ការិយាល័យស៊ើបអង្កេតសហព័ន្ធ បានបើកការស៊ើបអង្កេតទៅលើអ៊ីម៉ែលផ្ទាល់ខ្លួនរបស់អ្នកស្រី ហ៊ីលឡារី គ្លីនតុន ខណៈដែលអ្នកស្រីកំពុងធ្វើយុទ្ធនាការចុងសប្ដាហ៍នេះ សម្រាប់រយៈពេល ១០ថ្ងៃចុងក្រោយនៃការប្រកួតប្រជែងតំណែងប្រមុខសេតវិមាន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
បេក្ខនារីវ័យ ៦៩ឆ្នាំរូបនេះ ដែលកំពុងតែប្រជែងយកតំណែងប្រធានាធិបតីស្ត្រីដំបូងគេរបស់អាមេរិកនោះ នៅតែបន្តនាំមុខលើបេក្ខជនមកពីគណបក្សសាធារណរដ្ឋ លោក ដូណាល់ ត្រាំ សម្រាប់ឆ្ពោះទៅរកការបោះឆ្នោតនៅថ្ងៃទី០៨ ខែវិច្ឆិកាខាងមុខនេះ។
អ្នកស្រី គ្លីនតុន កំពុងនាំមុខយ៉ាងច្បាស់នៅក្នុងការស្ទង់មតិក្នុងចំណោមរដ្ឋចំនួន ៣៤ ដែលសម្រេចថានឹងជ្រើសរើសនរណាជាអ្នកបន្តតំណែងពីប្រធានាធិបតី បារ៉ាក់ អូបាម៉ា។
ប៉ុន្តែ យុទ្ធនាការរបស់អ្នកស្រី បានរងការគំរាមកំហែងនៅថ្ងៃសៅរ៍នេះ ដោយសារតែការផ្ទុះឡើងវិញនូវរឿងអាស្រូវអ៊ីម៉ែល ដែលបានតាមខាំអ្នកស្រីអំឡុងយុទ្ធនាការបោះឆ្នោតនេះ។ នោះគឺការស៊ើបអង្កេតទៅលើការប្រើប្រាស់អ៊ីម៉ែលឯកជន ខណៈកាន់តំណែងជារដ្ឋមន្ត្រីការបរទេស។
លោក ត្រាំង បានប្រកាសពីព័ត៌មានដ៏រំភើបនេះថា ភ្នាក់ងារ FBI កំពុងស៊ើបអង្កេតទៅលើក្រុមអ៊ីម៉ែលថ្មីមួយដែលបានផ្ញើទៅគណនីឯកជនរបស់អ្នកស្រី គ្លីនតុន ដើម្បីរកមើលថា តើពួកគេបានទម្លាយព័ត៌មានសម្ងាត់របស់អាមេរិកឬទេ។
ការស៊ើបអង្កេតនេះ ត្រូវបានគេគិតថាចប់ទៅហើយកាលពីខែកក្កដាកន្លងមក នៅពេល FBI បញ្ជាក់ថា គ្មានការចោទប្រកាន់ប្រឆាំងអ្នកស្រី គ្លីនតុន បើទោះបីជា FBI រកឃើញថា អ្នកស្រីធ្វេសប្រហែសក្នុងការប្រើប្រាស់អ៊ីម៉ែលផ្ទាល់ខ្លួន។
ប៉ុន្តែ លិខិតរបស់លោក Jamese Comey នាយក FBI ផ្ញើទៅសមាជិកសភាអាមេរិក ដែលប្រកាសថា ការស៊ើបអង្កេតចាប់ផ្ដើមឡើងវិញនោះ បានធ្វើឲ្យយុទ្ធនាការតក់ស្លុត ហើយរង្គោះរង្គើដល់ទីផ្សារពិភពលោក៕
អ្នកស្រី គ្លីនតុន បានតវ៉ាចំពោះករណីនេះ ដោយទាមទារឲ្យលោក Comey បញ្ចេញព័ត៌មានបន្ថែមទៀតអំពីការស៊ើបអង្កេតនោះ ហើយអ្នកស្រីបានប្រកាសទាំងមានជំនឿចិត្តថា អ្នកបោះឆ្នោត និង FBI នឹងសន្និដ្ឋានថា អ្នកស្រីមិនបានធ្វើអ្វីខុសនោះទេ៕