លោក សម រង្ស៊ី ថាអង្គភាពប្រឆាំងអំពើពុករលួយមិនស្គាល់ពីតួនាទីរបស់ខ្លួន

ប្រធានគណបក្ស​សង្រ្គោះជាតិ លោក សម រង្ស៊ី(ធ្វេង)និង​ប្រធាន​អង្គភាព​ប្រឆាំងអំពើ​ពុករលួយ លោក ឱម យ៉ិន​ទៀង

ប្រធានគណបក្សសង្រ្គោះជាតិ លោក សម រង្ស៊ី បានចាត់ទុកចំណាត់ការរបស់អង្គភាពប្រឆាំងអំពើពុករលួយ(ACU)​លើករណី លោក កឹម សុខា អនុប្រធានគណបក្សប្រឆាំង ជារឿងគ្មានប្រយោជន៍ដល់សាធារណៈនិ​ង​ថា​អង្គ​ភា​ពនេះ​​មិនស្គា​ល់ពីតួនាទីរបស់ខ្លួន។

កាលពីថ្ងៃទី២៤ខែមីនា ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានប្រកាសទទួលយកបណ្ដឹងរបស់ក្រុមយុវជនដែលបានប្ដឹងលោក កឹម សុខា ថាបានផ្ដល់លុយឲ្យស្រីស្នេហ៍ទិញផ្ទះនិងដី ហើយអាចជាប់ពាក់ព័ន្ធនឹងអំពើពុករលួយ។

លោក សម រង្ស៊ី បានសរសេរនៅលើហ្វេសប៊ុករបស់លោកកាលពីថ្ងៃចន្ទថាអំពើពុករលួយគឺជាទង្វើរបស់អ្នកមានអំណាចក្នុងការកេងប្រវ័ញ្ចនិងលួចផលចំណេញពីការលក់ដូរឬការប្រើប្រាស់ទ្រព្យសម្បត្តិជាតិ ទ្រព្យសម្បត្តិរាស្ត្រនិងទ្រព្យសម្បត្តិរដ្ឋ ជាពិសេសតាមរយៈការគ្រប់គ្រងថវិកាជាតិ។ លោកបន្តថា៖ “មានតែមន្ត្រីគណបក្សកាន់អំណាច(CPP)ទេដែលអាចប្រព្រឹត្តទង្វើបែបនេះបាន ពីព្រោះវាជាការប្រើអំណាចរបស់រដ្ឋដោយខុសច្បាប់ ដើម្បីបំផ្លិចបំផ្លាញផលប្រយោជន៍សាធារណៈ”។ លោកបញ្ជាក់បន្ថែមថា៖ “មន្ត្រីគណបក្សប្រឆាំង (CNRP)មិនមានអំណាចអ្វីជាតំណាងរដ្ឋឬតំណាងរដ្ឋាភិបាលដើម្បីប្រព្រឹត្តអំពើពុករលួយ”

លោក សម រង្ស៊ី បានឲ្យដឹងទៀតថាករណីលោក កឹម សុខា ដែលកំពុងរងការចោទប្រកាន់រឿងអាស្រូវស្នេហា គឺជារឿងឯកជនហើយថាគ្មានប៉ះពាល់ដល់ផលប្រយោជន៍ជាតិឬផលប្រយោជន៍សាធារណៈនោះទេ។ លោកបន្តថា៖ “ធនធាននិងលុយកាក់ដែលឯកជនគេចាយវាយហើយដែលមិនបានមកពីការកេងប្រវ័ញ្ចឬលួចកិបកេងទ្រព្យសម្បត្តិជាតិ ទ្រព្យសម្បត្តិរាស្ត្រនិងទ្រព្យសម្បត្តិរដ្ឋ គឺជារឿងឯកជនសុទ្ធសាធ ដែលអង្គភាពប្រឆាំងអំពើពុករលួយមិនត្រូវរវីរវល់ទេ”

