អនុប្រធានគណបក្សភ្លើងទៀន លោក ថាច់ សេដ្ឋា ត្រូវបានសមត្ថកិច្ចចាប់ខ្លួន នៅល្ងាចថ្ងៃទី១៦ ខែមករា ឆ្នាំ២០២៣ នេះ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានថ្លែងប្រាប់វីអូឌីនៅល្ងាចថ្ងៃទី១៦ ខែមករា នេះថា លោក ថាច់ សេដ្ឋា ត្រូវបានសមត្ថកិច្ចចាប់ខ្លួន រួចត្រូវបានបញ្ជូនទៅកាន់សាលាដំបូងរាជធានីភ្នំពេញភ្លាមៗ នៅល្ងាចថ្ងៃដដែលនេះ ដើម្បីចាត់ការទៅតាមនីតិវិធី។
ការចាប់ខ្លួនអនុប្រធានគណបក្សភ្លើងទៀន លោក ថាច់ សេដ្ឋា និងជាអ្នកមានដើមកំណើតមកពីដែនដីកម្ពុជាក្រោមរូបនេះ ធ្វើឡើងទៅតាមដីកាបង្គាប់ឱ្យនាំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ លោក ទិត ដាលីន ដែលចេញនៅថ្ងៃទី១៦ ខែមករា នេះ។
បើតាមដីកាបង្គាប់ឱ្យនាំខ្លួននេះ លោក ថាច់ សេដ្ឋា ត្រូវបានតុលាការចោទប្រកាន់ពីបទ «មិនបំពេញកាតព្វកិច្ចចំពោះឧបករណ៍អាចជួញដូរបាន» ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០១៩។
ភ្លាមៗនេះ វីអូឌីនៅមិនទាន់ទាក់ទងការឆ្លើយតបពីសាច់ញាតិរបស់លោក ថាច់ សេដ្ឋា និងគណបក្សភ្លើងទៀន បាននៅឡើយទេ។ ប៉ុន្តែវីអូឌីនឹងបន្តតាមដានព្រឹត្តិការណ៍នេះ និងរាយការណ៍ជូនប្រិយមិត្តជាបន្តបន្ទាប់ ៕
