លោកនាយករដ្ឋមន្ត្រី ហ៊ុន សែន បានព្រមានប្ដឹងគណបក្សភ្លើងទៀនទៅតុលាការ ក្រោយពីពិនិត្យឃើញថា គណបក្សក្រៅរដ្ឋាភិបាលមួយនេះចោទប្រកាន់បក្សកាន់អំណាចថាបានបន្តប្រើប្រាស់ឥទ្ធិពលរបស់ខ្លួន ដាក់ការគាបសង្កត់ទៅលើដៃគូប្រកួតនៅមុនការបោះឆ្នោតថ្នាក់ជាតិមកដល់។
ថ្លែងនៅក្នុងវេទិកាក្នុងសង្កាត់ព្រែកព្នៅ រាជធានីភ្នំពេញ នាព្រឹកថ្ងៃទី១៩ ខែមករា ឆ្នាំ២០២៣នេះ លោកនាយករដ្ឋមន្ត្រី ហ៊ុន សែន អះអាងថា ក្នុងនាមជាមេដឹកនាំគណបក្សប្រជាជនកម្ពុជា លោកនឹងមិនយោគយល់ទៀតទេ គឺត្រូវរៀបចំបណ្ដឹងចូលទៅតុលាការ ប្ដឹងគណបក្សភ្លើងទៀន។ លោកបន្តថា ដើម្បីចៀសវាងពីការប្រើប្រាស់ហិង្សា គឺមានតែជ្រើសរើសយកការប្តឹងតាមផ្លូវតុលាការនេះទេ ទើបអាចស្វែងរកយុត្តិធម៌ និងប៉ះប៉ូវការចោទប្រកាន់ ដែលលោកចាត់ទុកថាជាការមួលបង្កាច់ខុសពីការពិតនេះបាន។
លោកបន្តថា៖ «ឥឡូវនេះ ខ្ញុំសូមបញ្ជាក់ សេចក្តីថ្លែងការណ៍ពីម្សិល ខ្ញុំមើល មានចេញសេចក្តីថ្លែងការណ៍ដែលនិយាយប៉ះពាល់ដល់គណបក្សប្រជាជនគាបសង្កត់។ ឥឡូវនេះ តើគណបក្សប្រជាជនគាបសង្កត់អ្នកឯងលើរឿងអី? រឿងដូចជាអ្នកណាមួយ ដូចជាអនុប្រធានគណបក្សណាមួយជាប់គុក គេវាយខ្នោះ បើកសែកអត់លុយ។ អារឿងបើកសែកអត់លុយហ្នឹង ជាប់ខ្នោះតែញឹក។ ប៉ុន្មានថ្ងៃមុន ឃើញដូចជាពីរបីអាទិត្យមុន ឃើញឧកញ៉ាណាផង ឃើញចេញសែកអត់លុយ អាហ្នឹងសុទ្ធតែជួញជាប់ គុកតែទាំងអស់ហ្នឹងហើយ។ ហើយរឿងស្អីសុទ្ធតែរឿងនយោបាយ រឿងស្អីសុទ្ធតែរឿងនយោបាយ រឿងហ្នឹងនិយាយគ្នាឱ្យច្បាស់។ អត់ទេ! គណបក្សប្រជាជន មិនអាចទុកឱ្យអ្នកឯងធ្វើរបៀបហ្នឹងតទៅទៀតទេ យើងប្តឹងទៀត! បើមិនឱ្យប្តឹង មានស្អី អញលើកបាតុកម្ម ដាក់ឯងរត់ពេញទឹកពេញដី រកកន្លែងរត់មិនឃើញទៀតណោះ។ នេះចេះគេថ្នមហើយប៉ុណ្ណឹងនោះ ចេញមកវាឈ្លើយតែម្តង»។
ប្រតិកម្មរបស់លោកនាយករដ្ឋមន្ត្រី ហ៊ុន សែន នៅពេលនេះ បន្ទាប់ពីគណបក្សភ្លើងទៀន កាលពីថ្ងៃទី១៨ ខែមករា ម្សិលមិញ បានចេញថ្លែងការណ៍ថ្មីមួយទៀត ដោយហៅសកម្មភាពថ្មីៗនេះ រួមទាំងការចាប់ខ្លួនអនុប្រធានគណបក្សភ្លើងទៀន ដែលជាប់ចោទរឿងចេញសែកគ្មានសាច់ប្រាក់ ថាជាការគាបសង្កត់របស់គណបក្សកាន់អំណាច មកលើគណបក្សភ្លើងទៀន៕