មេដឹកនាំបក្សប្រឆាំងរូបនោះបានលើកឡើងករណីមួយចំនួនដែលលោកថាអង្គភាពប្រឆាំងអំពើពុករលួយគួរតែចាត់ការ​ រួមមានការប្លន់ដីប្រជាពលរដ្ឋ​ ការកាប់បំផ្លាញព្រៃឈើ ការធ្វើអាជីវកម្មបំផ្លាញបរិស្ថានដូចជាការវាយកម្ទេចភ្នំនិងការបូមខ្សាច់ ការយកទ្រព្យសម្បត្តិរដ្ឋ ដូចជាអគារសាធារណៈទៅលក់ ដើម្បីប្រមូលលុយដាក់ចូលហោប៉ៅបុគ្គលឬបក្ខពួក ការកិបកេងថវិការដ្ឋយកទៅចាយវាយ ដើម្បីគ្រាន់តែបម្រើផលប្រយោជន៍បុគ្គលឬបក្ខពួក ការផ្តល់កិច្ចសន្យាជាមួយរដ្ឋឲ្យទៅតែបក្ខពួករបស់ខ្លួន ការស៊ីសំណូកសូកប៉ាន់ពីថៅកែរោងចក្រដើម្បីឲ្យថៅកែគាបសង្កត់កម្មករ ការបែងចែកឡូត៍នេសាទ តាមតែសំណូកសូកប៉ាន់ជាដើម។​

វីអូឌី​មិន​ទាន់​អាច​សុំការ​ឆ្លើយ​តបភ្លាមៗពី​លោក ឱម យ៉ិន​ទៀង បាននៅឡើយទេ។​ កាលពីសប្តាហ៍មុន លោក​បាន​ថ្លែងថាអង្គភាពសម្រេចចិត្តទទួលយកពាក្យបណ្ដឹងរបស់ក្រុមយុវជន បន្ទាប់ពីមន្ត្រីជំនាញរបស់​ខ្លួនបានរកឃើញថាសំឡេងខ្សែអាត់ដែលបង្ហោះតាមបណ្តាញសង្គមហ្វេសប៊ុកកន្លងមកគឺជាសំឡេ​ងរបស់​លោក កឹម សុខា និងនារីម្នាក់ឈ្មោះស្រីមុំ ពិតមែន។ លោក​បន្ត​ថា​អង្គភាពប្រឆាំងអំពើពុករលួយក៏បានសម្រេចថានឹងហែកសំបុត្រប្រកាសទ្រព្យសម្បត្តិរបស់លោក កឹម សុខា ផងដែរ។

លោកមានប្រសាសន៍ថា៖ “ខ្សែអាត់ដែលបានធ្វើកោសល្យវិច័យនេះចំនួន៣៤ឃ្លីប ៦៣ទំព័រនេះបញ្ជាក់ថា ជាសំឡេងពិតរបស់តួអង្គនីមួយៗ អ្នកណាគឺសំឡេងរបស់អ្នកហ្នឹងពិត ទី២ អ.ប.ព(អង្គភាព​ប្រឆាំងអំពើ​ពុករលួយ)ទទួលយកពាក្យបណ្ដឹងរបស់ប្អូនយកមកមុខការ មុខការនេះធ្វើដល់ត្រឹមណាខ្ញុំធ្វើដល់ត្រឹមហ្នឹង ដោយគោរពគោលការណ៍អភ័យឯកសិទ្ធរដ្ឋសភា”

ពាក់ព័ន្ធនឹងការចោទប្រកាន់អំពីរឿងអាស្រូវស្នេហានេះ លោក កឹម សុខា មិនបានបកស្រាយអ្វីនោះទេ ប៉ុន្តែ​លោកបានបញ្ជាក់នៅលើហ្វេសប៊ុករបស់លោកថា”យើងមិនត្រូវធ្វើតាមអារម្មណ៍ឬធ្វើអ្វីតាមតែគេចាក់​ឲ្យ​យើងលោតនោះទេ” និងត្រូវប្រកាន់ខ្ជាប់នូវឃ្លាថា ”កុំឈ្លោះ កុំឆ្លើយ និងកុំឆ្លង”។ ចំណែក​រដ្ឋសភា​បាន​ចេ​ញ​លិខិត​មួយ​ទៅ​រូបលោក​ ឲ្យ​បំភ្លឺ​តាមញត្តិ​របស់​យុវជន​ដែល​បាន​ដាក់​ទៅរដ្ឋសភា​ឲ្យ​លោក កឹម សុខា បក​​ស្រាយ​រឿងខ្សែអាត់សំឡេង​ដែល​ត្រូវបានទម្លាយ​តាម​ប្រព័ន្ធ​សង្គមហ្វេសប៊ុក៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered