ប្រធានក្រុមប្រឹក្សាជំនុំជម្រះនៃគណៈកម្មាធិការជាតិរៀបចំការបោះឆ្នោត (គ.ជ.ប) សម្រេចលុបឈ្មោះបេក្ខជនមកពីគណបក្សឆន្ទៈខ្មែរ និងគណបក្សភ្លើងទៀនចំនួន ១៣រូប ចេញពីបញ្ជីឈរឈ្មោះក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ ក្រោយរកឃើញភាពមិនប្រក្រតីក្នុងដំណើរការដាក់បេក្ខជនឈរឈ្មោះ ខណៈបេក្ខជនឈរឈ្មោះរបស់គណបក្សភ្លើងទៀន ៤រូបទៀត រក្សាទុកនៅដដែល។
ការសម្រេចនេះ ធ្វើឡើងបន្ទាប់ពីដើមបណ្តឹងស្នើសុំលុបឈ្មោះ និងលុបបញ្ជីឈ្មោះបេក្ខជនឈរឈ្មោះរបស់គណបក្សនយោបាយចំនួនពីរ គឺឈ្មោះបេក្ខជនមកពីគណបក្សភ្លើងទៀនចំនួន ៧រូប ស្ថិតនៅសង្កាត់វាលវង់ សង្កាត់សំបួរមាស ក្រុងកំពង់ចាម ខេត្តកំពង់ចាម និងសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ រួមទាំងឈ្មោះបេក្ខជនមកពីគណបក្សឆន្ទៈខ្មែរចំនួន១០រូប ស្ថិតនៅសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ។
លោកស្រី ទុន គឹមហួយ ដែលជាមេធាវីដើមបណ្តឹងរបស់ឈ្មោះ សុខ ពង់ច័ន្ទវិសុទ្ធ បានលើកឡើងនៅក្នុងបន្ទប់សវនាការនាព្រឹកថ្ងៃអង្គារនេះថា ដើមចមដែលនាំឱ្យពួកគេដាក់ពាក្យបណ្តឹងសុំឱ្យលុបឈ្មោះបេក្ខជនឈរឈ្មោះរបស់គណបក្សឆន្ទៈខ្មែរចំនួន១០នាក់នោះ ដោយសារបេក្ខជនខ្លះមិនចេះអក្សរ មិនបានបំពេញប្រវត្តរូបខ្លួនឯង និងមិនបានចុះហត្ថលេខា និងស្នាមមេដៃជាដើម។
ដោយឡែក ដើមបណ្តឹងលោក ប៉ក់ ប៉ុន បានលើកឡើងក្នុងអង្គសវនាការដែរថា គាត់ប្តឹងទៅ គ.ជ.ប ស្នើសុំលុបបញ្ជីដំបូងរបស់បេក្ខជនចំនួន៤នាក់ ដែលឈរឈ្មោះរបស់គណបក្សភ្លើងទៀន នៅសង្កាត់វាលវង់ ដោយសារពួកគេមិនចេះសរសេរអក្សរ និងមិនចេះអានជាដើម។
ប៉ុន្តែលោក កែត ឃី មេធាវីការពារក្តីឱ្យគណបក្សភ្លើងទៀន បានបដិសេធនិងការចោទប្រកាន់នេះ ។
ចំណែក លោក ស សារ៉ា ដែលប្តឹងទៅ គ.ជ.ប សុំលុបបញ្ជីបេក្ខជនឈរឈ្មោះដំបូងរបស់គណបក្សភ្លើងទៀន នៅសង្កាត់សំបួរមាស បានអះអាងថា គាត់ប្តឹងទៅ គ.ជ.ប ដោយសារតែបេក្ខជនឈរឈ្មោះក្នុងសង្កាត់សំបួរមាសចំនួន៣នាក់ រួមមានឈ្មោះ ហ៊ុន គឹមសាន, វ៉ា គឹមហេន និងសៅ ស្រីនាង បានក្លែងបន្លំឯកសារ មិនចេះអក្សរ មិនមានទីលំនៅដ្ឋានច្បាស់លាស់នៅក្នុងភូមិដែលឈរឈ្មោះ និងមានការចុះហត្ថលេខា និងផ្តិតមេដៃជំនួស។
