លោកនាយករដ្ឋមន្ត្រី ហ៊ុន សែន ផ្ញើសារជាថ្មីឱ្យពលរដ្ឋបន្តបោះឆ្នោតគាំទ្រគណបក្សប្រជាជនកម្ពុជា មុនយុទ្ធនាការឃោសនារកសំឡេងឆ្នោតមកដល់ ដោយលោកបង្ហាញការតាំងចិត្តថា រដ្ឋាភិបាលនឹងបន្តធ្វើឱ្យខ្សែបន្ទាត់ព្រំដែនដែលធ្លាប់តែមានជម្លោះ ក្លាយជាតំបន់សេដ្ឋកិច្ចឬដោះដូរទំនិញ រក្សាសន្តិភាព និងលំហសេរីភាព ជាដើម។
ការថ្លែងរបស់លោកបែបនេះ ធ្វើឡើងក្នុងពិធីបើកការដ្ឋានកែលម្អផ្លូវជាតិលេខ៤១ នៅខេត្តកណ្ដាល នាព្រឹកថ្ងៃទី២៦ ខែធ្នូនេះ។
ក្នុងពិធីនោះ លោកបានថ្លែងអំណរគុណចំពោះពលរដ្ឋដែលបានបោះឆ្នោតគាំទ្រគណបក្សប្រជាជនកម្ពុជា អំឡុងនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីខែមិថុនា និងបង្ហាញក្ដីសង្ឃឹមថា ពលរដ្ឋនឹងបន្តស្មារតីនេះនៅឆ្នាំ២០២៣ខាងមុខទៀត។
លោកនាយករដ្ឋមន្ត្រី ហ៊ុន សែន ថ្លែងថា៖ «ខ្ញុំសង្ឃឹមថា ប្រជាជនកម្ពុជា និយាយជារួម និងនិយាយដោយឡែក ប្រជាជននៅក្នុងខេត្តកណ្តាល និងខេត្តកំពង់ស្ពឺ នឹងបន្តបោះឆ្នោតឱ្យគណបក្សប្រជាជនបន្តទៀត នៅក្នុងការបោះឆ្នោត នៅក្នុងខែកក្កដា ឆ្នាំ២០២៣ ខាងមុខនេះ។ ប្រជាជនបានឃើញហើយ នៅពេលដែលគណបក្សប្រជាជនកាន់អំណាច សន្តិភាពកំពុងកើតមាននៅទូទាំងប្រទេស គ្រប់ទីកន្លែងទាំងអស់ ឥលូវកន្លែងដែលធ្លាប់មានចម្បាំងរាំងជល់ទាំងប៉ុន្មាន ក្លាយជាតំបន់ទេសចរណ៍»។
លោកគូសបញ្ជាក់ថា ខ្សែបន្ទាត់ព្រំដែនដែលពីមុនធ្លាប់តែជាតំបន់មានជម្លោះជាមួយប្រទេសជិតខាង ពេលនេះបានក្លាយជាតំបន់ដោះដូរទំនិញ។ មួយវិញទៀត លោកថា រដ្ឋាភិបាលកំពុងពន្លឿនការដោះមីនដែលនៅសេសសល់ឱ្យអស់នៅឆ្នាំ២០២៥ ដើម្បីផ្តល់ដីទាំងនោះឱ្យពលរដ្ឋអាស្រ័យផលផងដែរ។
លោកថា៖ «ខ្ញុំមិនដឹងថា អ្នកដទៃគេទាមទារសេរីភាពអីទៀត បើសព្វថ្ងៃនេះ សេរីភាពវាហៀរកែងអស់យ៉ាងនេះ។ វាទាល់តែសេរីភាព យកគេទៅកាប់ចោល អាហ្នឹងបានហៅថាសេរីភាព? ទាល់តែអ្នកឯងឈ្នះហើយចាប់គេដាក់គុក[ទើបហៅថាសេរីភាព]?»
