តុលាការខេត្តមណ្ឌលគិរី បានកោះហៅតំណាងនិងជនជាតិដើមភាគតិចពូនងចំនួន៤នាក់ដែលសកម្មក្នុងការការពារដីធ្លីនិងធនធានធម្មជាតិ ឱ្យចូលបំភ្លឺនៅចុងខែមិថុនា ឆ្នាំ២០២២នេះ តាមបណ្ដឹងប្រធានក្រុមហ៊ុនឯកជនមួយ។
ក្នុងដីកាកោះហៅដែលចុះថ្ងៃទី២៨ ខែមេសា ឆ្នាំ២០២២ តំណាងអយ្យការអមសាលាដំបូងខេត្តមណ្ឌលគិរី លោក អ៊ាង សុគន្ធ ដោយតម្រូវឱ្យឈ្មោះ គ្រឿង តុលា, ផ្លឹក ភឹរុំ, ផ្លឹក ណារី និង ខ្លើង ទុំ ដែលជាជនជាតិដើមភាគតិច ឱ្យចូលខ្លួនទៅបំភ្លឺនៅរសៀលថ្ងៃទី៧ ខែមិថុនា ឆ្នាំ២០២២ ពីបទ «បរិហារកេរ្តិ៍ជាសាធារណៈ និងញុះញង់ឱ្យប្រព្រឹត្តបទល្មើសជាអាទិ៍» ដើម្បីសាកសួរលើកទី២។
បើតាមដីកាបញ្ជាក់ថា ការកោះហៅតំណាងនិងជនជាតិដើមភាគតិចទាំង៤នាក់ឱ្យចូលបំភ្លឺនេះ គឺធ្វើឡើងតាមបណ្ដឹងរបស់បុគ្គលឈ្មោះ កាក់ រតនា ដែលពលរដ្ឋជនជាតិដើមភាគតិចអះអាងថា ជានាយកក្រុមហ៊ុនវីឡា «ឌីវេឡុបមេន ខូអិលធីឌី»។
អ្នកសម្របសម្រួលជនជាតិដើមភាគតិចពូនងនៅខេត្តមណ្ឌលគិរី អ្នកស្រី ផ្លឹក ភីរុំ ប្រាប់ វីអូឌី នៅថ្ងៃអង្គារនេះថា ពួកគាត់នឹងចូលទៅបំភ្លឺតាមដីកាកោះ ខណៈពួកគាត់មិនបានប្រព្រឹត្តកំហុសដូចការចោទប្រកាន់ឡើយ។
ជនជាតិដើមភាគតិចពូនងរូបនេះ ចាត់ទុកករណីតុលាការកោះហៅពួកគាត់ឱ្យចូលបំភ្លឺនេះថា ជាការគំរាមកំហែង និងជារឿងអយុត្តិធម៌។ អ្នកស្រីថា កន្លងមក ជនជាតិដើមភាគតិចធ្លាប់ប្ដឹងក្រុមហ៊ុនទៅតុលាការជាច្រើនករណី ពាក់ព័ន្ធការដាក់គ្រឿងចក្រឈូសឆាយដីព្រៃនិងដីអាស្រ័យផលរបស់ជនជាតិដើមភាគតិច ប៉ុន្តែតុលាការមិនបានចាត់វិធានការលើបណ្ដឹងពួកគាត់ឡើយ តែបែរជាបានចាត់វិធានការយ៉ាងលឿនពេលដែលពួកគាត់រងបណ្ដឹងពីក្រុមហ៊ុន។
អ្នកស្រីបន្ថែមថា៖ «វាជារឿងអយុត្តិធម៌សម្រាប់ជនជាតិដើមភាគតិច មិនមែនតែខ្ញុំម្នាក់ឯងទេ គឺទូទាំងខេត្តមណ្ឌលគិរី។ ជនស្មោះត្រង់ដែលធ្វើការងារបម្រើ និងការពារផលប្រយោជន៍ទ្រព្យសម្បត្តិសាធារណៈរបស់រដ្ឋ និងពលរដ្ឋអាស្រ័យលើដីធ្លីខ្លួនឯងតែងជាប់បណ្ដឹងនៅតុលាការ និងត្រូវបានចោទប្រកាន់[ពីសំណាក់]អាជ្ញាធរពាក់ព័ន្ធ»។
អ្នកស្រី ផ្លឹក ភីរុំ ស្នើដល់តុលាការឱ្យកាត់ក្ដីដោយឈរលើគោលការណ៍យុត្តិមធ៌និងតម្លាភាព ចៀសវាងកាត់សេចក្ដីដោយលម្អៀងទៅអ្នកមានលុយមានអំណាច។
កាលពីថ្ងៃទី២១ ខែមីនា ឆ្នាំ២០២២ តំណាងជនជាតិដើមភាគតិចបានប្ដឹងអាជ្ញាធរមូលដ្ឋាន២នាក់ រួមមាន ចៅសង្កាត់សុខដុម លោក ពៅ សុផាត និងមេភូមិឡៅកា លោក គឹម ស៊ីម រួមនឹងនាយិកាក្រុមហ៊ុនវីឡា ឌីវេឡុបមេន ខូលិលធីឌី អ្នកស្រី កាក់ រតនា ពីបទ «កាប់រុករានឈូសឆាយដីព្រៃសាធារណៈ និងបំផ្លិចបំផ្លាញដើមជ័រទឹកក្នុងដែនជម្រកសត្វព្រៃភ្នំព្រិច និងអនុគ្រោះបទល្មើសព្រៃឈើ»៕