រីឯ លោកស្រី ទុន គឹមហួយ ដែលជាមេធាវីការពារក្តីឱ្យដើមបណ្តឹង សុខ ពង់វង់ពិសិដ្ឋ បានស្នើទៅប្រធានក្រុមប្រឹក្សាជំនុំជម្រះ គ.ជ.ប លុបបញ្ជីបេក្ខជនឈរឈ្មោះចំនួន១៥នាក់ នៅក្នុងសង្កាត់ផ្សារថ្មីទី៣ ខណ្ឌដូនពេញ នឹងស្នើសុំលុបឈ្មោះបេក្ខជនឈរឈ្មោះបោះឆ្នោត នៅក្នុងសង្កាត់ផ្សារថ្មីទី៣ បន្ថែមទៀត ដោយសារតែពួកគេមិនបានបំពេញប្រវត្តិរូបផ្ទាល់ដៃ ខ្លះមិនចេះអក្សរ និងមិនបានផ្តល់រូបថតដោយស្ម័គ្រចិត្តទេ។
លោក គង់ បូរ៉ា ដែលជាចុងចម្លើយ និងជាតំណាងគណបក្សភ្លើងទៀន នៅខណ្ឌដូនពេញ ចាត់ទុកការប្តឹងសុំដកបេក្ខជនគណបក្សភ្លើងទៀននៅសង្កាត់ផ្សារថ្មីទី៣នេះថាជាមិនរឿងត្រឹមត្រូវ ព្រោះពួកគាត់ចេះសរសេរអក្សរ និងអានអក្សរ និងបានផ្តល់ឯកសារនិងរូបថត រួមទាំងបំពេញបែបបទតាមនីតិវិធីច្បាប់។ ករណីនេះ លោក បូរ៉ា ស្នើ គ.ជ.ប រក្សាបញ្ជីបេក្ខជនរបស់គណបក្សភ្លើងទៀននៅដដែល។
លោក កែត ឃី មេធាវីការពារក្តីឱ្យគណបក្សភ្លើងទៀន បានទទួលស្គាល់ថា ឈ្មោះ សៅ ស្រីនាង ពិតជាមិនចេះសរសេរ និងមិនចេះអានអក្សរប្រាកដមែន ដោយសារតែប្តីរបស់អ្នកស្រី ជាអ្នកបញ្ជូនឈ្មោះមកគណបក្សភ្លើងទៀន ដោយមិនបានប្រាប់ថា ប្រពន្ធគាត់មិនចេះអក្សរនោះទេ។ ទោះជាយ៉ាងណា លោកមិនជំទាស់នឹងការស្នើសុំដកបេក្ខជនទាំងនោះទេ ប៉ុន្តែគណបក្សក៏បានត្រៀមដាក់បេក្ខជនថ្មី ជំនួសអ្នកទាំងនោះផងដែរ ។
លោកមេធាវី កែត ឃី បន្តថា ចំពោះការស្នើសុំលុបបញ្ជីឈ្មោះរបស់គណបក្សភ្លើងទៀនចំនួន១៥នាក់ទៀតចេញពីសង្កាត់ផ្សារថ្មីទី៣ ជារឿងអយុត្តិធម៌ សម្រាប់អ្នកដែលមិនមានកំហុស និងបានស្នើសុំរក្សាបញ្ជីឈ្មោះនៅដដែល។
ប្រធានក្រុមប្រឹក្សាជំនុំជម្រះនៃ គ.ជ.ប លោក ប្រាជ្ញ ច័ន្ទ បានប្រកាសសាលក្រមនៅរសៀលថ្ងៃទី២៩ ខែមីនា ឆ្នាំ២០២២នេះថា គ.ជ.ប សម្រេចរក្សាបញ្ជី និងបេក្ខជនឈរឈ្មោះរបស់គណបក្សភ្លើងទៀននៅសង្កាត់វាលវង់ សង្កាត់សំបួរមាស ក្រុងកំពង់ចាម ខេត្តកំពង់ចាម ទុកជាបានការ ប៉ុន្តែសម្រេចលុបឈ្មោះបេក្ខជន ៣រូប នៅសង្កាត់ផ្សារថ្មីទី៣ ខណ្ឌដូនពេញ ដោយបិទផ្លូវតវ៉ា។
ចំណែក បេក្ខជនឈរឈ្មោះរបស់គណបក្សឆន្ទៈខ្មែរចំនួន១០នាក់ នៅសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ត្រូវបានប្រធានក្រុមប្រឹក្សាជំនុំជម្រះ សម្រេចលុបចេញពីបញ្ជីឈរឈ្មោះបោះឆ្នោតរបស់គណបក្សឆន្ទៈខ្មែរ ដោយសារឃើញមានភាពមិនប្រក្រតីមួយចំនួន។
