ក្រុមជនជាតិដើមភាគតិចពូនង នៅឃុំដាក់ដាំ ស្រុកអូររាំង ខេត្តមណ្ឌលគិរី ចោទអាជ្ញាធរមូលដ្ឋានថាបានគប់គិតគ្នាលក់ដីរដ្ឋនិងព្រៃសហគមន៍ឱ្យទៅមន្ត្រីផ្កាយពីរមួយរូប។
ប្រធានសហគមន៍ភូមិពូត្រែង ឃុំដាក់ដាំ លោក ព្យាន ច្រេន ប្រាប់ វីអូឌី នៅថ្ងៃអង្គារនេះថា «ព្រៃសហគមន៍ច្យារ៉ាតាប់» មានទំហំ២ ០០០ហិកតា ដែលប្រជាពលរដ្ឋនៅភូមិពូត្រែងកំពុងអាស្រ័យផល ត្រូវបានលក់ជាបន្តបន្ទាប់អស់ជាង១០០ហិកតាហើយ។ លោកបន្តថា ដីព្រៃសហគមន៍នោះត្រូវបានអាជ្ញាធរឃុំគប់គិតជាមួយប្រជាពលរដ្ឋមួយចំនួនលក់ទៅឱ្យអ្នកមានអំណាចចាប់តាំងពីឆ្នាំ២០១៨ រហូតដល់បច្ចុប្បន្ន។
លោកបន្តថា កន្លងមក រូបគាត់និងពលរដ្ឋផ្សេងទៀតបានដាក់ពាក្យប្ដឹងទៅអាជ្ញាធរខេត្តនិងតុលាការឱ្យជួយស្រាវជ្រាវ ឬចាត់វិធានការច្បាប់ចំពោះអាជ្ញាធរ រួមទាំងអ្នកដែលបានលក់ដីនេះដែរ ប៉ុន្តែដល់ពេលបច្ចុប្បន្នមិនមានអាជ្ញាធរពាក់ព័ន្ធចុះមកដោះស្រាយឡើយ។
លោកថា៖ «ដោយសារអាជ្ញាធរហ្នឹង បើសិនជាគាត់ប្រាប់ថាកុំលក់ កុំប៉ះពាល់ដីរដ្ឋ ក៏ល្អដែរ! បើគាត់មិនមាត់ផង ឱ្យតែឃើញប្រជាពលរដ្ឋចង់លក់ ថាគេចេះតែបញ្ចុះបញ្ចូល ខ្ញុំឆ្ងល់ត្រង់ហ្នឹងដែរ។ ប្រជាពលរដ្ឋមួយចំនួនគេព្រួយបារម្ភ បើសិនជាបាត់ដីហ្នឹង បានអីកន្លែងមុខរបរ រកស៊ីបោចវល្លិ រកផ្ដៅ និងមើមរំដេងអីហ្នឹង គេបារម្ភអ៊ីចឹង! បារម្ភពួកគាត់លក់ប៉ាត់ណាប៉ាតណី អត់ដឹងដីព្រៃ អត់ដឹងដីសហគមន៍»។
ក្រៅពីដីព្រៃសហគមន៍ច្យារ៉ាតាប់ លោក ច្រេន ថាដីចម្ការស្រល់នៅភូមិឆប ឃុំដាក់ដាំ ក៏កំពុងរងការរំលោភយកធ្វើជាកម្មសិទ្ធិពីសំណាក់មន្ត្រីពាក់ផ្កាយពីរម្នាក់ដែរ។
ជនជាតិដើមភាគតិចម្នាក់ទៀតរស់នៅភូមិពូឆប លោក ឈឿន ប៊ុនធឿន បានលើកឡើងថា ដីដែលលោក អ៊ុំ ណាគ្រី ដែលពលរដ្ឋអះអាងថាជាមន្ត្រីផ្កាយពីរ នៃបញ្ជាការដ្ឋានកងទ័ពជើងគោក បានយកគ្រឿងចក្រទៅឈូសឆាយនោះ ជាដីចម្ការដែលរដ្ឋាភិបាលផ្ដល់សម្បទានសេដ្ឋកិច្ចឱ្យក្រុមហ៊ុនចិនដាំស្រល់ រយៈពេល៥០ឆ្នាំ។
លោកបន្តថា ថ្វីត្បិតក្រុមហ៊ុនចិនទទួលបានសិទ្ធិដាំនិងប្រមូលផលស្រល់នៅលើដីនោះក៏ពិតមែន ប៉ុន្តែក្រុមហ៊ុនមិនដែលយកគ្រឿងចក្រទៅឈូសឆាយដីចម្ការស្រល់ និងដីចម្ការជុំវិញនោះឡើយ ទើបតែថ្មីៗនេះ លោក អ៊ុំ ណាគ្រី បានយកគ្រឿងចក្រឈូសឆាយដើម្បីយកជាកម្មសិទ្ធិ ខណៈពលរដ្ឋចំនួន១០២គ្រួសារមិនបានលក់ដូរនោះឡើយ។
លោក ឈឿន ប៊ុនធឿន បន្តថា នៅពេលពួកគាត់ទៅរកកិច្ចអន្តរាគមន៍ពីអាជ្ញាធរខេត្តឱ្យជួយដោះស្រាយ បែរអាជ្ញាធរមិនអើពើទៅវិញ។
