លោក គង់ គាំ សម្រេចលាលែងពីតួនាទីនិងសកម្មភាពជាឧត្ដមទីប្រឹក្សាគណបក្សភ្លើងទៀន ក្រោយគណបក្សកាន់អំណាចបានរឹបអូសដី និងផ្ទះ កាលពីពេលថ្មីៗនេះ។
បើតាមលិខិតរបស់លោក គង់ គាំ ផ្ញើទៅកាន់លោកនាយករដ្ឋមន្ត្រី ហ៊ុន សែន ចុះថ្ងៃទី៣១ ខែមករា ឆ្នាំ២០២៣ និងត្រូវបានផ្សព្វផ្សាយនៅថ្ងៃទី២ ខែកុម្ភៈនេះ លោក គង់ គាំ បានប្រាប់លោក ហ៊ុន សែន ដោយទទួលស្គាល់កំហុស និងអំពើរបស់ខ្លួនក្នុងសកម្មភាពចុងក្រោយនេះ ដែលធ្វើឱ្យប៉ះពាល់ដល់កិត្តិយស សេចក្ដីថ្លៃថ្នូររបស់ថ្នាក់ដឹកនាំគណបក្សប្រជាជនកម្ពុជា និងប៉ះពាល់ដល់ភាពសុខសាន្តចំពោះសង្គមជាតិ។
លោក គង់ គាំ ក៏បានសុំទោសលោកនាយករដ្ឋមន្ត្រី ហ៊ុន សែន ដែលជាប្រធានគណបក្សប្រជាជនកម្ពុជាផងដែរ។
លោកថា៖ «រយៈពេលចុងក្រោយថ្មីៗ ដើម្បីកិត្តិយស និងតម្លៃរបស់គណបក្សប្រជាជនកម្ពុជា គណបក្សប្រជាជនកម្ពុជាបានសម្រេចដោយគ្មានជម្រើស [ទាំងបង្ខំចិត្ត] ដកហូតដីផ្ទះលេខ៧១ ផ្លូវសម្តេចសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ជាសម្បត្តិក្រសួងការបរទេសវិញ។ ខ្ញុំបាទ គង់ គាំ និងភរិយា សោកស្តាយអំពីសេចក្តីសម្រេចនេះ តែយើងខ្ញុំប្តីប្រពន្ធ ព្រមទាំងកូនចៅ សូមអរគុណសម្តេច ដែលអនុគ្រោះមិនបន្តបណ្ដឹងទៅតុលាការចំពោះរូបខ្ញុំ។ លើសពីនេះ ខ្ញុំបាទ គង់ គាំ និងភរិយា រីករាយនិងដឹងគុណចំពោះសណ្តានចិត្ត រំឭក និងយកចិត្តទុកដាក់ សណ្ដោសដល់កូន គង់ បូរ៉ា ចូលជាសមាជិកគណបក្សប្រជាជនកម្ពុជា និងជាអនុរដ្ឋលេខាធិការក្រសួងមហាផ្ទៃ ដោយបានផ្ដល់រថយន្តមួយគ្រឿងជាមធ្យោបាយបម្រើការងារ ក្នុងមនោសញ្ចេតនានៃគ្រួសារដ៏កៀកកិតមួយកាលពីគ្រាកម្សត់កម្រ »។
ករណីនេះ លោកបានសម្រេចចិត្តបញ្ចប់តួនាទី និងសកម្មភាពជាឧត្តមទីប្រឹក្សាគណបក្សភ្លើងទៀន ចាប់ពីថ្ងៃទី៣១ ខែមករា ឆ្នាំ២០២៣ តទៅ។
ការសម្រេចបែបនេះ លោក គង់ គាំ លើកហេតុផលថា ក្រោយពិនិត្យហេតុផល និងពិចារណាពីសណ្ដាប់ធ្នាប់ពិភពលោក និងបរិយាកាសភូមិសាស្ត្រនយោបាយតំបន់ ជាពិសេសនយោបាយកម្ពុជា ដែលកំពុងយកចិត្តទុកដាក់ចំពោះអ្នកនយោបាយបន្តវេន។
