មន្ត្រីនគរបាលខេត្តសៀមរាប បានឲ្យដឹងថា គ្រាប់កាំភ្លើងធុន M60 ចំនួន៣កេស ត្រូវបានប្រជាពលរដ្ឋនៅស្រុកវ៉ារិន ប្រទះឃើញកាលពីថ្ងៃម្សិលមិញនេះ ដែលនេះគឺជាការរកឃើញកាកសំណល់សង្គ្រាមថ្មីបំផុតមួយ តែប៉ុន្មានសប្ដាហ៍ក្រោយពីអាជ្ញាធរកម្ពុជារកឃើញគ្រាប់បែកគីមីនៅឯខេត្តស្វាយរៀង។
អធិការនគរបាលស្រុកវ៉ារិន លោក ណុប សារ៉ាក់ បានប្រាប់វីអូឌីនៅថ្ងៃនេះថា គ្រាប់កាំភ្លើងធុន M60 ចំនួន៣កេសនោះ ត្រូវបានប្រជាពលរដ្ឋប្រទះឃើញនៅក្នុងភូមិវត្ត ស្ថិតក្នុងឃុំស្រែណូយ។ លោកបន្ថែមថា គ្រាប់កាំភ្លើងនោះ ត្រូវបាននគរបាលយកទៅរក្សាទុកនៅអធិការដ្ឋាននគរបាលស្រុក មុននឹងរាយការណ៍ទៅស្នងការនគរបាលខេត្ត។
លោកបញ្ជាក់ថា គ្រាប់កាំភ្លើងដែលរកឃើញនោះ អាចនឹងត្រូវយកទៅកំទេចចោល ព្រោះវានៅមានគុណភាពត្រឹមតែ៨០ភាគរយ ទៅ៩០ភាគរយប៉ុណ្ណោះ។
គ្រាប់កាំភ្លើងនេះ ត្រូវបានគេរកឃើញជាង១សប្ដាហ៍ក្រោយពីអាជ្ញាធរកម្ពុជា បានប្រទះឃើញគ្រាប់បែកគីមីផលិតនៅអាមេរិក នៅឯខេត្តស្វាយរៀង។
មជ្ឈមណ្ឌលកម្ចាត់មីនកម្ពុជា ហៅកាត់ថា ស៊ីម៉ាក់ បានអះអាងថា វាគឺជាគ្រាប់បែកគីមីដ៏គ្រោះថ្នាក់ បន្សល់ទុកពីសម័យសង្គ្រាម ដែលទម្លាក់ដោយកងទ័ពអាមេរិកមកលើប្រទេសកម្ពុជា។
ការរកឃើញគ្រាប់មិនទាន់ផ្ទុះជាបន្ដបន្ទាប់ដូចនេះ ធ្វើឡើងក្រោយពីលោកនាយករដ្ឋមន្ដ្រី ហ៊ុន សែន ស្នើឲ្យសហរដ្ឋអាមេរិកលុបបំណុលចាស់ ដែលកម្ពុជាជំពាក់កាលសម័យសាធារណរដ្ឋ លន់ នល់ និងចោទអាមេរិកថា បានសម្លាប់ពលរដ្ឋខ្មែរជាងកន្លះលាននាក់អំឡុងឆ្នាំ១៩៦៣ដល់១៩៧៥។
ប៉ុន្ដែ ស្ថានទូតអាមេរិកមិនទាន់បានឆ្លើយតបចំពោះសំណើនេះទេ ដោយថាត្រូវរងចាំការពិភាក្សាដិតដល់ជាមុនសិន៕
