រដ្ឋបាលរាជធានីភ្នំពេញ ស្នើសមាគមគ្រូបង្រៀនកម្ពុជាឯករាជ្យ ផ្អាករៀបចំការជួបជុំសម្តែងមតិទាមទារឱ្យដោះលែងគ្រូបង្រៀន៥នាក់ដែលកំពុងជាប់ឃុំ ដែលគ្រោងធ្វើនៅចុងខែធ្នូនេះ នៅទីលានប្រជាធិបតេយ្យ។
ការស្នើនេះបានធ្វើឡើងនៅក្នុងកិច្ចប្រជុំពិភាក្សា ស្តីពីសំណើសុំជួបជុំសម្តែងមតិដោយសន្តិវិធីនៅទីលានប្រជាធិបតេយ្យរបស់សមាគមគ្រូបង្រៀនកម្ពុជាឯករាជ្យ រវាងអភិបាលរងរាជធានីភ្នំពេញ លោក មាន ចាន់យ៉ាដា និងលោក កើត ឆែ ជាមួយប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី នៅសាលារាជធានីភ្នំពេញ នាថ្ងៃទី២៦ ខែធ្នូ ឆ្នាំ២០២២នេះ។
យោងតាមកំណត់ហេតុនៃកិច្ចប្រជុំនោះរបស់សាលារាជធានីភ្នំពេញ បានឱ្យដឹងថា ម្ចាស់សំណើ លោកស្រី អ៊ុក ឆាយ៉ាវី បានជម្រាបជូនអង្គប្រជុំពីការរៀបចំសម្តែងមតិនៅថ្ងៃទី៣០ ខែធ្នូ ឆ្នាំ២០២២ ដើម្បីទាមទារឱ្យមានការដោះលែងគ្រូបង្រៀនចំនួន៥នាក់ នៅទីលានប្រជាធិបតេយ្យ ដោយមានអ្នកចូលរួមចំនួន១០០នាក់ និងមានការដង្ហែញត្តិដាក់ជូនសាលារាជធានីភ្នំពេញ និងខុទ្ទកាល័យនាយករដ្ឋមន្ត្រី។
ករណីនេះ រដ្ឋបាលរាជធានីភ្នំពេញ ស្នើឱ្យផ្អាកការរៀបចំកម្មវិធីនេះ ដោយសារសំណើរបស់សមាគម ផ្ទុយនឹងមាត្រា៥២២ និងមាត្រា៥២៣ នៃក្រមព្រហ្មទណ្ឌ ព្រមទាំងស្នើឱ្យម្ចាស់សំណើកែសម្រួលកម្មវត្ថុនៃលិខិតស្នើនោះឡើងវិញឱ្យស្របទៅតាមច្បាប់នានាជាធរមាន។
ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី ចាត់ទុកការស្នើឱ្យផ្អាកការជួបជុំសម្តែងមតិរបស់សមាគម ពីសំណាក់អាជ្ញាធររាជធានីភ្នំពេញ ដោយសំអាងថាផ្ទុយនឹងច្បាប់នេះថា គ្រាន់តែជាលេសក្នុងការរារាំងមិនឱ្យពួកគាត់សម្តែងមតិប៉ុណ្ណោះ។
តែយ៉ាងណា លោកស្រីថា បើទោះជាអាជ្ញាធរមិនអនុញ្ញាត ក៏សមាគមនៅតែជួបជុំសម្តែងមតិទាមទារឱ្យមានការដោះលែងគ្រូបង្រៀនទាំង៥រូបនោះឱ្យមានសេរីភាពឡើងវិញទៅតាមការគ្រោងទុក។
លោកស្រីថ្លែងថា៖ «ជំហររបស់សមាគមយើង នៅតែធ្វើ[ការសម្តែងមតិនៅទីលានប្រជាធិបតេយ្យ]នៅថ្ងៃទី៣០ ខែធ្នូ ឆ្នាំ២០២២ ដដែល»។
បើតាមលោកស្រី អ៊ុក ឆាយ៉ាវី គ្រូបង្រៀនទាំង៥នាក់នោះមានដូចជា លោក កែវ ថៃ លោក ស៊ុន ធន់ លោក ពៀប ម៉ាប់ លោក អុំ សំអាន និងគ្រូបង្រៀនម្នាក់ទៀត ដោយពួកគាត់រងនូវការចោទប្រកាន់ពាក់ព័ន្ធនឹងរឿងនយោបាយ។
កាលពីពាក់កណ្ដាលខែវិច្ឆិកា ឆ្នាំ២០២២នេះ សហរដ្ឋអាមេរិកក៏ធ្លាប់បានជំរុញទៅរដ្ឋាភិបាលកម្ពុជាឱ្យដោះលែងអ្នកជាប់ឃុំដែលត្រូវបានចោទប្រកាន់ពាក់ព័ន្ធរឿងនយោបាយ និងមេធាវីអន្តរជាតិដែលមានសញ្ជាតិអាមេរិកាំង កញ្ញា សេង ធារី ព្រមទាំងស្នើឱ្យបើកលំហសិទ្ធិពលរដ្ឋ សង្គមស៊ីវិល និងសិទ្ធិនយោបាយឡើងវិញ នៅមុនការបោះឆ្នោតឆ្នាំ២០២៣ផងដែរ។
កាលពីពេលថ្មីៗនេះ អ្នកជំនាញសិទ្ធិមនុស្សនៅអង្គការសហប្រជាជាតិ និងសហគមន៍អន្តរជាតិមួយចំនួនទៀត ក៏បានស្នើទៅរដ្ឋាភិបាលកម្ពុជាឱ្យពិនិត្យឡើងវិញផងដែរ ក្រោយតុលាការបានចោទប្រកាន់ទៅលើក្រុមសកម្មជនគណបក្សសង្គ្រោះជាតិដែលត្រូវតុលាការរំលាយ ជាង៤០នាក់ ពីបទ «ញុះញង់ និងរួមគំនិតក្បត់» ដោយពួកគេលើកឡើងថា វិធាននោះមិនបានភ្ជាប់កាតព្វកិច្ចនៃការគោរពសិទ្ធិមនុស្សអន្តរជាតិ និងលំហនយោបាយពហុបក្ស។
មាត្រា៣៥ នៃរដ្ឋធម្មនុញ្ញព្រះរាជាណាចក្រកម្ពុជា ចែងថា ប្រជាពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្ដីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ៕