លោក គង់ មុនីកា ប្រធានគណបក្សឆន្ទៈខ្មែរ និងជាកូនប្រុសរបស់លោក គង់ គាំ ប្រាប់វីអូឌីថា ការលាឈប់ពីឆាកនយោបាយរបស់ឪពុកលោក ដោយសារស្ថានភាពសុខភាព មិនមែនជាការគាបសង្កត់ពីភាគីណាមួយនោះទេ ខណៈឪពុករបស់លោកក៏គាត់មានវ័យចំណាស់ទៅហើយ។
លោក គង់ មុនីកា ថ្លែងថា៖ «ខ្ញុំយល់ថា គាត់[លោក គង់ គាំ]ចូលដល់វ័យចំណាស់ហើយ បញ្ហាសុខភាពក៏មានច្រើន ដូច្នេះហើយវាសមរម្យនឹងពេលវេលាហើយ គាត់គួរតែសម្រាកថែរក្សាសុខភាព។ ហើយទាំងអស់នេះក៏ជាសំណូមពររបស់លោក និងកូនចៅដែរ»។
អ្នកនាំពាក្យគណបក្សភ្លើងទៀន លោក គឹមសួរ ភីរិទ្ធ ចាត់ទុកការសម្រេចលាឈប់ពីតួនាទីឧត្ដមទីប្រឹក្សាគណបក្សភ្លើងទៀនរបស់លោក គង់ គាំ នេះ ជាសិទ្ធិសេរីភាពនយោបាយ។
លោកថា៖ «អាហ្នឹងវាជាសិទ្ធិនយោបាយ យើងមិនអាចទៅបង្ខំគាត់បានទេ ជួនកាលគាត់ធ្វើដើម្បីសេចក្ដីសុខក្រុមគ្រួសារ ឬក៏គាត់គិតថាគាត់ចាស់ហើយ គាត់មិនចង់ធ្វើនយោបាយអីតទៅ។ អាហ្នឹងវាជាសិទ្ធិរបស់គាត់។ យើងមានតែអរគុណគាត់ដែលគាត់បានជួយ ហើយជូនពរគាត់ឱ្យសុខសប្បាយអ៊ីចឹងទៅ»។
ដូចគ្នានេះដែរ អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកការលាឈប់របស់លោក គង់ គាំ នាពេលនេះថា ជាសិទ្ធិសេរីភាពនយោបាយ។
ចំពោះរឿងបណ្ដឹងវិញ លោកថា លោកនាយករដ្ឋមន្ត្រីបានប្រកាសរួចហើយ បើលោក គង់ គាំ ប្រគល់ដី និងផ្ទះជូនរដ្ឋវិញនោះ នឹងមិនមានការប្ដឹងផ្ដល់ទៀតឡើយ ក្រោយពីរដ្ឋាភិបាលបានទទួលដីនិងផ្ទះ ដែលជាទ្រព្យសម្បត្តិរបស់រដ្ឋ ពីលោក គង់ គាំ មកវិញ។ ចំណែកបណ្ដឹងរបស់តំណាងគណបក្សប្រជាជនកម្ពុជានៅខេត្តត្បូងឃ្មុំវិញ លោកមិនដឹងនោះទេ ដោយសារវាជាសិទ្ធិរបស់គណបក្សប្រចាំខេត្តនោះ។
