ប្រធានគណបក្សភ្លើងទៀនតាមបណ្ដាខេត្តនានាបានឱ្យដឹងថា ពួកគេត្រូវបានស្នើឱ្យបន្ថយវោហារសព្ទវាយប្រហារ និងចៀសវាងការថ្លែងរិះគន់លើមន្ត្រីបក្សកាន់អំណាច ខណៈដែលគណបក្សមួយនេះបច្ចុប្បន្នរងនូវការព្រមានដែលធ្វើឡើងកាលពីសប្ដាហ៍មុនដោយលោកនាយករដ្ឋមន្ត្រី ហ៊ុន សែន។
ការព្រមានប្ដឹងគណបក្សភ្លើងទៀនទៅតុលាការដោយលោក ហ៊ុន សែន ត្រូវបានធ្វើឡើង ក្រោយរូបលោកពិនិត្យឃើញថា គណបក្សក្រៅរដ្ឋាភិបាលមួយនេះចោទប្រកាន់បក្សកាន់អំណាចថាបានបន្តប្រើប្រាស់ឥទ្ធិពលរបស់ខ្លួន ដាក់ការគាបសង្កត់ទៅលើគណបក្សប្រឆាំង ដោយហាក់សំដៅលើការចាប់ខ្លួនអនុប្រធានគណបក្សភ្លើងទៀន លោក ថាច់ សេដ្ឋា។
តាមរយៈការព្រមានដោយលោក ហ៊ុន សែន កាលពីសប្តាហ៍មុន ក្នុងនោះ រូបលោកក៏ចង់ឱ្យគណបក្សភ្លើងទៀនចេញមុខសុំទោស ទាក់ទងនឹងករណីធ្វើឱ្យប៉ះពាល់ដល់កិត្តិយសបក្សកាន់អំណាច ខណៈគណបក្សភ្លើងទៀនក៏បានដកខ្លឹមសារដូចដែលមាននៅក្នុងសេចក្ដីថ្លែងការណ៍ ដើម្បីសម្រួលស្ថានការណ៍នេះឱ្យមានភាពប្រក្រតីឡើងវិញផងដែរ។
ទោះជាយ៉ាងណា សមាជិកគណបក្សភ្លើងទៀនថ្នាក់មូលដ្ឋានមួយចំនួនបានថ្លែងប្រាប់ វីអូឌី កាលពីចុងសប្តាហ៍មុនថា ពួកគេមិនមានការយល់ស្របទាំងស្រុងជាមួយនឹងការសម្រេចចិត្តរបស់គណបក្ស ក្នុងការដកឃ្លា ឬរុញរាក្នុងសកម្មភាពនយោបាយឡើយ។
យោងតាមការបង្ហោះដោយគណបក្សភ្លើងទៀននៅលើបណ្ដាញសង្គមតេឡេក្រាម គណបក្ស នៅថ្ងៃចន្ទម្សិលមិញនេះ ក៏បានជួបជាមួយសមាជិកគណៈកម្មាធិការខេត្ត ដើម្បីពិភាក្សាអំពីស្ថានភាពនយោបាយផងដែរ។
ទាក់ទិននឹងករណីនេះ ប្រធានគណបក្សភ្លើងទៀន ខេត្តប៉ៃលិន លោក ខឹម មុនីកុសល បានឱ្យដឹងថា ថ្នាក់ដឹកនាំជាន់ខ្ពស់គណបក្សបានលើកឡើងអំពីការបន្ធូរបន្ថយភាពតានតឹងរវាងគណបក្សទាំងពីរ និងចៀសវាងការវាយប្រហារមន្ត្រីគណបក្សប្រជាជន។
លោកថា៖ «យើងនឹងព្យាយាមធ្វើអ្វីៗគ្រប់បែបយ៉ាង ដើម្បីធ្វើឱ្យសកម្មជនសំខាន់ៗរបស់យើងមានការអត់ធ្មត់ ដើម្បីចៀសវាងការធ្វើឱ្យស្ថានការណ៍កាន់តែធ្ងន់ធ្ងរបន្ថែមទៀត។ យើងអាចកាត់បន្ថយវោហារសព្ទវាយប្រហារ ដើម្បីបញ្ចៀសការប៉ះទង្គិចរវាងគ្នាទៅវិញទៅមក»។
ទោះជាយ៉ាងណា លោកបន្តថា សមាជិកគណបក្សនៅតែអាចធ្វើការរិះគន់រដ្ឋាភិបាលបាន ដរាបណាវាមិនមែនជាការលើកឡើងដោយផ្ទាល់ចំទៅលើមន្ត្រីបក្សកាន់អំណាចណាម្នាក់។
ជាមួយគ្នានេះ ប្រធានក្រុមការងារគណបក្សភ្លើងទៀន ខេត្តព្រះសីហនុ លោក ម៉ៃ ហុងស្រៀង បានលើកឡើងថា ភាពតានតឹងផ្នែកនយោបាយនៅក្នុងខេត្តនេះ មិនមានការប្រែប្រួលទេ ដោយរូបលោកនឹងបន្តពាំនាំការថ្លែងសាររបស់ថ្នាក់ដឹកនាំជាន់ខ្ពស់ទៅកាន់សកម្មជនរបស់លោក។
