកែសម្រួល នៅតែមិនទទួលបានជោគជ័យដដែល។
ចំណែកលោកនាយករដ្ឋមន្រ្តី ហ៊ុន សែន កាលពីថ្ងៃទី២២ ខែធ្នូ ម្សិលមិញនេះ បានព្រមានដោយចំហ ពីខេត្តព្រះសីហនុ ក្នុងការចាប់ខ្លួនដាក់ពន្ធនាគារចំពោះអ្នកដែលតែងចោទប្រកាន់ពី «ការលួចសន្លឹកឆ្នោតក្រោយថ្ងៃបោះឆ្នោតរួច»៕