ក្រោយពីប្រធានក្រុមប្រឹក្សាជំនុំជម្រះប្រកាសសាលក្រម អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍បន្ថែមថា គ.ជ.ប ធ្វើការវិនិច្ឆ័យក្នុងការសម្រេចសេចក្តីនេះ ឈរលើគោលការណ៍ឯករាជ្យ មិនលម្អៀងទៅគណបក្សនយោបាយណាមួយឡើយ ដោយសារ គ.ជ.ប រកឃើញមានភាពមិនប្រក្រតីក្នុងការដាក់បេក្ខជនឈរឈ្មោះក្នុងបញ្ជីបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ខាងមុខនេះ។
អ្វីដែលគួរឱ្យកត់សំគាល់ លោក ហង្ស ពុទ្ធា សង្កេតឃើញថា ក្នុងដំណើរការដាក់បេក្ខជនឈរឈ្មោះក្នុងបញ្ជីបោះឆ្នោតនេះ ហាក់មានភាពស្មុគស្មាញជាងអាណត្តិមុនៗ ដោយសារគណបក្សនយោបាយមួយចំនួន មិនបានត្រៀមបេក្ខជនទុកជាមុនជាដើម។
លោកថា៖ «ការដាក់បញ្ជីបេក្ខជនឈរឈ្មោះគណបក្សនយោបាយ សម្រាប់អាណត្តិនេះ គឺមានភាពសាំញុំា ស្មុគស្មាញជាងអាណត្តិមុន មិនមែនដោយសារនីតិវិធីរបស់ គ.ជ.ប ទេ គឺដោយសារការរៀបចំខ្លួនរបស់គណបក្សនយោបាយ មិនបានល្អិតល្អន់»។
លោកបន្ថែមថា៖ «ទី១ ការមិនយល់ពីនីតិវីធីសម្រាប់ការចុះបញ្ជីបេក្ខជនឈរឈ្មោះនៃគណបក្សនយោបាយ មិនបានត្រឹមត្រូវនិងទូលំទូលាយ ទី២ ការរៀបចំខ្លួនរបស់គណបក្សនយោបាយ យើងឃើញថា មានភាពឆក់ល្វែងច្រើនរហូតទៅដល់បេក្ខជនខ្លះ លោកអត់ដឹងខ្លួនផង ត្រូវបានគេយកឈ្មោះមកប្រើប្រាស់សម្រាប់ការបំពេញឱ្យបញ្ជី ដែលក្នុងគោលការណ៍ច្បាប់ថា ត្រូវមានចំនួនគុណនឹង២ដងនៃចំនួនអាសនៈនៅក្នុងឃុំសង្កាត់នីមួយៗ»។
នាយកប្រតិបត្តិអង្គការនិចហ្វិច លោក សំ គន្ធាមី មានប្រសាសន៍ថា ដើម្បីទប់ស្កាត់បញ្ហាប្រឈម នឹងឈានដល់ការប្តឹងផ្តល់ដល់ គ.ជ.ប គឺគ្រប់គណបក្សនយោបាយទាំងអស់ ត្រូវធ្វើការអប់រំនិងណែនាំ ដល់សកម្មជនរបស់ខ្លួនដែលត្រៀមឈរឈ្មោះ ឱ្យយល់ដឹងពីច្បាប់ នីតិវិធី និងបទបញ្ជារបស់ គ.ជ.ប មុននឹងដាក់ឱ្យពួកគេឈរឈ្មោះជាបេក្ខជន។
លោកផ្តល់ជាអនុសាសន៍ដូចនេះថា៖«គណបក្សគាត់ដឹងពីច្បាប់ពីការជ្រើសរើសបេក្ខជនឈរឈ្មោះ គណបក្សទាំងអស់ត្រូវអនុវត្តតាមបទបញ្ជា នីតិវិធីនៃការជ្រើសរើសហ្នឹងទៅ រៀបចំអីចឹងទៅ កុំឱ្យមានរឿងបែបហ្នឹងកើតឡើងជាមេរៀនមួយដែរ ឬក៏គណបក្សហ្នឹងមានពេលវេលាខ្លីពេកយ៉ាងម៉េចមិនដឹង ប៉ុន្តែយើងធ្វើឱ្យត្រឹមត្រូវតាមលក្ខខណ្ឌ បទបញ្ជា និងនីតិវិធីនៃការជ្រើសរើសហ្នឹងទៅមិនមានបញ្ហាអីទេ»។
បើតាមប្រតិទិនរបស់ គ.ជ.ប ការបោះឆ្នោតជ្រើសរើសក្រុមប្រឹក្សាឃុំសង្កាត់ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខនេះ៕