អនុប្រធាន និងជាអ្នកនាំពាក្យគណបក្សភ្លើងទៀន លោក ថាច់ សេដ្ឋា លើកឡើងថា នៅពេលនេះ មិនមែនជារដូវកាលធ្វើយុទ្ធនាការរកសំឡេងឆ្នោតនោះទេ។ តែយ៉ាងណា លោកថា ដោយសារតែលោកនាយករដ្ឋមន្ត្រីបានជាឃោសនាហើយ លោកក៏ចង់ផ្ញើសារឱ្យពលរដ្ឋបោះឆ្នោតឱ្យគណបក្សភ្លើងទៀនដូចគ្នា ដើម្បីឱ្យប្រទេសមានសន្តិភាពពិតប្រាកដ ធានាយុត្តិធម៌សង្គម និងទប់ស្កាត់អំពើពុករលួយ។
លោកថា៖ «ដូច្នេះ ពលរដ្ឋដែលចង់បានយុត្តិធម៌ ចង់បានសិទ្ធិសេរីភាព ចង់បានលទ្ធិប្រជាធិបតេយ្យ ការពារធនធានធម្មជាតិ ការពារប្រទេសជាតិ កុំឱ្យបរទេសមកធ្វើបែបអនាធិបតេយ្យនៅលើប្រទេសកម្ពុជា គឺសូមឱ្យ[ពលរដ្ឋ]បោះឆ្នោតឱ្យគណបក្សភ្លើងទៀនដែរ»។
នាយកប្រតិបត្តិអង្គការឃ្លាំមើលការបោះឆ្នោតនិចហ្វិក លោក សំ គន្ធាមី ហៅការប្រើវេទិកាជាតិដើម្បីរកផលប្រយោជន៍ឱ្យបក្សនយោបាយណាមួយ បង្ហាញពីភាពលម្អៀងរបស់មេដឹកនាំ ដែលមិនគួរកើតមានក្នុងសង្គមប្រជាធិបតេយ្យ។
លោកថា៖ «តាមពិត ការងាររដ្ឋាភិបាលការងារអព្យាក្រឹត ចែកដាច់ពីគ្នា ហើយការងារឃោសនាជាការងារ[…]គណបក្ស។ គាត់[នាយករដ្ឋមន្ត្រី] អញ្ជើញទៅបើកសម្ពោធអីហ្នឹង ក្នុងនាមរដ្ឋាភិបាលតើ! មិនមែនក្នុងនាមគណបក្សប្រជាជនឯណា!»
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប.) លោក ហង្ស ពុទ្ធា ធ្លាប់ប្រាប់VODថា ការដែលអ្នកនយោបាយអំពាវនាវរកសំឡេងឆ្នោតនៅមុនយុទ្ធនាការមកដល់នេះ មិនស្ថិតក្នុងដែនសមត្ថកិច្ចរបស់ខ្លួនទេ។
ចំណែកអ្នកស្រាវជ្រាវភូមិសាស្ត្រនយោបាយ លោក វណ្ណ ប៊ុនណា លើកឡើងថា សន្តិភាពនៅកម្ពុជា ជាសន្តិភាពបែបអវិជ្ជមាន មិនមែនសន្តិភាពបែបវិជ្ជមានទេ។
លោកថា៖ «សន្តិភាពបែបវិជ្ជមាននេះ សំដៅទៅដល់សង្គមមានយុត្តិធម៌ខ្ពស់ ប្រព័ន្ធតុលាការឯករាជ្យមិនលម្អៀង មានអំពើពុករលួយតិចតួច មានអភិបាលកិច្ចល្អ ក៏ដូចជាប្រជាពលរដ្ឋ បើទោះបីមានទស្សនៈផ្ទុយគ្នា ប៉ុន្តែអាចរស់នៅជាមួយគ្នាប្រកបដោយភាតរភាព [រាប់អានគ្នាដូចបងប្អូន] នៅក្នុងសង្គម ដោយមិនមានការបែងចែកប្រកាន់បក្ខពួក ឬក៏គំរាមកំហែងគ្នាផងដែរ»។
យ៉ាងណា ក្រោយពីតុលាការកំពូលរំលាយ «គណបក្សសង្គ្រោះជាតិ» ដែលមានអ្នកគាំទ្រជិតពាក់កណ្តាលប្រទេសចេញពីឆាកនយោបាយ អំឡុងខែវិច្ឆិកា ឆ្នាំ២០១៧មក «គណបក្សប្រជាជនកម្ពុជា» ដណ្តើមបានសំឡេងឆ្នោតច្រើនលើសលុប ទាំងការបោះឆ្នោតជាតិឆ្នាំ២០១៨ និងការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២នេះ។
បរិបទនេះធ្វើឱ្យគណបក្សប្រជាជនកម្ពុជាគ្រប់គ្រងតំណែងទាំងអស់ក្នុងរដ្ឋសភា និងព្រឹទ្ធសភា ដែលជាស្ថាប័នអនុម័តច្បាប់ និងតាមដានការអនុវត្តច្បាប់។ រីឯតំណែងនៅថ្នាក់ក្រោមជាតិវិញ ស្ទើរតែ១០០ភាគ រយ ក៏គ្រប់គ្រងដោយបក្សកាន់អំណាចមួយនេះផងដែរ៕