ភរិយាសពទាហានមួកខៀវកម្ពុជា ដែលបាត់បង់ជីវិតអំឡុងបំពេញបេសកកម្មរក្សាសន្តិភាពនៅប្រទេសអាហ្វ្រិកកណ្ដាលនោះ បានឲ្យដឹងថា សពស្វាមីរបស់អ្នកស្រី នឹងត្រូវបញ្ជូនត្រឡប់មកដល់កម្ពុជាវិញនៅយប់នេះ។
ទាហានកម្ពុជា ៤រូប មានលោក អ៊ឹម សំ លោក ស៊ាង នរិន្ទ លោក មុំ តុលា និងលោក ម៉ៅ អេង ដែលបានចេញបំពេញបេសកកម្មរក្សាសន្តិភាពនៅសាធារណរដ្ឋអាហ្វ្រិកកណ្ដាល ក្រោមក្របខណ្ឌអង្គការសហប្រជាជាតិនោះ ត្រូវបានពួកឧទ្ទាមសម្លាប់ កាលពីថ្ងៃទី០៨ ខែឧសភាកន្លងមកនេះ។
អ្នកនាំពាក្យក្រសួងការពារជាតិ លោក ឈុំ សុជាតិ បានប្រាប់វីអូឌីកាលពីសប្ដាហ៍មុនថា សពទាហានខ្មែរទាំង ៤រូបនេះ នឹងត្រូវបញ្ជូនមកដល់កម្ពុជានៅ ២សប្ដាហ៍ទៀត។
ភរិយាសពទាហាន អ៊ឹម សំ អ្នកស្រី តាន់ ភារ័ត្ន បានប្រាប់វីអូឌីនៅថ្ងៃនេះថា អ្នកស្រីបានធ្វើដំណើរមកដល់ភ្នំពេញហើយនៅថ្ងៃនេះ ដើម្បីរង់ចាំទទួលសពស្វាមី ដែលគ្រោងនឹងមកដល់អាកាសយានដ្ឋានអន្តរជាតិភ្នំពេញ នៅម៉ោង ៧:៥៥នាទីយប់ថ្ងៃនេះ៕
