លោកនាយករដ្ឋមន្ត្រី ហ៊ុន សែន បានហៅសារអំពាវនាវ របស់អតីតមេដឹកនាំបក្សប្រឆាំងឲ្យបង្កើតស្នាមខ្មៅនៅលើចង្អុលដៃ ដើម្បីបន្លំថា ខ្លួនពិតជាបានចេញទៅបោះឆ្នោតនោះ ថាជាសារកៀរគរប្រជាពលរដ្ឋឲ្យទៅជាប់គុក ។
នៅប៉ុន្មានសប្តាហ៍នេះ លោក សម រង្ស៊ី និងអតីតមន្ត្រីជាន់ខ្ពស់មួយចំនួន បានធ្វើយុទ្ធនាការនៅក្រៅប្រទេស អំពាវនាវកុំឲ្យពលរដ្ឋទៅបោះឆ្នោតដោយបង្កើតជាពាក្យស្លោកថា «នៅផ្ទះឈ្នះឯង» ឬថាបើបារម្ភពីសន្តិសុខផ្ទាល់ខ្លួន ខ្លាចមានការរើសអើងពីបក្សកាន់អំណាចនោះ អាចយកទឹកថ្នាំលាភសក់ ជ្រលក់ដៃក៏បាន។
ប៉ុន្តែក្នុងពិធីមួយនៅខេត្តបាត់ដំបង នាថ្ងៃទី៣១ខែឧសភានេះ លោក ហ៊ុន សែន ថ្លែងហាក់វាយបកទៅនឹងសារនយោបាយ របស់អតីតបក្សប្រឆាំង ថាការធ្វើឲ្យចង្អុលដៃ ខ្លួនឯងប្រលាក់ទឹកខ្មៅ ដោយមិនទាំងបានទៅបោះឆ្នោតផងនោះ លោកថាស្មើ នឹងបង្កើតបទល្មើសព្រហ្មទណ្ឌ។
លោក ហ៊ុន សែន ថ្លែងទាំងប្រើសំដីធ្ងន់ៗទំនងជាសំដៅដល់លោក សម រង្ស៊ី ថាខ្លួនឯងរត់គេចពីគុក តែបែរជាចង់រុញ អ្នកនៅក្នុងស្រុកជាប់គុក ។
លោក ហ៊ុន សែន នាយករដ្ឋមន្ត្រីកម្ពុជា
ការលើកឡើងរបស់លោកនាយករដ្ឋមន្ត្រីនេះ ធ្វើឡើងក្រោយ១ថ្ងៃ បន្ទាប់ពី គេហទំព័រ Freesh News ដែលគេស្គាល់ថាស្និទ្ធ នឹងរដ្ឋាភិបាល បានដកស្រង់សម្តីអ្នកនាំពាក្យក្រសួងយុត្តិធម៌ លោក គឹម សន្តិភាព មកចុះផ្សាយថា ការបន្លំខ្លួនថាបានទៅបោះឆ្នោត ដោយជ្រលក់ទឹកខ្មៅផ្សេង ជាអំពើល្មើសច្បាប់ ប្រឈមនឹងការផ្តន្ទាទោសដាក់ពន្ធនាគារតាមច្បាប់ព្រហ្មទណ្ឌ។
ប៉ុន្តែការចុះផ្សាយនោះ មិនបានបញ្ជាក់ថា មន្ត្រីយុត្តិធម៌រូបនេះអះអាងបែបហ្នឹងយោងតាមមាត្រាណាមួយនៃច្បាប់ព្រហ្មទណ្ឌនោះទេ។
អ្នកជំនាញផ្នែកច្បាប់ លោកមេធាវី សុក សំអឿន ពន្យល់ថា រដ្ឋធម្មនុញ្ញមិនបានចែងពីការដាក់ទោសទណ្ឌដល់អ្នកមិនទៅបោះឆ្នោតនោះទេ។ លោកថា តាមបទពិសោធន៍ធ្វើជាមេធាវីច្រើនឆ្នាំមកនេះ ក៏មិនដែលអានចំមាត្រាណាចែងថា អ្នកយកទឹកថ្នាំជ្រលក់ដៃខ្លួនបង្កើតជាបទល្មើសព្រហ្មទណ្ឌនោះដែរ។
លោកថា៖«ដូចជាអត់មានបទល្មើសអីទេ។ និយាយរួមទៅអត់ទៅបោះឆ្នោតអត់មានទោសផង ចាំបាច់ភ័យអី។ ខ្ញុំអត់ដឹងច្បាស់ថាគាត់យកមាត្រាណាដែរ គ្រាន់តែថាធ្វើមេធាវីកន្លងទៅវាអត់ធ្លាប់ជួបប្រទះ ជួនកាលខ្ញុំថាទៅវាអាចអត់ត្រូវដែរ ព្រោះក្រែងយើងរៀនអត់ដល់»។
លោក សម រង្ស៊ី បានលើកឡើងលើគេហទំព័រហ្វេសប៊ុក របស់លោក នៅថ្ងៃទី៣០ឧសភានេះថា ការធ្វើពហិការមិនទៅបោះឆ្នោត ជាការសង្គ្រោះជាតិចេញពីរបបផ្តាច់ការ ធានាដល់ការអភិវឌ្ឍដ៏ពិតប្រាកដមួយ នៅកម្ពុជា។
លោក សម រង្ស៊ី អតីតមេដឹកនាំបក្សប្រឆាំង
របត់នយោបាយនៅកម្ពុជា ដែលឈានទៅចាប់ឃុំខ្លួនអតីតមេដឹកនាំបក្សប្រឆាំង លោក កឹម សុខា ការរំលាយគណបក្សសង្គ្រោះជាតិ និងបិទប្រព័ន្ធផ្សព្វផ្សាយឯករាជ្យជាង៣០ស្ថាប័ន ជំរុញឲ្យសហគមន៍អន្តរជាតិវាយតម្លៃថា កម្ពុជាកំពុងដើរចេញពី គន្លងប្រជាធិបតេយ្យ វិលទៅរករបបដឹកនាំបែបឯកបក្ខដូចពីអតីតកាល។
ករណីនេះ សហរដ្ឋអាមេរិក និងសហភាពអឺរុប បាននាំមុខគេក្នុងការព្រមាន ដាក់ទណ្ឌកម្មសេដ្ឋកិច្ច បើរដ្ឋាភិបាលមិនរៀបចំការបោះឆ្នោតមួយ មានលក្ខណៈសេរីត្រឹមត្រូវ មានគណបក្សប្រឆាំងចូលរួមដោយគ្មានការគំរាមកំហែងផ្នែកនយោបាយឡើងវិញនោះ។
