មន្រ្តីដឹកនាំចុះបង្រ្កាបបទល្មើសព្រៃឈើឲ្យដឹងថាក្រុមការងារជំនាញបានបញ្ជូនសំណុំរឿងទៅតុលាការ ទាក់ទងនឹងភាពមិនប្រក្រតីនៃការស្តុកទុកឈើរបស់ក្រុមហ៊ុនចំនួន៤ ដោយមន្រ្តីអះអាងថាព្រះរាជអាជ្ញានឹងស៊ើបអង្កេតករណីទាំងនេះជាបន្តទៀត។ អ្នកនាំពាក្យកងរាជអាវុធហត្ថលើផ្ទៃប្រទេសដែលកំពុងចុះបង្រ្កាបបទល្មើសព្រៃឈើ ប្រាប់វីអូឌី(VOD)នៅថ្ងៃពុធនេះថាកាលពីថ្ងៃអង្គារ គណៈកម្មការជាតិចុះបង្រ្កាបបទល្មើសព្រៃឈើបានចំណាយរយៈពេលមួយថ្ងៃរហូតដល់យប់ ចុះត្រួតពិនិត្យទីតាំងក្នុងភូមិសាស្ត្រខេត្តមណ្ឌលគិរីទៅលើក្រុមហ៊ុនចំនួន៤ គឺក្រុមហ៊ុនយូនីគ្រីន ក្រុមហ៊ុនម៉ាស្ទឺរខេសាន់ ក្រុមហ៊ុនដាយថាន់ និងក្រុមហ៊ុនកសិកម្មខ្មែរអង្គរ។