ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ បានលើកឡើងថា លោកចង់ឃើញរដ្ឋាភិបាលមានយន្តការច្បាស់លាស់ និងស្វែងយល់ពីឫសគល់នៃបញ្ហាការដំឡើងតម្លៃទំនិញ ឬសេវាកម្មអំឡុងពិធីបុណ្យទាន ជាជាងការព្រមានដកហូតអាជ្ញាបណ្ណអាជីវកម្ម។
អ្នកឃ្លាំមើលបញ្ហាសង្គមរូបនេះ បានលើកឡើងដូច្នេះ មួយថ្ងៃក្រោយពីរដ្ឋមន្ត្រីទេសចរណ៍ លោក ថោង ខុន បានព្រមានដកហូតអាជ្ញាបណ្ណពីប្រតិបត្តិករឧស្សាហកម្មទេសចរណ៍ ដែលមិនបានដាក់តារាងតម្លៃទំនិញ ឬសេវាកម្មរបស់ពួកគេឲ្យបានជាក់លាក់។
នៅលើទំព័រហ្វេសប៊ុករបស់ក្រសួងទេសចរណ៍ លោក ថោង ខុន បញ្ជាក់ថា៖ “មូលដ្ឋានអាជីវកម្ម និងសេវាកម្មណាមិនអនុវត្ត គឺមិនអាចប្រកបអាជីវកម្មបានទេ។ ក្រសួងទេសចរណ៍ នឹងមិនផ្ដល់អាជ្ញាបណ្ណទេសចរណ៍បន្ត ឬអាជ្ញាបណ្ណទេសចរណ៍ថ្មីឡើយ”។
ប៉ុន្តែ លោក សន ជ័យ លើកឡើងថា រដ្ឋាភិបាលគួរតែពិភាក្សាជាមួយម្ចាស់អាជីវកម្មអំពីការដំឡើងតម្លៃទំនិញ ឬសេវាកម្ម ក្នុងពិធីបុណ្យទាន ដើម្បីផលចំណេញទាំងសងខាង។
លោកបញ្ជាក់ថា៖ “កម្ពុជាប្រកាន់របបទីផ្សារសេរី ហើយច្បាប់វិនិយោគហ្នឹង គឺមិនអនុញ្ញាតឲ្យរដ្ឋាភិបាលហ្នឹង គ្រប់គ្រងទៅលើតម្លៃសេវារបស់វិស័យឯកជននោះទេ។ ខ្ញុំថា ចំណុចនេះ វាពិបាករកឃើញនូវទិដ្ឋភាពនៃការព្រមានរបស់ក្រសួងទេសចរណ៍ហ្នឹង”។
លោកបន្ថែមថា លោកចង់ឲ្យរដ្ឋាភិបាលមានយន្តការត្រួតពិនិត្យរកហេតុផលនៅពីក្រោយនៃការដំឡើងថ្លៃនៅរដូវបុណ្យទាន ដោយថា អាចបណ្ដាលមកពីអំពើពុករលួយ វត្ថុធាតុដើម ទំនិញមួយចំនួន និងទីតាំងជួលលក់ ដែលជំរុញឲ្យទំនិញ និងសេវាដំឡើងថ្លៃ៕