លោកថា៖ «សូមឱ្យលោកអភិបាលដាក់កម្លាំងចុះទៅជួយឃាត់គាត់សិន កុំឱ្យមកឈូសឆាយ ឱ្យមានហេតុផលសិន។ យើងរកហេតុផលសិន គាត់បែរជានិយាយថា ឈូសទៅខ្លាចអីគេប្ដឹង! គាត់មិនខ្លាចប្រជាពលរដ្ឋប្ដឹង គាត់បារម្ភខ្លាចអត់លុយ ខ្ញុំហ៊ាននិយាយអ៊ីចឹង! ហើយដឹងគាត់និយាយម៉េចទេមកកាន់ខ្ញុំ? គាត់ថា លោកឯងឡើងមកសម្របសម្រួលមក ហើយក្នុងតម្លៃណាៗ! ខ្ញុំថា ខ្ញុំមិនអាចធ្វើអ៊ីចឹងបានទេ»។
មេឃុំដាក់ដាំ លោក ចាស់ ណា បានបដិសេធ ដោយថា មិនមានការលក់ដីរដ្ឋនិងដីព្រៃសហគមន៍នោះទេ ខណៈដីចម្ការស្រល់នៅភូមិពូឆប អាជ្ញាធរមូលដ្ឋានក៏មិនបានលក់នោះដែរ។
លោកថា៖ «ភូមិពូឆប មិនមានការលក់ដែរ គ្រាន់តែសភាពការណ៍នេះ ឃើញតែក្រុមហ៊ុន ងួនស្រស់ គាត់ឈូសឆាយព្រំប្រទល់ដី»។
ចំណែកអភិបាលស្រុកអូររាំង លោក សៀក មុន្នី ចាត់ទុកការលើកឡើងរបស់ជនជាតិដើមភាគតិចថាជាសិទ្ធិបញ្ចេញមតិ ដោយថា ករណីនេះ អាជ្ញាធរកំពុងដោះស្រាយ។
លោកថា៖ «យើងកំពុងពិនិត្យបញ្ហាជាមួយក្រុមហ៊ុននិងសហគមន៍ ហើយយើងនឹងបន្តចុះបញ្ជីដីសហគមន៍ ដោះស្រាយជាមួយប្រជាពលរដ្ឋនិងរដ្ឋ។ ពេលមានបញ្ហា យើងដោះស្រាយ ដូចជាករណីដែលបានសួរខ្ញុំហ្នឹង។ ចំពោះអ្នកថា ចេះតែថាហើយ មិនដឹងធ្វើម៉េច»។
វីអូឌី នៅពុំទាន់រកប្រភពទាក់ទងមន្ត្រីយោធាផ្កាយពីរ លោក អ៊ុំ ណាគ្រី នោះបានទេ នៅថ្ងៃអង្គារនេះ។
អ្នកសម្របសម្រួលផ្នែកសិទ្ធិមនុស្ស ដីធ្លី និងព្រៃឈើ នៃបណ្ដាញសហគមន៍ជនជាតិដើមភាគតិចខេត្តមណ្ឌលគិរី លោក គ្រើង តុលា ចាត់ទុកការលើកឡើងរបស់អាជ្ញាធរថា មិនបានឆ្លុះបញ្ចាំងពីការពិតឡើយ។ លោកបន្តថា បច្ចុប្បន្ន ការលក់ដីរបស់រដ្ឋនិងព្រៃសហគមន៍ទៅឱ្យអ្នកមានអំណាចក្នុងខេត្តមណ្ឌលគិរីកំពុងកើតឡើង ប៉ុន្តែអាជ្ញាធរហាក់មិនអើពើដោះស្រាយជូនប្រជាពលរដ្ឋទេ។
លោកថា៖ «អ៊ីចឹងមនុស្សខ្វះការទទួលខុសត្រូវ មិនទទួលការពិត គួរតែប្ដូរអាជ្ញាធរហ្នឹងចោលទៅ។ បើនិយាយពីការទិញលក់ដីមិនចេះខ្វះ ទី១! ហើយទី២ បើមិនជឿ ទៅបើកបញ្ជីមើល៍! ថាគាត់ចុះហត្ថលេខាឱ្យឈ្មួញប៉ុន្មាន ឱ្យប្រជាពលរដ្ឋប៉ុន្មាន! អ៊ីចឹងខ្ញុំគិតថា អាជ្ញាធរមូលដ្ឋានគួរតែទទួលខុសត្រូវខ្ពស់ដែរ កុំចេះតែបដិសេធពេលគេជាន់កែងខ្មាសគេ»។
ក្នុងពិធីប្រកាសចូលកាន់មុខតំណែងរបស់អភិបាលខេត្តមណ្ឌលគិរីថ្មី កាលពីថ្ងៃទី១២ ខែតុលា ឆ្នាំ២០២១ រដ្ឋមន្ដ្រីក្រសួងមហាផ្ទៃ លោក ស ខេង បានទទួលស្គាល់ថា ពិតជាមានការប្រើអំណាចរំលោភយកដីរបស់ប្រជាពលរដ្ឋ និងទ្រព្យសម្បត្តិរដ្ឋ នៅខេត្តភាគឦសាន្តមួយនេះប្រាកដមែន។ ពេលនោះ លោកបានបង្ហាញការសោកស្ដាយចំពោះមន្ដ្រីមួយចំនួនដែលបានប្រើអំណាចរបស់ខ្លួន ទៅរំលោភយកដីធ្លីប្រជាពលរដ្ឋ និងទ្រព្យសម្បត្តិរបស់រដ្ឋ នៅខេត្តមណ្ឌលគិរី មកធ្វើជាកម្មសិទ្ធិផ្ទាល់ខ្លួនថែមទៀតផង។ លោកចាត់ទុកការរំលោភយកដីធ្លីប្រជាពលរដ្ឋនិងទ្រព្យសម្បត្តិរបស់រដ្ឋនោះ ដោយសារតែភាពលោភលន់របស់មន្ត្រីទាំងនោះតែម្តង៕
