រដ្ឋាភិបាលកម្ពុជា ថ្មីៗនេះ បានសម្រេចដំឡើងថវិកាដល់ទៅ ៥០ម៉ឺនដុល្លារ សម្រាប់ជាលក្ខខណ្ឌមុននឹងទទួលបានការតែងតាំងងារ «ឧកញ៉ា» ដល់បុគ្គលណាម្នាក់។ នេះដោយយោងតាមការសម្រេចថ្មីរបស់រដ្ឋាភិបាល។
ក្នុងអនុក្រឹត្យចុះថ្ងៃទី២០ ខែមីនាកន្លងមកនេះ លោកនាយករដ្ឋមន្ត្រី ហ៊ុន សែន បានសម្រេចថា បុគ្គលដែលធ្វើអំណោយជូនរដ្ឋ ទោះជាថវិកា ឬសម្ភារៈ មានតម្លៃចាប់ពី ៥០ម៉ឺនដុល្លារឡើងទៅ ទើបអាចទទួលបានការតែងតាំងងារ “ឧកញ៉ា”ពីព្រះមហាក្សត្រ។
អនុក្រឹត្យចាស់ឆ្នាំ១៩៩៤ បានកំណត់ថា សប្បុរជនដែលបានធ្វើអំណោយជូនរដ្ឋ ទោះជាថវិកា ឬសម្ភារៈ មានតម្លៃចាប់ពី ១០ម៉ឺនដុល្លារឡើងទៅ នឹងត្រូវទទួលបានការតែងតាំងងារជា «ឧកញ៉ា»។
ចំនួនឧកញ៉ានៅក្នុងប្រទេសកម្ពុជា ត្រូវបានគេដឹងមានចំនួនជាង ៧០០នាក់ គិតត្រឹមឆ្នាំ២០១៥កន្លងមក៕