លោក សុខ ឥសាន ថ្លែងថា៖ «អាហ្នឹងយើងយល់ថា ទ្វារចំហរបស់គណបក្សប្រជាជនមានចំពោះគ្រប់ពលរដ្ឋទាំងអស់ មិនថាអ្នកណាជាអ្នកណាទេ ទោះបីជាមានអតីតភាពពីមុនមកជូរចត់យ៉ាងណា ក៏គណបក្សប្រជាជនកម្ពុជាមិនប្រកាន់ទេ លើកលែងតែខ្មែរជ្រុលនិយម គឺសម្ដេចបានប្រកាសដាច់ខាត គឺអត់មាន។ អ៊ីចឹងមិនមែនតែចំពោះលោក គង់ គាំ ទេ ទោះបីជាអ្នកនៅជិតស្និទ្ធជាមួយមេឧទ្ទាមក្រៅច្បាប់ជ្រុលនិយម ផ្ដាច់ខ្លួនចេញពីមេឧទ្ទាមមក ក៏យើងស្វាគមន៍ដែរ ឱ្យតែគាត់បោះបង់ជំហររបស់គាត់ជាមួយក្រុមឧទ្ទាមជ្រុលនិយម»។
អ្នកវិភាគនយោបាយ លោក ឯម សុវណ្ណរ៉ា យល់ថា ការលាឈប់របស់លោក គង់ គាំ គ្រាន់តែជាការដោះបន្ទុកពាក់ព័ន្ធនឹងផ្លូវច្បាប់ និងរក្សាសុវត្ថិភាពរបស់គាត់តែប៉ុណ្ណោះ ខណៈទ្រព្យសម្បត្តិដែលត្រូវបានរឹបអូសនោះ លោកថា ប្រហែលជាមិនអាចបានមកវិញទេ។
លោកថា៖ «រឿងបញ្ហាលាលែងរបស់លោក គង់ គាំ ដែលជាទីប្រឹក្សាគណបក្សភ្លើងទៀននេះ វាអាចជួយ ទី១ ជួយដោះទុក្ខសម្រាប់ការដាក់បន្ទុកគាត់បន្ថែមទៀត ពាក់ព័ន្ធនឹងកត្តាផ្លូវច្បាប់ផ្សេងៗ ដែលមានបណ្ដឹងពីខេត្តត្បូងឃ្មុំជាដើមហ្នឹង។ ការសុំទោស វាអាចរួចផុតហ្នឹង ប៉ុន្តែរឿងបញ្ហាដែលអាចបានអចលនទ្រព្យ ដូចជាផ្ទះអី ប្រហែលជាមិនបាន។ អាហ្នឹងគ្រាន់តែជាចំណុចការចាប់អារម្មណ៍របស់ខ្ញុំ។ ខ្ញុំគិតថា គាត់ធ្វើប៉ុណ្ណឹង ដើម្បីដោះបន្ទុកគាត់ ពាក់ព័ន្ធនឹងសុវត្ថិភាព»។
ការប្រកាសលាលែងពីតួនាទី និងឧត្ដមប្រឹក្សាគណបក្សភ្លើងទៀននាពេលនេះ ក្រោយពីលោក គង់ គាំ និងភរិយា បានប្រគល់ដី និងផ្ទះមួយកន្លែង ស្ថិតនៅភូមិ៥ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ត្រលប់មកឱ្យក្រសួងការបរទេសវិញ កាលពីថ្ងៃទី១២ ខែមករា ឆ្នាំ២០២៣ បន្ទាប់ពីលោក ហ៊ុន សែន បញ្ជាឱ្យស្ថាប័នក្រោមបង្គាប់ពន្លឿនវិធានរឹបអូសដីនិងផ្ទះ។
វិធានរឹបអូសអចលនទ្រព្យលោក គង់ គាំ ពីសំណាក់មេដឹកនាំបក្សកាន់អំណាចនេះ បានកើតឡើងក្រោយពីលោកនាយករដ្ឋមន្ត្រី ហ៊ុន សែន ប្រតិកម្មខ្លាំងៗទៅនឹងលោក គង់ គាំ ក្រោយលោក គង់ គាំ បានទម្លាយថា កាលពីលោកនៅជាមួយគណបក្សប្រជាជនកម្ពុជា គេបានផ្តល់ដំបូន្មានថា «ផឹកទឹកឱ្យនឹកប្រភព ជ្រកម្លប់ឱ្យនឹកអ្នកដាំ» តែថា «ថ្ងៃ៧មករា» ទំនងជាមិនមានប្រភពនៅកម្ពុជា ដូចគណបក្សភ្លើងទៀននោះទេ៕