លោកថា៖ «ជាក់ស្ដែង គណបក្សគ្មានចេតនាជំរុញអ្នកនយោបាយ ឬសកម្មជនទាំងឡាយឱ្យប្រើពាក្យពេចន៍មិនល្អណាមួយប្រឆាំងនឹងគណបក្សកាន់អំណាចនោះទេ។ សម្រាប់បរិយាកាសនយោបាយ បើទោះជាមានស្ថានការណ៍ក្តៅយ៉ាងនេះក៏ដោយ យើងនឹងនៅតែបន្តដំណើរទៅមុខ និងរក្សាគោលដៅចម្បងរបស់យើង»។
ប្រធានក្រុមការងារគណបក្សភ្លើងទៀន ខេត្តកណ្ដាល លោក លី ម៉េង បានថ្លែងថា រូបលោកបានចូលរួមក្នុងកិច្ចប្រជុំនេះ ប៉ុន្តែបានបដិសេធធ្វើអត្ថាធិប្បាយ និងបានបង្វែរសំណួរទាក់ទិននឹងកិច្ចប្រជុំនេះទៅកាន់អនុប្រធានបក្សភ្លើងទៀន លោក សុន ឆ័យ។
ប្រធានក្រុមការងារគណបក្សភ្លើងទៀន ខេត្តត្បូងឃ្មុំ លោក អេង ស្រូយ បានឱ្យដឹងថា រូបលោកទទួលបានការអញ្ជើញ ប៉ុន្តែមិនបានចូលរួមកិច្ចប្រជុំនេះនោះទេ ខណៈប្រធានក្រុមការងារគណបក្សភ្លើងទៀនមកពីខេត្តកំពង់ធំ លោក ស៊ុន ចន្ធី បានថ្លែងថា រូបលោកបានទៅដល់កិច្ចប្រជុំនេះយឺត ហើយលោកក៏បានបដិសេធមិនធ្វើអត្ថាធិប្បាយលើអ្វីដែលបានពិភាក្សាផងដែរ។
ប្រធានគណបក្សភ្លើងទៀន លោក ទាវ វណ្ណុល, អនុប្រធានគណបក្ស លោក សុន ឆ័យ, លោក ចេប គឹមអ៊ាង និងអគ្គលេខាធិការគណបក្ស លោក លី សុធារ៉ាយុទ្ធ មិនអាចទាក់ទង ដើម្បីសុំការអត្ថាធិប្បាយបានទេ កាលពីថ្ងៃចន្ទ។
សម្រាប់អ្នកនាំពាក្យគណបក្សប្រជាជនកម្ពុជា លោក សុខ ឥសាន បានឱ្យដឹងថា វាគឺជារឿងដ៏ល្អមួយដែលបានដឹងថា គណបក្សភ្លើងទៀនកំពុងតែស្នើសុំឱ្យសមាជិករបស់ខ្លួនបន្ថយការថ្លែងជាពាក្យពេចន៍វាយប្រហាររបស់ពួកគេ។
លោកថា៖ «យើងចង់បានការរិះគន់ក្នុងន័យស្ថាបនា ប៉ុន្តែយើងមិនចង់បានការជេរប្រមាថ ការលាបពណ៌ ឬការវាយប្រហារនោះទេ»។
គួរបញ្ជាក់ថា ស្ថានការណ៍នយោបាយមានការប្រែប្រួលយ៉ាងឆាប់រហ័សនៅក្នុងខែមករា ដើមឆ្នាំ២០២៣នេះ ខណៈលោក ហ៊ុន សែន បានដឹកនាំការចោទប្រកាន់ក្នុងការគំរាមកំហែងកាន់តែខ្លាំងឡើង ប្រឆាំងនឹងគណបក្សប្រឆាំង ដែលក្នុងនោះរួមមានទាំងការដាក់ពាក្យប្ដឹងឧត្ដមទីប្រឹក្សាគណបក្សភ្លើងទៀន លោក គង់ គាំ ពីបទញុះញង់ និងបង្ខំឱ្យរូបលោកប្រគល់ដី និងផ្ទះ ក្នុងរាជធានីភ្នំពេញ ឱ្យក្រសួងការបរទេសវិញ ក្រោយលោក ហ៊ុន សែន ប្រកាសថា ដីនិងផ្ទះនោះនៅតែជាកម្មសិទ្ធិរបស់ក្រសួងមួយនេះ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Candlelight Leadership Calls for Calm after Hun Sen Threats