គណបក្សភ្លើងទៀន សម្រេចតែងតាំងលោកបណ្ឌិត សុក ហាច ជាទីប្រឹក្សាគណបក្សដែលទទួលបន្ទុកផ្នែកសេដ្ឋកិច្ច បន្ទាប់ពីលោកបានប្រកាសចូលរួមជីវភាពនយោបាយជាមួយបក្សភ្លើងទៀន នាពេលថ្មីៗនេះ។
ក្នុងសេចក្ដីប្រកាសព័ត៌មានរបស់គណបក្សភ្លើងទៀន ចុះថ្ងៃទី២ ខែមករា ឆ្នាំ២០២៣ ដែលទើបត្រូវបានផ្សព្វផ្សាយនាថ្ងៃនេះ ឱ្យដឹងថា បន្ទាប់ពីបើកកិច្ចប្រជុំគណៈកម្មាធិការអចិន្ត្រៃយ៍រួច គណបក្សភ្លើងទៀនសម្រចទទួលយកសំណើរបស់លោក សុក ហាច ដែលសុំចូលរួមជីវភាពនយោបាយជាមួយបក្សភ្លើងទៀន ចាប់ពីថ្ងៃចេញសេចក្តីប្រកាសព័ត៌មាននេះតទៅ។
ក្រៅពីទទួលយកសំណើហើយ គណបក្សភ្លើងទៀន បានសម្រេចតែងតាំងអ្នកជំនាញសេដ្ឋកិច្ច លោកបណ្ឌិត សុក ហាច ជាទីប្រឹក្សាគណបក្សទទួលបន្ទុកផ្នែកសេដ្ឋកិច្ចផងដែរ ខណៈ លោកបណ្ឌិត សុខ ហាច ជាបញ្ញវន្តផ្នែកសេដ្ឋកិច្ចមួយរួបដែលធ្លាប់បម្រើការងារនៅស្ថាប័នមួយចំនួន រួមមាន ធ្លាប់ធ្វើជាទីប្រឹក្សាក្រសួងសេដ្ឋកិច្ច និងហិរញ្ញវត្ថុ និងជាស្ថាបនិកវិទ្យាស្ថានសេដ្ឋកិច្ចកម្ពុជា (EIC) ខណៈបច្ចុប្បន្ន លោកក៏ជាប្រធានក្រុមហ៊ុននាំអង្ករចេញ Golden Rice។
អនុប្រធានគណបក្សភ្លើងទៀន លោក ចេក គឹមអ៊ាង មានប្រសាសន៍បញ្ជាក់ថា គណបក្សភ្លើងទៀន បានចេញលិខិតស្វាគមន៍ និងតែងតាំងអ្នកជំនាញសេដ្ឋកិច្ច លោកបណ្ឌិត សុក ហាច ជាទីប្រឹក្សាគណបក្សទទួលបន្ទុកផ្នែកសេដ្ឋកិច្ចរួចហើយ។
លោកបន្ថែមថា គណបក្សភ្លើងទៀន ក៏កំពុងត្រូវការអ្នកនយោបាយ បញ្ញវន្ត អ្នកជំនាញផ្សេងទៀតផងដែរ ដើម្បីចូលរួមជីវភាពនយោបាយជាមួយគណបក្សរបស់ខ្លួន ទៅប្រកួតប្រជែងជាមួយគណបក្សកាន់អំណាច។
លោកថា៖ «ក្នុងការចូលរួម យើងត្រូវការបញ្ញវន្ត យើងត្រូវការអ្នកនយោបាយជាន់ខ្ពស់ យើងត្រូវការអ្នកស្នេហាជាតិពិតប្រាកដចូលរួម។ យើងសង្ឃឹមថា កាលណាចូលរួមច្រើន កាលណាចូលរួមច្រើន ការគិតរបស់បញ្ញវន្តមិនសូវជាចេះខុសប៉ុន្មានទេ អ៊ីចឹងធ្វើឱ្យពលរដ្ឋគាំទ្រគណបក្សភ្លើងទៀនកាន់តែច្រើន»។
ទោះជាយ៉ាងណា អនុប្រធានគណបក្សភ្លើងទៀនរូបនេះមិនទាន់អាចបញ្ជាក់បាននៅឡើយទេថា លោកបណ្ឌិត សុខ ហាច នឹងឈរឈ្មោះជាតំណាងរាស្រ្ត ដោយសារគណបក្សពុំទាន់រៀបចំបេក្ខជនតំណាងរាស្រ្ត។
