សារព័ត៌មានសិង្ហបុរី បានឲ្យដឹងថា ករណីឆ្លងជំងឺ Zika ចំនួន ១២ករណីទៀត ត្រូវបានអាជ្ញាធររកឃើញកាលពីថ្ងៃម្សិលមិញ ដែលនាំឲ្យចំនួនអ្នកឆ្លងវីរុសនេះ កើនឡើងដល់ ៣០៤ករណីហើយ។
សារព័ត៌មាន Channel News Asia ដែលបានដកស្រង់សម្ដីសេចក្ដីប្រកាសព័ត៌មានរួមរវាងក្រសួងសុខាភិបាល និងទីភ្នាក់ងារបរិស្ថានជាតិ បានផ្សាយថា ក្នុងចំណោមករណីថ្មី ១២ករណីនោះ ការឆ្លងចំនួន ១០ករណី មានជាប់ទាក់ទងទៅនឹងតំបន់នានា ដែលធ្លាប់ផ្ទុះករណីឆ្លងវីរុសនេះកាលពីប៉ុន្មានថ្ងៃកន្លងមក ប៉ុន្តែ មួយករណីទៀត មិនត្រូវបានគេដឹងថាឆ្លងពីកន្លែងណានោះឡើយ។
អាជ្ញាធរសុខាភិបាលសិង្ហបុរី បានជំរុញទៅប្រជាជនឲ្យចូលរួមប្រយុទ្ធប្រឆាំងនឹងជំងឺ Zika តាមរយៈការកម្ចាត់មូសខ្លាញី និងការលុបបំបាត់ទឹកដក់ដែលជំរុញទៅដល់កំណកំណើតសត្វមូស។
នេះក៏ជាសារព្រមានទៅដល់ប្រជាពលរដ្ឋកម្ពុជាយើងផងដែរ ឲ្យប្រុងប្រយ័ត្នខ្ពស់ចំពោះការធ្វើដំណើរទៅកាន់ប្រទេសសិង្ហបុរី ខណៈដែលប្រទេសនេះកំពុងប្រឈមមុខនឹងការរីករាលដាលនៃការឆ្លងវីរុស Zika៕