អគ្គនាយកដ្ឋានអន្តោប្រវេសន៍កម្ពុជា បានចាប់ផ្ដើមពង្រឹងការត្រួតពិនិត្យនៅតាមបណ្ដាព្រលានយន្តហោះនៅក្នុងស្រុក និងច្រកទ្វារព្រំដែនអន្តរជាតិទាំងអស់ ដើម្បីទប់ស្កាត់ដំណើរវិលត្រឡប់ចូលកម្ពុជាវិញរបស់មេដឹកនាំបក្សប្រឆាំង លោក សម រង្ស៊ី។
នៅក្នុងលិខិតចុះថ្ងៃទី១៨ ខែតុលានេះ លោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍កម្ពុជា បានប្រាប់សមត្ថកិច្ចអន្តោប្រវេសន៍ ពង្រឹងការត្រួតពិនិត្យនៅតាមបណ្ដាច្រកទ្វារអកាសយានដ្ឋានអន្តរជាតិទាំង ៣ នៅភ្នំពេញ សៀមរាប និងក្រុងព្រះសីហនុ និងច្រកទ្វារអន្តរជាតិនានា ដោយលោកថា ដើម្បីអនុវត្តទៅតាមខ្លឹមសារលិខិតរបស់ទីស្ដីការគណៈរដ្ឋមន្ត្រី។
នៅក្នុងលិខិតចុះថ្ងៃទី១២ ខែតុលា ដែលបញ្ជាក់ថា យោងតាមទៅតាមចំណាររបស់លោកនាយករដ្ឋមន្ត្រី ហ៊ុន សែន កាលពីថ្ងៃទី២៦ ខែកញ្ញានោះ លោក តឹករ៉េត សំរេច បានប្រាប់ទៅលោក សុខ ផល ឲ្យអនុវត្តវិធានការ ៤ចំណុច ដើម្បីទប់ស្កាត់ដំណើរវិលត្រឡប់របស់មេដឹកនាំបក្ស លោក សម រង្ស៊ី។
លោក សម រង្ស៊ី ដែលកំពុងនិរទេសខ្លួនឯងនៅឯបរទេសនោះ កាលពីថ្ងៃទី១៩ ខែតុលានេះ បានប្រកាសថា លោកនឹងវិលត្រឡប់ចូលមកក្នុងប្រទេសកម្ពុជានាពេលឆាប់ខាងមុខនេះ៕