លោកនាយករដ្ឋមន្ត្រី ហ៊ុន សែន បានបង្ហាញការរំពឹងទុកថា រដ្ឋាភិបាលថ្មីរបស់អាមេរិក នឹងពិចារណាលុបចោលបំណុលដែលកម្ពុជាជំពាក់នៅក្នុងទសវត្សរ៍១៩៧០ ដោយចាត់ទុកថា នោះគឺជាបំណុលកខ្វក់ដែលចាំបាច់ត្រូវលុបចោល។
ប្រទេសកម្ពុជា បានជំពាក់បំណុលសហរដ្ឋអាមេរិកជាង ៣០០លានដុល្លារ ដែលខ្ចីដោយរបបសាធារណរដ្ឋខ្មែរអំឡុងទសវត្សរ៍១៩៧០ ប៉ុន្តែ រដ្ឋាភិបាលកម្ពុជាបានបដិសេធទូទាត់បំណុលនោះ ដោយទាមទារឲ្យអាមេរិកបង្វែបំណុលនោះទៅជាជំនួយសម្រាប់អភិវឌ្ឍន៍វិញ។
នៅក្នុងពិធីបុណ្យសមុទ្រកាលពីថ្ងៃទី២៤ ខែធ្នូ លោក ហ៊ុន សែន បានថ្លែងថា៖ “ខ្ញុំសង្ឃឹមថា រដ្ឋាភិបាលរបស់លោក ដូណាល់ ត្រាំ នឹងពិចារណាអំពីបំណុលដែលកម្ពុជាបានជំពាក់សហរដ្ឋអាមេរិកក្នុងជំនាន់សាធារណៈរដ្ឋខ្មែររបស់សេនាប្រមុខ លន់ នល់។ តើគួរត្រូវលុបចោលបំណុលនេះឬទេ? យើងខ្ញុំពិបាកក្នុងការពន្យល់នទៅប្រជាជនកម្ពុជា ដើម្បីឱ្យទទួលស្គាល់បំណុលដែលទិញគ្រាប់បែក និងគ្រាប់កាំភ្លើងមកសម្លាប់ប្រជាជនកម្ពុជា”។
ជាងនេះទៅទៀត លោក ហ៊ុន សែន បានបន្ទោសទៅលើសហរដ្ឋអាមេរិកថា ជាអ្នកនៅពីក្រោយនៃរដ្ឋប្រហារទម្លាក់សម្ដេច នរោត្តម សីហុន និងជំរុញឲ្យមានសង្គ្រាមបង្ហូរឈាមនៅក្នុងប្រទេសកម្ពុជា។
លោកបញ្ជាក់ថា៖ “មិនមែន ប៉ុល ពត កើតឡើងដោយឯកឯងទេ។ បើសិនអាមេរិកមិនទម្លាក់សម្តេច នរោត្តម សីហនុ។ ច្បាស់ណាស់សង្គ្រាមមិនបានបង្កើតនៅកម្ពុជា ហើយពួក ប៉ុល ពត ក៏គ្មានវាសនានឹងឡើងកាន់អំណាចនោះទេ។ ដូច្នេះ តើអាមេរិកត្រូវទទួលពាក់រង្វាន់ណូបែល ឬក៏ត្រូវទទួលយកទៅកាត់ទោសនៅតុលាការអន្តរជាតិ ស្តីពីការបង្កើតសោកនាតកម្ម។ សម្រាប់ប្រជាជនកម្ពុជា តើគេត្រូវឆ្លើយតបយ៉ាងណានៅចំពោះអ្វីដែលបានកើតកាលពីពេលមុន ហើយប៉ះប៉ូវឱ្យកម្ពុជា”។
លោក ហ៊ុន សែន ដាក់ក្តីសង្ឃឹមថា រដ្ឋាភិបាលថ្មីរបស់សហរដ្ឋអាមេរិកនឹងពិចារណាទៅលើវិនាសសកម្មដែលអាមេរិកបានបន្សល់ទុកនៅក្នុងប្រទេសកម្ពុជារាប់ទាំងគ្រាប់មីន និងគ្រាប់មិនទាន់ផ្ទុះជាច្រើន។
លោកបន្ថែមថា៖ “តើត្រូវផ្តល់ជំនួយយ៉ាងណា? យ៉ាងហោចបំផុត លុបចោលបំណុលដែលរបប លន់ នល់ បានជំពាក់នៅក្នុងអតីតកាល ដែលហៅថាបំណុលកង្វក់ដែលចាំបាច់ត្រូវលុប”។
ក្រៅពីសហរដ្ឋអាមេរិក កម្ពុជាក៏ជំពាក់បំណុលបណ្ដាប្រទេសដទៃទៀតផងដែរ ដូចជា រុស្ស៊ី ចិន។
ទោះជាយ៉ាងណា កាលពីថ្ងៃទី ១៣ ខែតុលាកន្លងទៅនេះ ចិនបានប្រកាសលុបចោលបំណុល ៩០លានដុល្លារ ដែលកម្ពុជាបានជំពាក់នៅក្នុងឆ្នាំ២០១៥ និងបន្ថែមជំនួយឥតសំណងជាទឹកប្រាក់ ១៥លានដុល្លារអាមេរិកលើវិស័យយោធាកម្ពុជា ដើម្បីពង្រឹងកិច្ចសហប្រតិបត្តិការប្រទេសទាំងពីរ៕