វីអូឌី មិនអាចសុំការបំភ្លឺបន្ថែមពីលោកបណ្ឌិត សុខ ហាច បាននៅឡើយទេ ជុំវិញរឿងនេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកការប្រកាសសម្រេចចូលរួមនយោបាយជាមួយគណបក្សភ្លើងទៀនរបស់បណ្ឌិត សុក ហាច ថាជាសិទ្ធិរបស់បុគ្គល។ លោកបញ្ជាក់ថា ការចូលរួមរបស់លោក សុក ហាច ជាមួយបក្សភ្លើងទៀននេះ មិនបានធ្វើឱ្យគណបក្សប្រជាជនកម្ពុជាមានក្ដីបារម្ភឡើយ។
លោកថា៖ «ទន្ទឹមហ្នឹង គាត់ចូលតែម្នាក់ខ្លួនគាត់ ទៅភ្លើងទៀន តែចុះបងប្អូនដែលពីសកម្មជនមកពីភ្លើងទៀនរាប់រយនាក់ រាប់ពាន់នាក់ មកចូលជាមួយគណបក្សប្រជាជន ម៉េចក៏មិនលើក? មិនថាផង? អាហ្នឹងវាជាលទ្ធិប្រជាធិបតេយ្យសេរីហើយ»។
អ្នកស្រាវជ្រាវផ្នែកភូមិសាស្ត្រនយោបាយ លោក វណ្ណ ប៊ុនណា ចាត់ទុកការប្រកាសរបស់លោក សុក ហាច ដែលចូលរួមជីវភាពនយោបាយជាមួយបក្សភ្លើងទៀននាពេលថ្មីៗនេះ ថាជាសញ្ញាវិជ្ជមានមួយសម្រាប់គណបក្សភ្លើងទៀន។
លោកថា៖ «ទីមួយ គឺជាសញ្ញាបង្ហាញអំពីគណបក្សភ្លើងទៀនហ្នឹងកំពុងប្រមែប្រមូលនូវធនធានមនុស្ស ដើម្បីធ្វើឱ្យមានកម្លាំងនយោបាយ និងគាំទ្រគណបក្សភ្លើងទៀន នៅក្នុងឆ្នាំ២០២៣»។
លោក វណ្ណ ប៊ុនណ្ណា យល់ស្របជាមួយលោក សុក ហាច ដែលថាគណបក្សភ្លើងទៀនអាចឈ្នះឆ្នោតដឹកនាំប្រទេស ប៉ុន្តែការឈ្នះឆ្នោតនេះមិនមែននៅក្នុងឆ្នាំ២០២៣នោះទេ។
លោកបន្តថា ការចូលរួមរបស់លោក សុក ហាច ពេលនេះ ជាសញ្ញាវិជ្ជមានមួយសម្រាប់ពលរដ្ឋខ្មែរខ្លះដែរ ប៉ុន្តែវាមិនមានឥទ្ធិពលខ្លាំងដើម្បីឈានទៅយកឈ្នះការបោះឆ្នោតនាពេលខាងមុខ ដូចពេលលោក សម រង្ស៊ី និងលោក កឹម សុខា រួបរួមគ្នាឡើយ។
លោកថា៖ «ប៉ុន្តែខ្ញុំមើលឃើញថា ការចូលរួមគឺជាកម្លាំងមួយមែន ប៉ុន្តែវាអត់ទាន់មានឥទ្ធិពលខ្លាំងក្លានៅឡើយទេ។ ការចូលរួមមានឥទ្ធិពលខ្លាំងកា្ល ទាល់តែឥស្សរជននយោបាយដូចជាលោក សម រង្ស៉ី លោក កឹម សុខា ចូលរួមទៅ បានធ្វើឱ្យមានចលនាក្នុងការផ្លាស់ប្ដូរផ្នត់គំនិតក្នុងការបោះឆ្នោតគាំទ្រច្រើនផងដែរ»។
គួរបញ្ជាក់ថា រដ្ឋាភិបាលបានកំណត់កាលបរិច្ឆេទរួចហើយ ថាការបោះឆ្នោតជ្រើសតាំងតំណាងរាស្ត្រ សម្រាប់នីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣៕