ធនាគារស្ថាបនា ភីអិលស៊ី គ្រោងនឹងផ្លាស់ប្ដូរស្លាកសញ្ញាពាណិជ្ជកម្មរបស់ខ្លួននាពេលខាងមុខនេះ ដែលផែនការកែប្រែនេះ ត្រូវបានគេគ្រោងធ្វើឡើង បន្ទាប់ពីរដ្ឋាភិបាលបានចាត់វិធានការទៅលើធនាគារ និងគ្រឹះស្ថានមីក្រូហិរញ្ញវត្ថុមួយចំនួននាពេលថ្មីៗនេះ។
ក្នុងសេចក្ដីប្រកាសព័ត៌មានកាលពីថ្ងៃម្សិលមិញនេះ ធនាគារស្ថាបនា ដែលកាន់កាប់ចំណែកភាគហ៊ុនធំដោយធនាគារជប៉ុន MARUHAN Japan Group នោះ បានប្រកាសថា ធនាគារនេះកំពុងតែសិក្សាលើការផ្លាស់ប្ដូរស្លាកសញ្ញារបស់ខ្លួននាពេលឆាប់ៗខាងមុខនេះ។
គម្រោងកែប្រែស្លាកសញ្ញារបស់ធនាគារមួយនេះ ត្រូវបានធ្វើឡើងបន្ទាប់ពីធនាគារអេស៊ីលីដា និងគ្រឹះស្ថានមីក្រូហិរញ្ញវត្ថុប្រាសាក់ ត្រូវបានលោកនាយករដ្ឋមន្ត្រី ហ៊ុន សែន បញ្ជាឲ្យផ្លាស់ប្ដូរឡូហ្កូរបស់ពួកគេ ដែលលោក ហ៊ុន សែន ថា ដើម្បីកុំឲ្យប្រជាពលរដ្ឋភាន់ច្រឡំថា ធនាគារ ឬគ្រឹះស្ថានមីក្រូហិរញ្ញវត្ថុទាំងនេះ គឺជាស្ថាប័នផ្ដល់កម្ចីហិរញ្ញវត្ថុរបស់រដ្ឋ៕